މާރާމާރީއެއްގެ މައްސަލައެއްގައި މަޝްހޫރު ވޮލީ ކުޅުންތެރިން ކަމަށްވާ އަހްމަދު ފައިރޫޒް އާއި އަހްމަދު ފާޒިލް އާއި އިތުރު މީހަކު މިދިޔަ ބުރާސްފަތި ދުވަހު ވ. ކެޔޮދޫއިން ހައްޔަރުކޮށްފި އެވެ.
ފުލުހުން ބުނީ މި މާރާމާރީގައި 58 އަހަރުގެ ދިވެހި ފިރިހެނަކަށް އަނިޔާވެގެން ކެޔޮދޫ ސިއްހީ މަރުކަޒުގައި ފަަރުވާ ދިނުމަށްފަހު މިހާރު ދޫކޮށްލާފައިވާ ކަމަށެވެ.
މި މައްސަލައާ ގުޅިގެން ދެބެއިން ކަމަށްވާ ފައިރޫޒް އާއި ފާޒިލްގެ އިތުރުން ދެން ހައްޔަރުކުރީ މުހައްމަދުފުޅު ނަމަކަށް ކިޔާ މީހެކެވެ. އޭގެ ތެރެއިން ދެ މީހެއްގެ ބަންދަށް ފަސް ދުވަސް ޖަހާފައިވާއިރު، އަނެކަކުގެ ބަންދަށް ޖަހާފައިވަނީ ތިން ދުވަހެވެ.
އަދަދު އަށް އެނގިފައިވާ ގޮތުގައި ކެޔޮދޫ ކެފޭއެއް ކައިރީގައި ހިނގި މި މާރާމާރީގައި ފައިރޫޒް އާއި ފާޒިލް އަދި މުހައްމަދުފުޅު ވަނީ 58 އަހަރުގެ މީހާ ބިންމައްޗަށް ވައްޓާލައި އަނިޔާކޮށްފަ އެވެ.
ހައްޔަރުކުރި މީހުންގެ ތެރެއިން ފައިރޫޒްއަކީ ގައުމީ ވޮލީ ޓީމުގައި ހިމެނި ފުލް ޓީމަށް ކުޅޭ ކުޅުންތެރިޔެކެވެ. އޭގެއިތުރުން އޭނާއަކީ ސަރުކާރު ހިންގާ ޕީއެންސީގެ ކެޔޮދޫ ދާއިރާގެ ޒުވާނުންގެ ރައީސް އެވެ.
މިކަމާ ގުޅިގެން ފައިރޫޒްއަށް ވޮލީ ގައުމީ ޓީމުން އެއްވެސް ފިޔަވަޅެއް އެޅިކަމެއް މިހާތަނަށް ސާފެއް ނުވެ އެވެ. ނަމަވެސް އޭނާގެ މައްސަލަ ޓީމުން ބަލާނެ ކަމަށް ބެލެވެ އެވެ.
މައްސަލައާ ގުޅިގެން ހައްޔަރުކުރި ފާޒިލްއަކީ މީގެކުރިން ގައުމީ ވޮލީ ޓީމުގައި ހިމެނިގެން ކުޅެފައިވާ ކުޅުންތެރިޔަކަށްވާއިރު، އޭނާ އަންނަނީ ނެޝަނަލް ލެވެލްގައި އަދިވެސް ކުޅެމުންކަން ފާހަގަކުރެވެ އެވެ.
