ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށް ގެންދިޔަ މަޝްރޫއުތަކުގެ ތެރެއިން އަމަލީ މަސައްކަތް ފަށާފައިވާ އެއްވެސް މަޝްރޫއެއް ހުއްޓައިލަން އަންގާފައި ނުވާނެ ކަމަށް ވިދާޅުވެ، ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ދޮގުހައްދަވައިފި އެވެ.
މި އަހަރުގެ ބަޖެޓުގައި ހިމެނޭ މަޝްރޫއުތައް ރީ-ޕްރިއޮރަޓައިޒް ކުރުމަށް ކަމަށް ބުނެ އެމްޓީސީސީއިން ހިންގާ 60 މަޝްރޫއެއް ވަގުތީގޮތުން މަޑުޖައްސާލަން އެންގީ މިއަދު އެވެ. އޭގެ ތެރޭގައި "އޮންގޮއިން" ނުވަތަ ހިނގަމުންދާ މަޝްރޫއުތަކުގެ ގޮތުގައި 17 މަޝްރޫއެއް ހިމަނާފައިވެ އެވެ.
އެކަމާ ގުޅިގެން މިނިސްޓަރު މިރޭ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އަމަލީ މަސައްކަތް ފަށާފައިވާ އެއްވެސް މަޝްރޫއެއް މަޑުޖައްސާލަން ނިންމާފައި ނުވާ ކަމަށެވެ. އަދި، އެހެން މަޝްރޫއުތައް މަޑުޖައްސާލީ މަޝްރޫއުތައް ކުރިއަށް ގެންދަން ބޭނުންވާ މިންވަރަށް ފާސްކޮށްފައިވާ 2024 ގެ ބަޖެޓުގައި ފައިސާ ހިމަނާފައިނުވުން ކަމަށްވެސް އޭނާ ވިދާޅުވި އެވެ.
ނަމަވެސް، މިނިސްޓްރީން މަޑުޖައްސާލަން އެންގި މަޝްރޫއުތަކުގެ ލިސްޓު "އަދަދު" އަށް ވަނީ ލިބިފަ އެވެ. އޭގެ ތެރެއިން ހިނގަމުންދާ މަޝްރޫއުތަކުގެ ތެރެއިން ހަތް މަޝްރޫއެއްގެ އަމަލީ މަސައްކަތް ފެންނަ ޕޯސްޓުތައް އެ ކުންފުނީގެ ރަސްމީ އެކްސް ހޭންޑަލުގައިވެސް އެބަހުއްޓެވެ.
އަމަލީ މަސައްކަތް ފަށާފައިވާ ކަމަށް ލިސްޓުގައިވާ މަޝްރޫއުތައް
- ބ. ހިތާދޫ ގޮނޑުދޮށް ހިމާޔަތް ކުރުން
- ގއ. ކޮލަމާފުށީ ބިން ހިއްކުން (އެމްޓީސީސީއިން ޕޯސްޓުކޮށްފައިވޭ)
- ހއ. ދިއްދޫ ބިން ހިއްކުން (އެމްޓީސީސީއިން ޕޯސްޓުކޮށްފައިވޭ)
- ހއ. އިހަވަންދޫ ގޮނޑުދޮށް ހިމާޔަތްކުރުން
- ހދ. ފިނޭ ބަނދަރު ތަރައްގީކުރުން (އެމްޓީސީސީއިން ޕޯސްޓުކޮށްފައިވޭ)
- ހދ. ކުޅުދުއްފުށި ޖެޓީ ތަރައްގީކުރުން
- ލ. ގަން ގޮނޑުދޮށް ހިމާޔަތްކުރުން
- ނ. ހޮޅުދޫ ގޮނޑުދޮށް ހިމާޔަތ ކުރުން (އެމްޓީސީސީއިން ޕޯސްޓުކޮށްފައިވޭ)
- ނ. ކެނދިކުޅުދޫ ދޯނި އެހެލާ ސަރަހައްދު ތަރައްގީކުރުން (އެމްޓީސީސީއިން ޕޯސްޓުކޮށްފައިވޭ)
- ރ. ރަސްމާދޫ ދެކުނު ފަޅީގެ ގޮނޑުދޮށް ހިމާޔަތްކުރުން
- ރ، ވާދޫ ގޮނޑުދޮށް ހިމާޔަތްކުރުން
- ސ. ފޭދޫ ބަނދަރު ތަރައްގީކުރުން
- ސ. ހުޅުދޫގައި ވިޒިޓާސް ސެންޓަރެއް ތަރައްގީކުރުން
- ށ. ކޮމަންޑޫ ބްރޭކްވޯޓާ
- ށ. ނަރުދޫ ބަނދަރު ތަރައްގީކުރުން (އެމްޓީސީސީއިން ޕޯސްޓުކޮށްފައިވޭ)
- ތ. ބުރުނި ބަނދަރު ތަރައްގީކުރުން
- ވ. ތިނަދޫ ބަނދަރު ތަރައްގީކުރުން (އެމްޓީސީސީއިން ޕޯސްޓުކޮށްފައިވޭ)
މަޝްރޫއުތައް މަޑުޖައްސައިލަން ސަރުކާރުން ނިންމާފައި މިވަނީ، ރާއްޖޭގެ މާލީ ހާލަތު ގޯސްވެ ހަރަދުކުޑަކުރުމަށް ގިނަ ފިަޔަވަޅުތަކެއް އަޅަން ނިންމާފައިވަނިކޮށެވެ.
އަމަލީ މަސައްކަތް ފެށިފައިވާ މަޝްރޫއުއެއް ހުއްޓައިނުލައްވާނެ ކަމަށް ރައީސް ޑރ. މުހައްމަދު ރިޔާސީ ކެމްޕޭނުގައި ވިދާޅުވި އެވެ.
"އެއްވެސް މަޝްރޫއުއެއް ހުއްޓާނުލާނަން. ހިނގަމުންދާ އެއްވެސް މަޝްރޫއެއް ވެސް، އަނދުން އަޅުވަން ކުރާ ކަމެއް ވިޔަސް ހުއްޓައެއް ނުލާނަން. އެއަށްވުރެ ރަނގަޅަށް އެކަންކަން ކުރާނަން. ކަންބޮޑުވާނެ ކަމެއް ނެތް، ފެށިފައިހުރި ކަމެއް ހުއްޓައެއް ނުލާން،" އޮގަސްޓު 28، 2023 ގައި ގއ. މާމެންދޫގައި ހުންނަވާ ރައީސް ވިދާޅުވި އެވެ.
ނަމަވެސް ސަރުކާރަށް ދެތިން މަސްވުމާއެކު އިދިކޮޅުން ދިޔައީ ރަށްރަށުގެ ތަރައްގީގެ މަޝްރޫއުތައް ހުއްޓިފައިވާ ކަމަށާއި ޕީއެސްއައިޕީ މަޝްރޫއުތަކަށް ކުރާ ހަރަދުވެސް މަދުވެފައިވާ ކަމަށް ތުހުމަތުކުރަމުންނެވެ. ސަރުކާރުން ތަކުރާރުކޮށް ދަނީ އެ ވާހަކަތައް ދޮގުކުރަމުންނެވެ.
titledesc
