އެމެރިކާގެ އިންތިހާބުގައި ޑިމޮކްރެޓިކް ޕާޓީން ވާދަކުރައްވާ އެ ގައުމުގެ ނައިބު ރައީސް ކަމަލާ ހެރިސްގެ ރަނިންމޭޓަކަށް މިނިސޯޓާގެ ގަވަރުނަރު ޓިމް ވަލްޒް، 60، ހަމަޖައްސައިފި އެވެ.
ކަމަލާ ވަނީ ޓިމް ނައިބަކަށް ހަމަޖެއްސިކަން ހާމަކުރައްވައި، ފިލިޑޯފިއާގައި ބޭއްވި ކެމްޕޭން ރެލީގައި ޓިމްއާއެކު ބައިވެރިވެވަޑައިގެންފަ އެވެ.
"ޓިމްއަކީ ރަނގަޅު ޓްރެކް ރެކޯޑެއް އޮތް ބޭފުޅެއް. އޭނާ ވަނީ މިނިސޯޓާގެ އާއިލާތަކަށް ގިނަ ކަންކަން ހާސިލުކޮށްދީފައި. އޭނާގެ ސަބަބުން ކެމްޕެއިނަށް ކުރިއެރުންތަކެއް އަންނާނެ،" އެކްސްގައި ކުރެއްވި ޕޯސްޓެއްގައި ކަމަލާ ވިދާޅުވި އެވެ.
ނައިބުކަމުގެ މަގާމު ގަބޫލުކުރައްވައި ޓިމް "އެކްސް" ގައި ކުރެއްވި ޕޯސްޓެއްގައި ވިދާޅުވީ އިންތިހާބު ޑިމޮކްރެޓުންނަށް ކާމިޔާބުކޮށްދިނުމަށް ކުރެވެން އޮތް ހުރިހާ މަސައްކަތެއް ކުރާނެ ކަމަށާއި ލިބުނު ފުރުސަތާ މެދު ފަހުރުވެރިވާ ކަމަށެވެ.
އެމެރިކާގެ އާމީ ނެޝަނަލް ގާޑުގެ ވެޓަރަން ޓިމް ގަވަރުނަރު ކަމަށް 2022 ގައި އިންތިހާބުވީ އެމެރިކާގެ ހައުސް އޮފް ރިޕްރެޒެންޓޭޓިވްސްގައި 12 އަހަރު ހިދުމަތް ކުރެއްވުމަށްފަހު އެވެ.
އެމެރިކާގެ އިންތިހާބުގައި ޑިމޮކްރެޓުންގެ ފަރާތުން އެ ގައުމުގެ ރައީސް ޖޯ ބައިޑެން ވާދަކުރައްވާ ގޮތަށް އޮތް ނަމަވެސް، ފަހުން ވަނީ އެ ފުރުސަތު ދޫކޮށްލާފަ އެވެ. އެއާއެކު ޑިމޮކްރެޓުންގެ މެދުގައި ކުރެވުނު މަޝްވަރާތަކަށް ފަހު ލީޑާޝިޕްގައި ނެގުނު ވޯޓުން ކަމަލާއަށް ޓިކެޓު ދޭން ވަނީ ނިންމާފަ އެވެ.
އެމެރިކާގެ އިންތިހާބު އޮންނާނީ ނޮވެމްބަރު 5، ގަ އެވެ. އިންތިހާބުގައި ރިޕަބްލިކަންގެ ފަރާތުން ވާދަކުރައްވަނީ އެ ގައުމުގެ ކުރީގެ ރައީސް ޑޮނަލްޑް ޓްރަމްޕް އެވެ. އޭނާގެ ނައިބެއްގެ ގޮތުގައި ހަމަޖައްސާފައި ވަނީ ޖޭޑީ ވޭންސް އެވެ.
