ކިންގްސްޓަން ހޯލްޑިންގްސް މޯލްޑިވްސް ޕްރައިވެޓް ލިމިޓެޑުން ސައިކަލު ގަތުމުގައި މަކަރާއި ހީލަތުގެ އަމަަލެއްގެ ޝިކާރައަކަށް ވެފައިވާ މީހުން މައުލޫމާތު ހިއްސާކުރަން ފުލުހުން އެދިއްޖެ އެވެ.
ފުލުހުން ބުނީ ކިންގްސްޓޮން ހޯލްޑިންގްސް މޯލްޑިވްސް ޕްރައިވެޓް ލިމިޓެޑުން އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލަ ބަލަމުންދާ ކަމަށެވެ.
"މިކަމުގެ ޝިކާރައަކަށްވި އިތުރު ފަރާތެއް ހުރިނަމަ، މި ހިދުމަތުގެ އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅުއްވައި އެ މަޢުލޫމާތު ހިއްސާކުރެއްވުން އެދެން،" ފުލުހުން ބުންޏެވެ.
މާލޭގައި ސައިކަލް ވިއްކާ ކިންގްސްޓަން މޯލްޑިވްސްއަށް ފައިސާ ދެއްކި ގިނަ ބަޔަކަށް ސައިކަލް ނުލިބި އަށެއްކަ މަސް ވެއްޖެ ކަމަށާއި، ސައިކަލް ލިބޭނެ ދުވަހެއް ނޭނގޭ ކަމަށް، އެ މަޅީގައި ޖެހިފައިވާ ބައެއް މީހުން "އަދަދު" އަށް ވަނީ ކިޔައިދީފަ އެވެ.
ކިންގްސްޓަންގެ އިސް އޮފިޝަލަކު ބުނީ ސައިކަލްތައް ހަވާލުނުކުރެވުނީ ޝިޕްމެންޓު ޑިލޭވެގެން ކަމަށާއި ނުދެވި ހުރި ސައިކަލްތަކުގެ އަދަދު 60 އަށް އަރާނެ ކަމަށެވެ. ނަމަވެސް ޝިޕްމަންޓް އަންނަން ބުނި ދުވަސް ފަހަނައަޅައި ދިޔައިރު ވެސް ކަސްޓަމަރުންނަށް ފައިސާ ލިބިފައެއް ނުވެ އެވެ.
