ޖިންސީ ކުށްވެރިޔާ ޖެފްރީ އެޕްސްޓީންއާ ގުޅޭގޮތުން ކުރިއަށްދާ ތަހުގީގަށް ހާޒިރުވުމަށް ފޮނުވި އަމުރަށް ނުކިޔަމަންތެރިވުމުން، ބިލިއަނަރު ލިއޯން ބްލެކް "ކޮންޓެމްޕްޓް އޮފް ކޮންގްރެސް" ނުވަތަ މަޖިލީހުގެ އިހުތިރާމް ކުޑަކުރި ކަމަށް އެމެރިކާގެ ހައުސް އޮފް ރެޕްރެޒެންޓޭޓިވްސް އިން ނިންމައިފި އެވެ.
އެޕްސްޓީންއާ ވިޔަފާރީގެ ގުޅުން އޮންނަ ބްލެކް، މި މަހުގެ ކުރީކޮޅު ހައުސް އޯވަސައިޓް ކޮމިޓީއަށް ހާޒިރުވުމަށާއި އެޕްސްޓީންއާ ގުޅޭ ލިޔެކިޔުންތައް ހިއްސާކުރުމަށް ނެރުނު ސަބްޕީނާ ނުވަތަ އަމުރަށް އޭނާ އަމަލުކޮށްފައެއް ނުވެ އެވެ.
މި އަމުރާ ގުޅިގެން ދައުވާ އުފުލާފައިވާ ބްލެކްގެ ވަކީލުން ވަނީ، އޭނާގެ މައްޗަށް މަޖިލީހުގެ އިހުތިރާމް ކުޑަކުރި ކަމަށް ނިންމި ނިންމުމަކީ "ބަލައިގަނެވޭނެ ކަމެއް ނޫން" ކަމަށް ބުނެފަ އެވެ.
ބްލެކްގެ މައްޗަށް މަޖިލީހުގެ އިހުތިރާމް ކުޑަކުރި ކަމުގެ ގަރާރު ފާސްކުރުމަށްފަހު، އޯވަސައިޓް ކޮމިޓީގެ މުގައްރިރު ޖޭމްސް ކޯމާ ވިދާޅުވީ، ގާނޫނަށްވުރެ މަތީގައި އެއްވެސް މީހަކަށް ނުހުރެވޭނެ ކަމަށެވެ. އަދި އެމެރިކާގެ ރައްޔިތުންނަށް ކަންކަން ސާފުކޮށްދިނުމަށާއި، މި ހާދިސާތަކުން ސަލާމަތްވި ފަރާތްތަކަށް އިންސާފު ހޯދައިދިނުމަށް ކުރާ މަސައްކަތް ހުއްޓާނުލާނެ ކަމަށް އޭނާ ވިދާޅުވި އެވެ.
އެމެރިކާގެ މީޑިއާތަކާ ހިއްސާކުރި ބަޔާނެއްގައި ބްލެކްގެ ވަކީލުން ބުނީ، މަޖިލީހުގެ މި ނިންމުމަކީ ބްލެކްއާ ގުޅޭ ހަގީގަތްތަކަށް ބެލުމެއް ނެތި ނިންމާފައިވާ "ހަރުކަށި" ނިންމުމެއް ކަމަށެވެ.
ވަކީލުން އިތުރަށް ބުނި ގޮތުގައި، ކޮމިޓީގެ ނިންމުންތަކުގެ ގާނޫނީ ސައްހަކަމާ މެދު ކޯޓުގައި މައްސަލަ ހިނގަމުންދަނިކޮށް އަދި މުގައްރިރު ކޯމާއާ ދެކޮޅަށް ހުށަހަޅާފައިވާ ސުލޫކީ މައްސަލައަށް ބެލުމެއް ނެތި، މަޖިލީހުން އޭނާގެ މައްޗަށް މިފަދަ ނިންމުމެއް ނިންމީ އެއްވެސް އުސޫލެއް ނެތި ކަމަށެވެ.
މަޖިލީހުގެ ހުރިހާ މެންބަރުންގެ އިއްތިފާގުން ފާސްކުރި މި ގަރާރާއެކު، މި މައްސަލަ ދެން ފޮނުވޭނީ އެމެރިކާގެ ޖަސްޓިސް ޑިޕާޓްމަންޓަށެވެ. ބްލެކްގެ މައްޗަށް ޖިނާއީ ދައުވާ އުފުލުމާ މެދު ގޮތެއް ނިންމާނީ އެ އިދާރާއިންނެވެ.
ކޮމިޓީގައި ހިމެނޭ ޑިމޮކްރެޓިކް ޕާޓީގެ އެންމެ އިސް މެންބަރު، ކޮންގްރެސްމަން ރޮބާޓް ގާސިއާ ނެރުއްވި ބަޔާނެއްގައި ވިދާޅުވީ، މި ވޯޓަކީ އިންސާފު ގާއިމުކުރުމަށާއި ޒިންމާދާރުކުރުވުމަށް އެޅުނު މުހިންމު ފިޔަވަޅެއް ކަމަށެވެ.
އޭނާ ވިދާޅުވީ، މި ބިރުވެރި ޖަރީމާތަކުގެ ޒިންމާ އުފުލަންޖެހޭ ފަރާތްތައް ޖަވާބުދާރީ ކުރުވުމަށް ކުރާ މަސައްކަތުގައި، އަނިޔާ ލިބުނު ފަރާތްތަކުގެ ހައްގުތަކަށް އިސްކަންދޭނެ ކަމަށެވެ.
ޕްރައިވެޓް އިކުއިޓީގެ ދާއިރާގައި ނުފޫޒުގަދަ މި މަހުޖަނު، މިދިޔަ ޖޫން މަހު އޯވަސައިޓް ކޮމިޓީއަށް ބަޔާންދެމުން ގޮސް، ބައްދަލުވުމުން ނުކުމެފައިވަނީ، އޭނާ ސޮއިކޮށްފައިވާ ސިއްރު ހިފެހެއްޓުމުގެ އެއްބަސްވުންތަކާ (އެންޑީއޭ) ބެހޭގޮތުން ސުވާލުކުރުމުން ކަމަށް އޭރު މެންބަރުން ވިދާޅުވެފައިވެ އެވެ.
އެޕްސްޓީންއާ އޮތް ގުޅުމުގެ ސަބަބުން ކުރިމަތިވި ފާޑުކިޔުންތަކާ ގުޅިގެން، 2021 ވަނަ އަހަރު ބްލެކް ވަނީ އޭނާ އުފެއްދި "އެޕޯލޯ ގްލޯބަލް މެނޭޖްމަންޓް" ކުންފުނިން ވަކިވެފަ އެވެ. ނަމަވެސް، އެޕްސްޓީންއާ އެކު ކުރި މުއާމަލާތްތަކުގައި އެއްވެސް ގޯސް ކަމެއް ކޮށްފައި ނުވާނެ ކަމަށް އޭނާ ތަކުރާރުކޮށް ބުނެފައިވެ އެވެ.
ބްލެކްގެ މައްޗަށް ނެރުނު އަމުރުތަކުގައި، އޭނާ ސޮއިކޮށްފައިވާ ސިއްރު ހިފެހެއްޓުމުގެ އެއްބަސްވުންތައް ހިއްސާކުރުމަށާއި، ހުވާގެ މަތީގައި ކެމެރާގެ ކުރިމަތީގައި ބަޔާން ދިނުމަށް އަމުރުކޮށްފައިވަނީ ޖޫން މަހުގެ ކޮމިޓީ ބައްދަލުވުން ދޫކޮށް އޭނާ ދިޔުމާ ގުޅިގެންނެވެ.
ބްލެކް ބުނެފައިވާ ގޮތުގައި އޭނާ އެޕްސްޓީން ވަޒީފާއަށް ނެގީ މުއްސަނދިކަން ބަލަހައްޓާ އެޑްވައިޒަރެއްގެ ގޮތުގަ އެވެ. އަދި ޖޫން މަހު މެންބަރުންނަށް މައުލޫމާތު ދެމުން އޭނާ ބުނީ، އެޕްސްޓީންއަށް 158 މިލިއަން ޑޮލަރު ދީފައިވަނީ ގާނޫނީ ގޮތުން ސައްހަ ބޭނުންތަކަކަށް ކަމަށެވެ.
މި ބިލިއަނަރު ބުނާ ގޮތުގައި، ޖުލައި 2019 ގައި އިންސާނީ ވަގުފާރީގެ ދައުވާ އެޕްސްޓީންގެ މައްޗަށް އުފުލުމާ ހަމައަށް، އޭނާ ކުރަމުންދިޔަ ޖިނާއީ ކުށްތަކުގެ އެއްވެސް މައުލޫމާތެއް އެނގިފައެއް ނުވެ އެވެ.
