ހުޅުމާލޭގައި ބިދޭސީން ހިންގަމުން ގެންދިޔަ ބޯކޮށާ ހަތަރުތަނެއް ރޭ ބަންދުކޮށްފި އެވެ.
އެތަންތަން ބަލައި ފާސްކުރީ ގަވައިދާ ހިލާފަށް އުޅޭ ބިދޭސީން ހޯދަން ކުރިއަށް ގެންދާ އޮޕަރޭޝަނުގެ ތެރެއިންނެވެ.
އިމިގްރޭޝަނުން ރޭ ބުނީ ސިލްސިލާ އޮޕަރޭޝަންތަކުގެ ތެރެއިން އިއްޔެ ބަލައި ފާސްކުރީ ޖުމްލަ ހަތް ތަނެއް ކަމަށެވެ. އޭގެ ތެރެއިން ތިން ތަނެއްގައި މައްސަލައެއް ނެތް ނަމަވެސް ގަަވައިދާ ހިލާފަށް ހިންގާ ކަމަށް ތުހުމަތު ކުރެވޭ ހަތަރު ތަނެއް ވަނީ ބަންދުކޮށްފަ އެވެ.
އެތަންތަނުގައި ގަވާއިދާ ހިލާފަށް މަސައްކަތްކުރި ހަތް ބިދޭސީއަކު ހައްޔަރުކޮށްފައިވާ ކަމަށްވެސް އިމިގްރޭޝަނުން ބުންޏެވެ. މިހާރު ހިންގާ އޮޕަރޭޝަންތަކުގައި ހައްޔަރުކުރާ މިފަދަ ބިދޭސީން 48 ގަޑިއިރު ތެރޭ ޑީޕޯޓު ކޮށްލަން ސަރުކާރުން ވަނީ ނިންމާފަ އެވެ.
އެގޮތުން ވޭތުދިޔަ ދެތިން މަހެއްގައި 2،000 އަށްވުރެ ގިނަ ބިދޭސީން ހައްޔަރުކޮށް ޑީޕޯޓުކޮށްފައިވެ އެވެ. އަދި އެ މީހުން ހިންގަމުންދިޔަ އަދި މަސައްކަތް ކުރަމުންދިޔަ އެތައް ތަނެއް ވަނީ ބަންދުކޮށްފަ އެވެ.
އޭގެތެރޭގައި ހަށިވިއްކާ ތަންތަނާއި ކޮފީ ޝޮޕު ތަކާއި މާރުކޭޓުތަކާއި އެހެނިހެން ވިޔަފާރިތައްވެސް ހިމެނެ އެވެ.
ޑީޕޯޓުކޮށްލި ބިދޭސީންގެ ތެރޭގައި މަސްތުވަތަކެތީގެ މައްސަލަތަކުގައި ހައްޔަރުކުރި 116 މީހުންވެސް ހިމެނެ އެވެ.
