ރާއްޖޭގައި އަންނަ މަހު ހަ ވަނަ ދުވަހު ފަށާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) އިން މާލޭގައި ބާއްވާ ޗެލެންޖު ކަޕުގައި ރާއްޖޭގެ ގައުމީ އަންހެން ޓީމުން ބަދަލުތަކެއް ފެންނާނެ ކަމަށް ގައުމީ އަންހެން ވޮލީ ޓީމުގެ ކޯޗު ސޮފްވާން އަހުމަދު (ސޮއްޕެ) ބުނެފި އެވެ.
މި މަހު ނޭޕާލުގައި ކުރިއަށްދިޔަ ކާވާ ވޮލީބޯލް ލީގުގައި ގައުމީ ޓީމުން ވަނީ ބައިވެރިވެފަ އެވެ. ކާވާގެ އެއް ވަނަ ފަންތީގެ ޓީމުތައް ކުޅޭ މި މުބާރާތުގައި ރާއްޖޭގެ އިތުރުން މުބާރާތް ބާއްވާ ގައުމު ނޭޕާލް, އީރާން, ސްރީ ލަންކާ އަދި އިންޑިއާ ވަނީ ވާދަކޮށްފަ އެވެ. ރާއްޖެ އިން މުބާރާތް ނިންމާލީ މެޗަކުން މޮޅުނުވެ، އަދި ސެޓެއް ވެސް ނުލިބި އެވެ.
"އަދަދު" އާ ވާހަކަ ދައްކަމުން ސޮފްވާން ބުނީ، މި މުބާރާތައް ރާއްޖޭގެ ޓީމުން ދިޔައީ އަމިއްލަ ގައުމުގައި ފަށާ ކާވާ ޗެލެންޖު ކަޕަށް ތައްޔާރުވުމުގެ ގޮތުން ކަމަށެވެ. އަދި ޗެލެންޖު ކަޕުގެ ކުރިން ޓްރެއިނިންގް ކޭމްޕެއް ހެދުމުގެ ބަދަލުގައި މުބާރާތެއްގައި ކުޅެ، އެ ތަޖުރިބާ ހޯދުން އެއީ މި މުބާރާތުގައި ރާއްޖެ ބައިވެރިވި ސަބަބު ކަމަށް ސޮފްވާން ވަނީ ހާމަކޮށްފަ އެވެ.
ސޮފްވާން ބުނީ މި މުބާރާތުން ރާއްޖެއިން ހާސިލް ކުރަން ބޭނުންވި ކަންކަން ހާސިލްވި ކަމަށާއި، އޭގެ ތެރެއިން އެއް ކަމަކީ ޗެލެންޖު ކަޕް ރާއްޖޭގައި ބާއްވާއިރު، އެ މުބާރާތުގެ ފައިނަލް ކުޅެން ކުރަން ޖެހޭ މަސައްކަތް މި މުބާރާތުން ދެނެގަނެވިފައިވާ ކަމަށެވެ.
"މުބާރާތުގެ ކުރިން ކޭމްޕަކަށް ދިޔުމަށް ވުރެ ރަސްމީ މި ކަހަލަ މުބާރާތަކުން ޓީމު އިތުރަށް ކުރަން ޖެހޭ ކަންކަން ދެނެގަންނަން ފަސޭހަވާނެތީ މި މުބާރާތައް އައިސް މި މުބާރާތުން އަހަރެމެން އަށް އެކަންކަން ދެނެގަނެވިއްޖެ" ސޮއްޕެ ބުންޏެވެ.
މި މުބާރާތުން ދަސްވި ކަންކަމާ އެކު، ކުރިއަށް އޮތް 25 ވަރަކަށް ދުވަހުގެ ތެރޭގައި އެކި ބަަދަލުތައް ގެނެސް، ރަނގަޅުކުރަން މަސައްކަތް ފެށުމުގެ އަމާޒަކީ ރާއްޖޭގައި ބާއްވާ މުބާރާތުން އެންމެ މަދުވެގެން ރިހި މެޑަލް ހޯދާ ހިސާބައް ދިޔުން ކަމަށް ސޮފްވާން ބުނެފައިވެ އެވެ.
ރާއްޖޭގައި ބާއްވާ ޗެލެންޖު ކަޕުގެ ކުރިން ގައުމީ ޓީމަށް އިތުރު ބަދަލުތަކެއް ގެންނާނެ ކަމަށާއި, އެ މުބާރާތުގެ ކުރިން ގައުމީ ޓީމަށް ކުރިން ކުޅުނު, ލިބަރޯ، ފައިހާ މުހައްމަދު ވެސް ޓީމާ ގުޅޭނެ ކަމަށް ސޮފްވާން ވަނީ ބުނެފަ އެވެ.
