ކޮންސްޓްރަކްޝަން މިނިސްޓްރީންގެ ބެލުމުގެ ދަށުން ހިންގާ ޕަބްލިކް ސާވިސް އިން ގެންގުޅުނު ބޭބީ ޑްރެޖާ، އެމްޑީޕީއިން 2018 ގައި ވެރިކަމާ ހަވާލުވިއިރުވެސް އޮތީ ރިޕެއާ ނުކޮށް ހަލާކުވެފައި ކަމަށް ވިދާޅުވެ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ކޮންސްޓްރަކްޝަން މިނިސްޓަރު އަބްދުﷲ މުއްތަލިބަށް ރައްދު ދެއްވައިފި އެވެ.
ސޯޝަލް މީޑިއާގައި އަކްރަމް ޕޯސްޓު ކުރެއްވީ މަޖިލީހަށް ހާޒިރުކޮށް ސުވާލުކުރުމުން، ޕަބްލިކް ސާވިސް އިން ފަޅު ފުންކުރުމަށް ގެންގުޅުނު މެޝިނަރީޒް މި ސަރުކާރުން ހަވާލުވިއިރު ހަލާކުވެފައިވާ ކަމަށް މުއްތަލިބު ވިދާޅުވި ކްލިޕެވެ.
"އެ ހުރިހާ އެއްޗެއް ނުވެސް ނެތް. އަޅުގަނޑުމެން ގެންގުޅުނު ބޭބީ ޑްރެޖާ އެބައޮތް މިހާރުވެސް ތިލަފުށީގަ ބާ ދަގަނޑަށް ވެފަ. ލޭންޑިން ކްރާފްޓުތަކާ އެއްޗެއްހި ވިއްކާލާފަ ހުރީ. އެކްސްކަވޭޓަރުތަކާ އެއްޗެހި ހަލާކުވެފަ ހުރީ،" މިނިސްޓަރު މަޖިލީހުގައި ވިދާޅުވި އެވެ.
ނަމަވެސް, އަކްރަމް ވަނީ މުއްތަލިބުގެ ވާހަކަތައް ދޮގުކުރައްވާ، 2018 ގައި އެމްޑީޕީން ވެރިކަމާ ހަވާލުވިއިރުވެސް ޑްރެޖަރު އޮތީ ރިޕެއާ ނުކުރެވި ހަލާކުވެފައި ކަމަށެވެ.
އެގޮތުން, ރައީސް ޑރ. މުހައްމަދު މުއިއްޒު ހައުސިން މިނިސްޓަރުކަން ކުރެއްވިއިރު އެ ޑްރެޖަރު މަރާމަތު ކުރަން މިފްކޯ މެދުވެރިކޮށް އަމިއްލަ ކުންފުންޏަކާ ހަވާލުކުރި ނަމަވެސް އެ މަސައްކަތް ކުރި ކަމުގެ ލިޔެކިޔުމެއް ނެތް ކަމަށް އޭނާ އެކްސްގައި ލިޔުއްވާފައިވެ އެވެ.
"މިއީ 2018 ގައި އެމްޑީޕީ ސަރުކާރާ ހަވާލުވިއިރު ރަށްރަށުގެ ވަލުތެރެއައް އުކާލާފައި ހުރި ބައއް މެޝިނަރީސް ތަކުގެ ފޮޓޯ" މިހެން ލިޔުއްވާ އަކްރަމް ހިއްސާކުރެއްވި ފޮޓޯއެއް
"މުއިއްޒުގެ މިނިސްޓަރު ކަމުގައި އުފެއްދި ރޯޑް ކޯޕަރޭޝަން އަށް ޕަބަލިކް ވޯކްސް ގައި ހުރި ތި މެޝިނަރީ ތައް ބަދަލުކުރި ހަމަ މުއިއްޒު ގެ ދައުރުގައި އެތަން އުވާލުމަށްފަހު އަލުން ޕަބްލިކްވާރކްސް އުފައްދަ މަސައްކަތް ކުރަން ފެށި 2018 ގައި އެމްޑީޕީ ސަރުކާރު އައިސް އޭ ގެ ތިން މަސްފަހުން ރަށްރަށަށް މިނިސްޓްރީ މުވައްޒަފުން ޒިޔާރަތް ކުރަމުން ދިޔަދިޔުމުގައި މުވައްޒަފުންނަށް ފާހަގަވީ ރައްރަށުގައި ވަލުތެރެއަށް އުކާލަފައި ހުރި މެޝިނަރީތައް،" އަކްރަމް ލިޔުއްވާފައިވެ އެވެ.
އަދި, އެފަދައިން ހުރި ތަކެތި މަރާމާތު ކުރުމަށް އެމްޓީސީސީ އަދި އާރުޑީސީއާ ހަވާލުކުރި ކަމަށްވެސް އޭނާ ވިދާޅުވި އެވެ.
ޕަބްލިކް ވޯކްސްގެ މެޝިނަރީތައް ހަލާކުވި ގޮތް ހޯދުމަށް އެމްޑީޕީގެ ވެރިކަމުގައި އޮޑިޓެއް ކުރިއިރު އެ ތަކެތީގެ އިންވެންޓަރީ ބެލެހެއްޓިފައި ނެތްކަން ފާހަގަވި ކަމަށާއި ފިނޭންސުން ހޯދި ލިސްޓަކަށް ބަލައިގެން އިތުރަށް ބެލުމުން "ވަލުތެރެއަށް އުކާލާފައި ހުރި" މެޝިނަރީޒް ފެނިފައިވާ ކަމަށްވެސް އަކްރަމް ވިދާޅުވި އެވެ.
"މި މެޝިނަރީސް ތަކާ ބެހޭ ވަރަށް ތަފްސީލީ ރިޕޯޓް އެއްވެސް އެކުލަވާލިން. މި ރިޕޯޓް ރައީސް އޮފީސް އަށާއި ފިނޭންސް މިނިސްޓްރީ އަށް ފޮނުވުނު، ވީމާ މިނިސްޓްރީ ގައި މި ރިޕޯޓް އޮންނަންވާނެ. އެ ރިޕޯޓް ބައްލަވާލައްވާ."
އެ ތަކެތީގެ ފޮޓޯތައްވެސް އަކްރަމް ވަނީ ހިއްސާކުރައްވާފަ އެވެ. އަދި މިފަދަ ދޮގު މައުލޫމާތު މަޖިލިސް މެންބަރުންނަށް ދެއްވީތީ އެކަމާ މާފަށް އެދެން ޖެހޭ ކަމަށްވެސް އަކްރަމް ވަނީ ލިޔުއްވާފަ އެވެ.
