މަސްތުވާތަކެތީގެ މައްސަލަތަކުގައި މި އަހަރުގެ ފުރަތަމަ ހަ މަސް ދުވަސް ތެރޭގައި 116 ބިދޭސީން ޑީޕޯޓްކޮށްފައިވާ ކަމަށް ފުލުހުން ބުނެފި އެވެ.
ފުލުހުންގެ ޑްރަގް އެންފޯސްމަންޓްގެ ހެޑް، ސުޕްރިޓެންޑެންޓް ނާހިލް ހުސެއިން ވިދާޅުވީ މަސްތުވާތަކެތީގެ އެކި މައްސަލަތަކުގައި ގިނަ ބިދޭސީން ޑީޕޯޓުކުރެވުމަކީ އެކަމާ ދެކޮޅަށް ކުރާ މަސައްކަތަށް ލިބުނު ކުރިއެރުމެއް ކަމަށެވެ.
މި އަހަރުގެ ފުރަތަމަ ހަ މަސް ދުވަހުގެ ތެރޭގައި އަތުލައިގަނެވުނު މަސްތުވާތަކެތީގެ އަގު 130،969،636ރ. އަރާ ކަމަށާއި ބަނގުރަލުގެ މަގުމަތީ އަގު 12،400،000ރ. އަރާ ކަމަށް ނާހިލް ވިދާޅުވި އެވެ.
މަސްތުވާތަކެތީގެ މައްސަލަތަކުގައި ފުލުހުން ވަނީ ފާއިތުވި ހަ މަސް ދުވަހުގެ ތެރޭގައި 6،200 ބަނގުރާ ފުޅިއާއި، މަސްތުވާތަކެތި އެކުލެވޭ 95 ވޭޕާއި ކާޓްރިޖް، މަސްތުވާތަކެތީގެ ބާވަތެއް ކަމަށްވާ 40 އެލްއެސްޑީއާއި 982 މަނާ ބޭސް އަތުލައިގަނެފަ އެވެ.
އިމިގްރޭޝަނާއި ފުލުހުން ގުޅިގެން އަންނަނީ ރާއްޖޭގައި ގަވައިދާ ހިލާފަށް އުޅޭ ބިދޭސީން ފާހަގަކޮށް، އެ ބިދޭސީން ކުރަމުން އަންނަ ގަވާއިދާ ހިލާފު ކަންކަން ހުއްޓުވާއި، އެ ބިދޭސީން ބެލުމުގެ ދަށަށް ގެންދަމުންނެވެ.
