ކުރީގެ ރައީސް އަބްދުﷲ ޔާމީންގެ ސަރުކާރުގައި، މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރު، އަބްދުﷲ މައުމޫނު ރާއްޖެ އައުމުން އޭނާ ފުރުން މަނާކޮށް، އޭނާގެ މައްޗަށް ތުހުމަތު ކުރެވިފައި އޮތް މަނީ ލޯންޑެރިންގެ މައްސަލަ ފުލުހުން ތަހުގީގު ކުރަން ފަށައިފި އެވެ.
މޯލްޑިވްސް ޕޮލިސް ސާވިސްގެ އެސިސްޓެންޓު ކޮމިޝަނަރު އަހުމަދު ޝިފާން "އަދަދު" ނޫހަށް ވިދާޅުވީ އޭނާގެ މައްޗަށް ދައުވާކޮށްފައިވާ ހިޔާނާތުގެ މައްސަލައިގައި ހިމެނޭ މަނީ ލޯންޑެރިންގެ މައްސަލަ ޕޮލިސް ސާވިސްއަށް ހުށަހަޅާފައިވާ ކަމަށެވެ. އެ މައްސަލައިގައި އޭނާ ހާޒިރު ކުރަން އިންޓަޕޯލް ރެޑް ނޯޓިސް ނެރުނެވެ.
"[އެހެންވެ] މައުމޫނު މާލެ އައިސްފައިވާތީ ފުރުން މަނާކޮށް އެ މައްސަލަ ދަނީ ބަލަމުން،" ޝިފާނު ވިދާޅުވި އެވެ.
މޯލްޑިވް ގޭސްގެ މެނޭޖިން ޑިރެކްޓަރަކަށް މައުމޫން ހުންނެވި ދުވަސްވަރު ބޭރުގެ ކުންފުންޏަކުން ކައްކާ ގޭސް ހޯދުމުގެ މުއާމަލާތުގެ ތެރޭގައި، 3.1 މިލިއަން ރުފިޔާ ނަގާފައިވާ ކަމަށް ތުހުމަތު ކުރެ އެވެ. އެ ފައިސާ އޭނާއާ ގުޅުން އޮންނަ ކަމަށް ތުހުމަތު ކުރެވޭ އަދި އޭނާގެ އާއިލީ ބައެއް ފަރާތްތަކާއި ގުޅުން އޮންނަކަމަށް ތުހުމަތުކުރެވޭ ބައެއް ކުންފުނިތަކަށް ޖަމާކޮށްފައިވާ ކަމަށް އޭސީސީން ބުނެފައިވެ އެވެ.
އެ މައްސަލައިގައި އޭނާގެ މައްޗަށް ހަތް ދައުވާއެއް ކޮށްދިނުމަށް އޭސީސީން އެދިފައިވެ އެވެ. އެއީ،
- ދައުލަތުން ކުރާ ކަމަކާ ގުޅިގެން ރިޝްވަތު ހިފުމުގެ ކުށުގެ ދައުވާ
- މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުމުގެ ކުށުގެ ދައުވާ
- ކުށެއް ކުރަން އުޅުމުގެ ކުށުގެ ދައުވާ
- ކުށެއް ކުރަން އެދުމުގެ ދައުވާ
- ކުށެއް ކުރުމަށް ރޭވުމުގެ ދައުވާ
- ރިޝްވަތު ގަބޫލުކުރުމުގެ ކުށުގެ ދައުވާ
- ރަސްމީ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން މަންފާ ހޯދުމާއި ހޯދައިދިނުމުގެ ދައުވާ
އެ 3.1 މިލިއަން ރުފިޔާ އަނބުރާ ހޯދުމަށް ވެސް އޭސީސީން ވަނީ ނިންމައިފަ އެވެ.
ހިޔާނާތުގެ އެ މައްސަލަ ޕީޖީން ވަނީ ކޯޓަށް ފޮނުވައިފަ އެވެ. އެ މައްސަލައިގެ އެޑުއެހުމެއް ޖޫން މަހު ތާވަލް ކުރި އެވެ. ނަމަވެސް އެ އަޑުއެހުން ކެންސަލް ކުރި އެވެ.
މައުމޫނުގެ މައްސަލަ އޭސީސީން ޕީޖީއަށް ފޮނުވިއިރު، އޭނާ އުޅެމުން ދިޔައީ ރާއްޖޭން ބޭރުގަ އެވެ. ޔާމީންގެ ވެރިކަން ނިމުމާއެކު ރާއްޖޭން ބޭރަށް ބަދަލުވި ގޮތަށް، އެނބުރި ރާއްޖެ އައީ ދާދި ފަހުންނެވެ.
