ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ވަނީ އޮޑިޓް ރިޕޯޓްތަކުގެ ޑްރާފްޓް ހުށަހަޅާފައި، ކަމަށާއި އެ ރިޕޯޓްތައް ފާސްކުރުމަށް ފަހު އަލުން ރަސްމީކޮށް ކޮމިޝަނާ އޮފް ސްޕޯޓްސް އަށް އެ ރިޕޯޓްތައް ހުށަހަޅާނެ ކަމަށް އެ ކޮމިޝަނުން ބުނެފި އެވެ.
މިދިޔަ މާޗް މަހު، ކޮމިޝަނާ އޮފް ސްޕޯޓްސް އިން ވޮލީބޯލް އެސޯސިއޭޝަނުގެ އިންތިހާބު ބާއްވަން ފުރުސަތު ދީފައިވަނީ، 90 ދުވަހުގެ ތެރޭގައި ވޮލީބޯލް އެސޯސިއޭޝަންގެ މިދިޔަ ހަތަރު އަހަރުގެ އޮޑިޓްގެ ކަންކަން ފުރިހަމަ ކުރުމަށެވެ.
އަދި މީގެ އިތުރުން، ވޮލީބޯލް އެސޯސިއޭޝަނުން ރާއްޖޭގެ ގާނޫނާ އެއްގޮތަށް ނިންމަން ޖެހޭ ކަންކަން ފުރިިހަމަ ކުރުމަށެވެ.
އެ ގޮތުން، ގާނޫނާ އެއްގޮތަށް ފުރިހަމަ ކުރަން ޖެހޭ ކަންކަން ނިންމުމަށް ފަހު، ވޮލީބޯލް އެސޯސިއޭޝަނުން ވަނީ، މާޗް 26 ވަނަ ދުވަހު، އެސޯސިއޭޝަންގެ އިންތިހާބު ބާއްވައި، މުހައްމަދު ލަތީފް، މިހާރު ހިނގަމުންދާ ދައުރުގެ ބާކީ އޮތް އެއް އަހަރަށް ރައީސްގެ މަގާމަށް އިންތިހާބުކޮށްފަ އެވެ.
ވޮލީ އެސޯސިއޭޝަންގެ ރައީސްގެ މަގާމު ހުސްވީ، އެ މަގާމު އަދާކުރަމުން އައި، މުހައްމަދު ރަނޭޝް (ރަނޭ) އިސްތިއުފާދިނުމުންނެވެ. ފެބްރުއަރީ 27 ވަނަ ދުވަހު، ރަނޭޝް، ވީއޭއެމްގެ ރައީސްކަމުން އިސްތިއުފާ ދިނީ، ދިިރިއުޅުމުގެ ކަންކަން ހުރި ގޮތުން ކަމަށް ބުނެ، މާޗް އެއް ވަނަ ދުވަހުން ފެށިގެން މަގާމުގެ ޒިންމާތައް ދޫކޮށްލާނެކަން ހާމަކުރެއްވުމަށް ފަހު އެވެ.
"އަދަދު" އިންކުރި ސުވާލަކަށް ޖަވާބު ދެއްވަމުން، ކޮމިޝަނާ އޮފް ސްޕޯޓްސް މުހައްމަދު ތޮލާލް، މިއަދު ވިދާޅުވީ، ވޮލީބޯލް އެސޯސިއޭޝަނުން ވަނީ މިދިޔަ ހަތަރު އަހަރުގެ އޮޑިޓް ރިޕޯޓްތަކުގެ ޑްރާފްޓް ހުށަހަޅާފައި ކަމަށެވެ.
އަދި އެ އޮޑިޓް ރިޕޯޓްތައް، ވޮލީބޯލް އެސޯސިއޭޝަންގެ ހިންގާ ކޮމިޓީ އާއި އެކްސްޓްރާ އޯޑިނަރީ ކޮންގްރެސް އަކުން ފާސްކޮށް، ރަސްމީކުރުމަށް ފަހު، އަލުން ކޮމިޝަނާ އޮފް ސްޕޯޓްސް އަށް ފޮނުވާނެ ކަމަށް އެ އެސޯސިއޭޝަނުން ބުނެފައިވާ ކަމަށް ވެސް ތޮލާލް ވިދާޅުވެފައުވެ އެވެ.
އޭނާ ވިދާޅުވީ، ވޮލީބޯލް އެސޯސިއޭޝަނުން އަދިވެސް އިންތިހާބުކުރަން ޖެހޭ އެއް މަގާމު އޮތުމާ އެކީގައި، އެކަން ވެސް ފުރިހަަމަ ކުރުމާއި އޮޑިޓް ރިޕޯޓްތައް ފާސްކުރުމަށް އެކްސްޓްރާ އޯޑިނަރީ ކޮންގްރެސް އެއް ބާއްވާނެ ކަމަށް ވެސް މައުލޫމާތު ދީފައިވާ ކަމަށެވެ.
ވޮލީބޯލް އެސޯސިއޭޝަންގެ ރައީސް ކަމަށް އިންތިހާބުވުމަށް ފަހު، ދެއްވި އިންޓަވިއުގައި ވާހަކަ ދައްކަވަމުން، ލަތީފް ވަނީ، ކޮމިޝަނާ އޮފް ސްޕޯޓްސް، ތޮލާލް ދެއްވާފައިވާ 90 ދުވަހުގެ މުހުލަތުގެ ތެރޭގައި ވޮލީބޯލް އެސޯސިއޭޝަންގެ އޮޑިޓްގެ މަސައްކަތް ނިންމައި، އެކްސްޓްރާ އޯޑިނަރީ ކޮންގްރެސްއެއް ބާއްވައި މެމްބަރު ކްލަބްތަކާ ހިއްސާކޮށްގެން ފާސްކުރާނެ ކަމުގެ ޔަގީންކަން ދެއްވައިފަ އެެވެ.
އެކަމަކު، އަދި މިހާތަނަށް އެ ގޮތަށް އެކަން ކުރެވިފައިނުވެ އެވެ.
ވޮލީބޯލް އެސޯސިއޭޝަނުން ވަނީ ދާދި ފަހުން، މާލޭގައި ސެންޓްރަލް ވޮލީބޯލް އެސޯސިއޭޝަން (ކާވާ)ގެ 20 އަހަރުން ދަށުގެ މުބާރާތް މާލޭގައި ބާއްވައިފަ އެވެ.
ވޮލީބޯލް އެސޯސިއޭޝަންގެ އިންތިހާބު ބޭއްވުނީ ދެ ފަހަރެއްގެ މަތިން އިއުލާނު ކޮށްގެންނެވެ. ނުބޭއްވި ލަސްވި އެންމެ ބޮޑު ސަބަބަކީ، އެންމެ ފަހުން، އިސްލާހު ކުރެވުނު ވޮލީބޯލް އެސޯސިއޭޝަނުގެ އަސާސީ ގަވާއިދުގައި ހުރި ކަންކަން ރަނގަޅުކުރަން ސްޕޯޓްސް ކޮމިޝަނަރު އަންގާފައިވާ ގޮތަށް ކަންކަން ނިންމުމުގައި އައި ލަސްތަކުގެ ސަބަބުންނެވެ. ދެ ފަހަރު، އިންތިހާބަށް ކުރިމަތިލާން ހުޅުވާލުމުން ވެސް ކުރިމަތިލެއްވި، ހަމައެކަނި ފަރާތަކީ، މިހާރުގެ ރައީސް، ލަތީފް އެވެ.
