އެމެރިކާގެ ރައީސް ޑޮނަލްޑް ޓްރަމްޕް އަންނަ ހަފުތާގައި ޗައިނާގެ ރައީސް ޝީ ޖިންޕިން އަދި ރަޝިޔާގެ ރައީސް ވްލަޑިމިއާ ޕުޓިންއާ އެކު ތާރީހީ ބައްދަލުވުމެއް ބޭއްވުމަށް ހަމަޖެހިފައިވާ ކަމަށް ވައިޓް ހައުސްއިން ހުކުރު ދުވަހު ހާމަކޮށްފި އެވެ. މިއީ މި ތިން ގައުމުގެ އިސްވެރިން އެކުގައި ބާއްވާ މިފަދަ ފުރަތަމަ ބައްދަލުވުމެވެ.
ޗައިނާގައި ބޭއްވުމަށް ހަމަޖެހިފައިވާ އޭޕެކް ސަމިޓުގެ ހަވާސާގައި ބާއްވާ މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރާނީ ނިއުކްލިއާ ހަތިޔާރު ފެތުރުން ހުއްޓުވުމާ ގުޅޭގޮތުންނެވެ. ދުނިޔޭގެ އެންމެ ބޮޑު ނިއުކްލިއާ ބާރުތަކުގެ މެދުގައި އާ އެއްބަސްވުމަކަށް އާދެވިދާނެ ކަމަށް ރައީސް ޓްރަމްޕް ގަބޫލު ކުރައްވާ ކަމަށް ވައިޓް ހައުސްއިން ބުނެއެވެ.
ވައިޓް ހައުސްގެ ތަރުޖަމާނު އޮލީވިއާ ވޭލްސް ނޫސްވެރިންނަށް މައުލޫމާތު ދެއްވަމުން ވިދާޅުވީ، ދުނިޔޭގައި ނިއުކްލިއާ ހަތިޔާރު މަދުކުރުމާ ގުޅޭގޮތުން ރައީސް ޓްރަމްޕް މަޝްވަރާ ކުރައްވާނެ ކަމަށެވެ. އަދި ނިއުކްލިއަރ ހަތިޔާރު އިތުރުވަމުން ދިއުމަކީ ވަރަށް ނުރައްކާތެރި ކަމެއްގެ ގޮތުގައި ރައީސް ޓްރަމްޕް ދެކިލައްވާ ކަމަށްވެސް އޭނާ ވިދާޅުވި އެވެ.
އެމެރިކާ އާއި ރަޝިއާއާ ދެމެދު އޮތް އެންމެ ފަހުގެ ނިއުކްލިއާ ހަތިޔާރުގެ އެއްބަސްވުން މިދިޔަ ފެބްރުއަރީ މަހު ވަނީ ހަމަވެފަ އެވެ. ހަމައެއާއެކު، ޗައިނާއިން ވެސް ދަނީ އެ ގައުމުގެ ނިއުކްލިއާ ހަތިޔާރުގެ މިންވަރު ވަރަށް ބާރަށް އިތުރުކުރަމުންނެވެ.
މި ބައްދަލުވުމުގައި ވަގުތުން އާ އެއްބަސްވުމަކަށް އާދެވިދާނެ ކަމުގެ އުންމީދު ކުޑަ ނަމަވެސް، މިއީ މުހިންމު ފެށުމެއްގެ ގޮތުގައި އެމެރިކާގެ އޮފިޝަލުން ސިފަކުރައްވަ އެވެ. އެމެރިކާގެ އިސް އޮފިޝަލަކު ވިދާޅުވީ، މި ބައްދަލުވުމުން ވަގުތުން އެއްބަސްވުމަކަށް އާދެވޭނެ ކަމަށް އުންމީދު ނުކުރާ ކަމަށާއި، ނަމަވެސް މިއީ މި ތިން ގައުމުގެ އިސްވެރިންގެ ފެންވަރުގައި ކުރެވޭ ފުރަތަމަ މަޝްވަރާ ކަމަށެވެ. އަދި މިއީ ކުރިއަށް އޮތް ތަނުގައި ބިނާކުރަނިވި ނަތީޖާއެއް ނެރެވިދާނެ މަޝްވަރާތަކެއްގެ ފެށުން ކަމަށްވެސް އޭނާ ވިދާޅުވި އެވެ.
ނިއުކްލިއާ ހަތިޔާރުގެ އިތުރުން، އީރާނުގެ މައްސަލައާ ގުޅޭގޮތުން ވެސް މި ތިން ގައުމުގެ ވެރިން މަޝްވަރާ ކުރެއްވުމަށް ވަނީ ހަމަޖެހިފަ އެވެ.
މި ދަތުރުގައި ޓްރަމްޕާއެކު މަޝްހޫރު މަހުޖަނު އީލޮން މަސްކް ވެސް ބައިވެރިވާނެ ކަމަށް ބެލެވޭ ކަމަށް އޮފިޝަލުން ބުނެއެވެ. ނަމަވެސް އޭނާ މި ތިން ގައުމުގެ އިސްވެރިންގެ ރަސްމީ ބައްދަލުވުމުގައި ބައިވެރިވުމަކީ އެކަށީގެންވާ ކަމެއް ނޫން ކަމަށްވެސް މައުލޫމާތު ލިބެ އެވެ.
މި ތާރީހީ ބައްދަލުވުމަކީ ދުނިޔޭގެ ސަލާމަތާއި ރައްކާތެރިކަމަށް، ޚާއްޞަކޮށް ނިއުކްލިއާ ހަތިޔާރުގެ ނުރައްކާ ކުޑަކުރުމަށް އެޅޭ މުހިންމު ފިޔަވަޅެއްގެ ގޮތުގައި ބައިނަލްއަގުވާމީ މުޖުތަމައުން ދަނީ ބަލަމުންނެވެ.
