ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށް ގެންދިޔަ މަޝްރޫއުތައް މަޑުޖައްސައިލަން ކޮންސްޓްރަކްޝަން މިނިސްޓްރީން އެ ކުންފުންޏަށް އަންގައިފި އެވެ.
މަޝްރޫއުތައް މަޑުޖައްސައިލަނީ ރާއްޖެއަށް ދިމާވާ މާލީ ތާށިކަން ބޮޑުވެ މަޝްރޫއުތައް ރީ-ޕްރިއޮރަޓައިޒް ކުރުމަށް ކަމަށް ކޮންސްޓްރަކްޝަން މިނިސްޓްރީން އެމްޓީސީސީ އަށް ފޮނުވި ސިޓީގައި ބުނެފައި ވެ އެވެ.
މަޝްރޫއުތައް މަޑުޖައްސައިލަން އެދި ކޮންސްޓްރަކްޝަން މިނިސްޓްރީން އެމްޓީސީސީ އަށް މިއަދު ފޮނުވި ސިޓީ "އަދަދު" އަށް ވަނީ ލިބިފަ އެވެ.
އެ ސިޓީގައި ބުނެފައިވާ ގޮތުން މަޝްރޫއުތައް ހުއްޓައިލަނީ ވަގުތީ ގޮތުންނެވެ. އެއީ ދައުލަތުގެ ހަރަދުތައް ކުޑަކުރަން އަޅާ ފިޔަވަޅުތަކުގެ ތެރެއިން މި އަހަރުގެ ބަޖެޓުގައި ހިމެނޭ މަޝްރޫއުތައް ރީ-ޕްރިއޮރަޓައިޒް ކުރުމަށް އެކުލަވައިލި ޕްލޭންގެ ދަށުން އަޅާ ފިޔަވަޅެއް ކަމަށްވެސް މިނިސްޓްރީން އެމްޓީސީސީއަށް ފޮނުވި ސިޓީގައި ބުނެފައި ވެ އެވެ.
މިވަގުތު އެމްޓީސީސީއާ ހަވާލުކޮށްފައި ހުރި މަޝްރޫއުތަކުގެ ލިސްޓެއްވެސް ސިޓީއާއެކު މިނިސްޓްރީން ފޮނުވާފައިވެ އެވެ. އަދި އެ މަޝްރޫއުތައް "މިނިސްޓްރީން ވަކި އެއްޗެއް އަންގަންދެން ވަގުތީގޮތުން ކުރިއަށް ނުގެންގޮސް މަޑުޖައްސައިލުމަށް" ވަނީ އަންގާފަ އެވެ.
އެކި ރަށްރަށުގައި ހިންގާ ތަރައްގީގެ 60 މަޝްރޫއެއް އެ ލިސްޓްގައި ހިމެނެ އެވެ. އޭގެ ތެރެއިން 17 މަޝްރޫއަކީ މިހާރުވެސް އަމަލީ މަސައްކަތް ކުރަމުން އަންނަ މަޝްރޫއުތަކެކެވެ.
ސަރުކާރުން މިފަދަ ފިޔަވަޅެއް އަޅަން ނިންމާފައިވާއިރު، ކުރިއަށްދާ އެއްވެސް އެއްވެސް މަޝްރޫއުއެއް ހުއްޓައިނުލައްވާނެ ކަމަށް ރައީސް ޑރ. މުހައްމަދު ރިޔާސީ ކެމްޕޭނުގައި ވިދާޅުވި އެވެ.
"އެއްވެސް މަޝްރޫއުއެއް ހުއްޓާނުލާނަން. ހިނގަމުންދާ އެއްވެސް މަޝްރޫއެއް ވެސް، އަނދުން އަޅުވަން ކުރާ ކަމެއް ވިޔަސް ހުއްޓައެއް ނުލާނަން. އެއަށްވުރެ ރަނގަޅަށް އެކަންކަން ކުރާނަން. ކަންބޮޑުވާނެ ކަމެއް ނެތް، ފެށިފައިހުރި ކަމެއް ހުއްޓައެއް ނުލާން،" އޮގަސްޓު 28، 2023 ގައި ގއ. މާމެންދޫގައި ހުންނަވާ ރައީސް ވިދާޅުވި އެވެ.
ނަމަވެސް ސަރުކާރަށް ދެތިން މަސްވުމާއެކު އިދިކޮޅުން ދިޔައީ ރަށްރަށުގެ ތަރައްގީގެ މަޝްރޫއުތައް ހުއްޓިފައިވާ ކަމަށާއި ޕީއެސްއައިޕީ މަޝްރޫއުތަކަށް ކުރާ ހަރަދުވެސް މަދުވެފައިވާ ކަމަށް ތުހުމަތުކުރަމުންނެވެ. ސަރުކާރުން ތަކުރާރުކޮށް ދަނީ އެ ވާހަކަތައް ދޮގުކުރަމުންނެވެ.
ނިމިދިޔަ މަޖިލިސް އިންތިހާބުގެ ކެމްޕޭނުގައި ރައީސް މުއިއްޒު ވަނީ މަޝްރޫއުތައް ނުހުއްޓޭނެ ކަމަށް އަނެއްކާވެސް ވިދާޅުވެފަ އެވެ. އެގޮތުން އެޕްރީލް 3، ގައި ހިޔާ ފުލެޓު ސަރަހައްދުގައި ހުންނަވާ ރައީސް ވިދާޅުވީ ފަށާފައިވާ އެއްވެސް މަޝްރޫއެއް ހުއްޓާނުލާނެ ކަމުގެ ޔަގީންކަން ތަކުރާރުކުރައްވާފަ އެވެ.
titledesc
