އެމެރިކާގެ މަޝްހޫރު ޓެކްނޮލޮޖީ ކުންފުނި މައިކްރޯސޮފްޓްގެ ގިނަ ހިދުމަތްތަކަކަށް ބުރޫއަރައި، ދުނިޔޭގެ އެކި ކަންކޮޅުތަކުގައި ބޭނުންކުރާ ސިސްޓަމްތައް ހުއްޓުމަކަށް އައުމާ ގުޅިގެން އެ މައްސަލަ ހައްލުކުރުމަށް އެ ކުންފުނިން އަވަސް ފިޔަވަޅުތަކެއް އަޅަމުންދާ ކަމަށް ބުނެފި އެވެ.
މި މައްސަލައިގެ ސަބަބުން މައިކްރޯސޮފްޓްގެ ގިނަ ހިދުމަތްތަކެއް މެދުކެނޑިފައިވާއިރު، މިއީ އެ ކުންފުނީގެ އިންފްރާސްޓްރަކްޗާއަށް ނުކަތާވަރަށް ބާރުބޮޑުވުމުގެ ސަބަބުން ދިމާވި ކަމެއް ކަމަށް ބުނެފައިވެ އެވެ.
މިއަދު މައިކްރޯސޮފްޓުން ނެރުނު ބަޔާނެއްގައި ބުނެފައިވަނީ ބައެއް ސަރަހައްދުތަކުގައި ހިދުމަތްތައް އަލުން އިއާދަކުރެވިފައިވީ ނަމަވެސް، މުޅިން އެއްކޮށް މައްސަލަ ހައްލުވެފައި ނުވާ ކަމަށެވެ. އަދި ސިސްޓަމްތައް ފުރިހަމައަށް ހަމައަކަށް އެޅުވުމަށް އިތުރު ފިޔަވަޅުތަކެއް އަޅަމުންދާ ކަމަށްވެސް އެ ކުންފުނިން ބުނެފައިވެ އެވެ.
މިއީ ވަރަށް ސީރިއަސް މައްސަލައެއްގެ ގޮތުގައި ބަލައި، ހިދުމަތްތައް އާންމު ހާލަތަށް ގެނައުމަށް އަވަސް ފިޔަވަޅުތަކެއް މައިކްރޯސޮފްޓުން ދަނީ އަޅަމުންނެވެ.
މި މައްސަލަ ފެށިގެން އައީ ބުރާސްފަތި ދުވަހުގެ މެންދުރުފަހުގެ ވަގުތެއްގައެވެ. ހިދުމަތްތަކަށް ބުރޫއަރާ މިންވަރު ބަލާ ސައިޓެއް ކަމަށްވާ ޑައުންޑިޓެކްޓާއަށް ލިބުނު ރިޕޯޓްތަކަށް ބަލާއިރު، މައިކްރޯސޮފްޓްގެ އީމެއިލް ހިދުމަތް ކަމަށްވާ އައުޓްލުކް ބޭނުންކުރުމުގައި އެއްލައްކަ ތިރީސް ހާހަށްވުރެ ގިނަ މީހުންނަށް ވަނީ ދަތިތަކާ ކުރިމަތިވެފައެވެ. އައުޓްލުކްގެ އިތުރުން މަސައްކަތުގެ މާހައުލުގައި ބޭނުންކުރާ ޓީމްސް، އޭއައި އެސިސްޓަންޓް ކޯޕައިލެޓް އަދި މައިކްރޯސޮފްޓް 365 ގެ އެހެނިހެން ހިދުމަތްތަކަށްވެސް ވަނީ ބޮޑެތި ބުރޫތަކެއް އަރާފައެވެ. މައިކްރޯސޮފްޓުން ބުނި ގޮތުގައި މި މައްސަލައިގެ އަސަރު ދުނިޔޭގެ ކޮންމެ ސަރަހައްދެއްގައި ހުރި ބޭނުންކުރާ މީހަކަށްވެސް ފޯރުމަކީ އެކަށީގެންވާ ކަމެކެވެ.
ސޯޝަލް މީޑިއާގައި މައިކްރޯސޮފްޓުން ހާމަކުރި ގޮތުގައި، ބައެއް ސާވަރުތައް މުޅިން ހުއްޓިފައިވާއިރު، އޮޓޮމެޓިކް ހެލްތު ޗެކްތަކުންވެސް އެ ސާވަރުތައް ވަނީ ފޭލްވެފަ އެވެ. މީގެ ސަބަބުން މިހާރު މަސައްކަތްކުރާ ސާވަރުތަކަށް ވަނީ ނުކަތާވަރަށް ބާރުބޮޑުވެފަ އެވެ. މިކަން ހައްލުކުރުމަށްޓަކައި ޓްރެފިކް ބަހާލުމުގެ އައު އިންތިޒާމުތަކެއް ޓެސްޓުކުރަމުންދާ ކަމަށާއި، ހުއްޓިފައިވާ ހިދުމަތްތައް އަލުން ރީސްޓާޓް ކުރަމުންދާ ކަމަށްވެސް އެ ކުންފުނިން ބުނެފައިވެއެވެ.
ނަމަވެސް ހުކުރު ދުވަހު އޭޝިއާ އަދި އޮސްޓްރޭލިއާ ސަރަހައްދުން ލިބުނު ރިޕޯޓްތަކަށް ބަލާއިރު، މައްސަލަ ހައްލުކުރުމަށް ކުރާ މަސައްކަތްތައް ކުރިއަށްދަނީ އުންމީދުކުރި ވަރަށްވުރެ ލަހުންނެވެ.
