މާލޭގައި ބިދޭސީންގެ ދެބައެއްގެ ދެމެދުގައި ހިންގި މާރާމާރީއެއްގައި ދެ މީހަކަށް ހާނީއްކަވެފައިވާ ކަމަށް ފުލުހުން ބުނެފި އެވެ.
އެ މާރާމާރީ ހިންގާފައި ވަނީ ރޭ ހެންވޭރު އަސްރަފީ މަގުގައި ކަމަށް ފުލުުހުން ބުންޏެވެ. އެ މާރާމާރީގައި އަނިޔާވި ދެމީހުންނަށް އައިޖީއެމްއެޗުގައި ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށް ވެސް ފުލުހުން ބުންޏެވެ.
އެ މާރާމާރީގެ ވީޑިއޯއެއް ސޯޝަލް މީޑިއާގައި އާންމުވެފައިވާއިރު، ލަކުޑި ފަތިބުރި ފަދަ އާލާތްތައް ހިފައިގެން އެއް ބަޔަކު އަނެއް ބަޔަކަށް ހަމަލާދޭ މަންޒަރު އެ ވީޑިއޯއިން ފެނެ އެވެ.
ވީޑިއޯއިން ފެންނަ ގޮތުން އެ މާރާމާރީ ހިންގާފައި ވަނީ ބިދޭސީންގެ ދެ ގުރޫޕެއްގެ ދެމެދުގައި ކަމަށް ބެލެވެ އެވެ.
އެ މައްސަލަ ރޭ 12:33 ހާއިރު ފުލުހުންނަށް ރިޕޯޓު ކޮށްފައިވާ ކަމަށް ފުލުހުން ބުންޏެވެ. މާރާމާރީ އާ ގުޅިގެން ފަސް މީހަކު ފުލުހުން ރޭ ހައްޔަރު ކުރި އެވެ.
ނަމަވެސް އެ އެންމެން ވެސް މިހާރު ދޫކޮށްލާފައިވާ ކަމަށް މީޑިއާތަކަށް ފުލުހުން ފޮނުވި މެސެޖުގައި ބުނެފައިވެ އެވެ.
ފުލުހުން ގެންދަނީ އެ މައްސަލަ އިތުރަށް ތަހުގީގު ކުރަމުންނެވެ.
