ގާޒާގެ ދެކުނުގައި ހުންނަ ނާސިރު ހޮސްޕިޓަލަށް އިޒްރޭލުން ރޭގެ ވަގުތެއްގައި ދިން ވަރުގަދަ ހަމަލާއެއްގައި، ޑޮކްޓަރަކާއި ކުޑަކުއްޖަކު ހިމެނޭހެން މަދުވެގެން ހަ މީހަކު ޝަހީދުވެފައިވާ ކަމަށް ފަލަސްތީނުގެ އޮފިޝަލުން ބުނެފި އެވެ.
ގާޒާގެ ސިވިލް ޑިފެންސްގެ ތަރުޖަމާނު އިއްޒުއްދީން އަބޫ ސަބްހާ ވިދާޅުވި ގޮތުގައި، ބުދަ ދުވަހުގެ ރޭ ދިން މި ހަމަލާ އަމާޒުވީ ހޮސްޕިޓަލް ކޮމްޕްލެކްސްގެ ސާޖަރީ ޔުނިޓަށެވެ. މި ހަމަލާގައި ހޮސްޕިޓަލުގެ ބޮޑު ބައެއް ހަލާކުވެ، މުޅި ސަރަހައްދަށް ވަނީ ކުނިބުނިތައް ބުރައިގެން ގޮސްފައެވެ. މި ހަމަލާގައި ޝަހީދުވި މީހުންގެ ތެރޭގައި އުމުރުން 52 އަހަރުގެ ޑޮކްޓަރު ރިޒްގު އަބޫ ޝާއިރާ އާއި، އޮޕަރޭޝަނެއް ކުރުމަށް ތައްޔާރުވަމުންދިޔަ 13 އަހަރުގެ ފިރިހެން ކުއްޖަކު ހިމެނެއެވެ. މީގެ އިތުރުން 40 މީހަކަށް އެކިވަރުގެ އަނިޔާތައް ލިބިފައިވާއިރު، އޭގެ ތެރޭގައި ހާލު ސީރިއަސް ދެ ޑޮކްޓަރަކު ވެސް ހިމެނެއެވެ.
ގާޒާގެ ހެލްތު މިނިސްޓްރީގެ ޑައިރެކްޓަ ޖެނެރަލް ޑޮކްޓަރު މުނީރު އަލް ބުރުޝް ފޭސްބުކްގައި ލިޔުއްވާފައިވަނީ، ގާޒާގެ ރައްޔިތުން ދާނެ ތަނެއް މިހާރު ނެތް ކަމަށެވެ. ފޭލިގެތައް ފެންބޮޑުވެ، ފަރުބަދަތަކުން ގާ ފައިބައި ކުދިންގެ ގައިމައްޗަށް ވެއްޓެމުންދާއިރު، ހޮސްޕިޓަލްތަކުގެ އެތެރޭގައި ތިބޭ މީހުންނަށް އަމާޒުކޮށް ބޮން އަޅަމުންދާ ކަމަށް އޭނާ ވިދާޅުވިއެވެ. ޣައްޒާއިން ދުނިޔޭގެ ކިބައިން އެދެނީ މަރުވާ މީހުން ގުނުމުގެ ބަދަލުގައި، ދިރިތިބި މީހުންނަށް ރައްކާތެރިކަން ހޯދައިދިނުމަށް ކަމަށްވެސް އޭނާ އިތުރުކުރެއްވި އެވެ.
ހޮސްޕިޓަލް ތެރެއިން ލިބިފައިވާ ވީޑިއޯ ފުޓޭޖްތަކުން ފެންނަ ގޮތުގައި، އިޒްރޭލުން ވަނީ ދެ ބޮން އަޅާފައެވެ. އޭގެ ތެރެއިން އެއް ބޮން ގޮވާފައެއް ނުވެއެވެ. އެ ބޮމުގައިވާ ލޭބަލުން އެނގޭ ގޮތުގައި އެއީ އެމެރިކާގައި އުފައްދާފައިވާ 250 ޕައުންޑުގެ ޖީބީޔޫ-39/ބީ މަރުކާގެ ބޮމެކެވެ. މިއީ އެމެރިކާއިން އިސްރާއީލަށް ފޯރުކޮށްދެމުންދާ ހަތިޔާރުގެ ބާވަތެކެވެ.
އިޒްރޭލްގެ ޑިފެންސް ފޯސް އިން ނެރުނު ބަޔާނެއްގައި ބުނެފައިވަނީ، އެމީހުން އަމާޒުކުރީ ހަމާސްގެ ޚާން ޔޫނިސް ބްރިގޭޑްގެ ކޮމާންޑަރު މުހައްމަދު އަބޫ އިސްމާއީލާއި، ހޮސްޕިޓަލް ތެރޭގައި ފިލައިގެން ތިބި އިތުރު ހަނގުރާމަވެރިންނަށް ކަމަށެވެ. ނަމަވެސް މި ހަމަލާގައި އެ ކޮމާންޑަރު މަރުވިކަން ނުވަތަ ނޫންކަން އިސްރާއީލުން ކަށަވަރުކޮށްދީފައެއް ނުވެ އެވެ.
އެމެރިކާގެ މެދުވެރިކަމާއެކު މީގެ އަހަރެއްހާ ދުވަސް ކުރިން އެއްބަސްވެފައިވާ ސުލްހައިގެ މުއާހަދާއެއް އޮތް ނަމަވެސް، އިސްރާއީލުން ދަނީ ކޮންމެ ދުވަހަކު ކަހަލަ ގޮތަކަށް ގާޒާއަށް ހަމަލާދެމުންނެވެ. އދ. ގެ ތަފާސްހިސާބުތަކުން ދައްކާ ގޮތުގައި އެއްބަސްވުމަށްފަހު ވެސް އިސްރާއީލުން ވަނީ 1,400 އަށްވުރެ ގިނަ މީހުން ޝަހީދުކޮށްލާފަ އެވެ. މިހާރު ގާޒާގައި ފުރިހަމައަށް ހިދުމަތް ދެވޭ އެއްވެސް ހޮސްޕިޓަލެއް ނެތެވެ.
މި ހަމަލާއާ ގުޅިގެން، ގާޒާގެ ސުލްހައިގެ ކަންކަން ބަލަހައްޓާ ބޯޑް އޮފް ޕީސް އިން ވަނީ އިޒްރޭލާއި ހަމާސް އިން އާންމުން ރައްކާތެރިކުރުމަށް ވެފައިވާ އިގުރާރުތަކަށް އިހުތިރާމް ކުރުމަށް ގޮވާލާފަ އެވެ. މީގެ އިތުރުން، ގާޒާގައި ފެންބޮޑުވުމުގެ ސަބަބުން ހާލުގައި ޖެހިފައިވާ ދެ މިލިއަނެއްހާ މީހުންނަށް އެހީތެރިކަން ފޯރުކޮށްދިނުމަށް ބޭނުންވާ ސާމާނު އެތެރެކުރުމަށް އިސްރާއީލުން ހުރަސްއަޅަމުންދާ ކަމަށް ބުނެ އެ ބޯޑުން ވަނީ އިސްރާއީލަށް ފާޑުކިޔާފައެވެ. އިސްރާއީލުން ބުނަމުންދަނީ ޣައްޒާ އަލުން އާރާސްތުކުރުމުގެ މަސައްކަތް ފެށޭނީ ހަމާސްއިން ހަތިޔާރު ބެހެއްޓުމުން ކަމަށެވެ.
