މާލޭ ގެއަކަށް މީހަކު ވައްދައި، ބަރަހަނާކޮށް ބިރުދައްކައި އެކައުންޓުގައި ހުރި ފައިސާ ފޭރުނު މައްސަލައެއްގައި ދެ މީހުން ހައްޔަރުކޮށްފި އެވެ.
ފުލުހުން ބުނި ގޮތުގައި އެމީހާއަށް ބިރުދައްކައިގެން ކޭޝް ކާޑުގެ ޕިން ހޯދުމަށްފަހު، އެކައުންޓުގައިވާ ފައިސާ ފޭރުނު މައްސަލަ ފުލުހުންނަށް ހުށަހެޅީ ޖުލައި، 24 ގަ އެވެ. އެ މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކުރީ އުމުރުން 26 އަހަރުގެ މީހަކާއި 35 އަހަރުގެ މީހެއް ކަމަށް ވެސް ބުންޏެވެ.
އެ ދެމީހުންނަކީ ވެސް ދިވެހިންނެވެ.
ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން އޭގެ ތެރެއިން އެކަކަށް 30 ދުވަހުގެ މުއްދަތަކަށް، އަދި ދެވަނަ މީހާ 60 ދުވަހުގެ މުއްދަތަކަށް ބަންދުކުރަން ކޯޓުޖން އަމުރުކުރި އެވެ.
ފުލުހުން ބުނީ އެ ދެމީހުންގެ މައްސަލަ ތަހުގީގުކުރަމުން އަންނަ ކަމަށެވެ.
ރާއްޖޭގައި ފޭރުމުގެ މިފަދަ މައްސަލަތައް ދަނީ ގިނަވަމުންނެވެ. އެގޮތުން ހިޔާ ފްލެޓުގައި މީހުންނަށް ބިރުދައްކައި، ފޭރޭ މައްސަލަ ބޮޑުވެގެން ފުލުހުން ދަނީ އެކަމާ ގުޅޭ މީހުން ހައްޔަރުކޮށް މައްސަލަ ތަހުގީގު ކުރަމުންނެވެ.
