ރާއްޖެއަށް މިދިޔަ ބުދަ ދުވަހު ޕާކިސްތާނު މީހަކު އެތެރެކުރި 2.12 ކިލޯގެ މަސްތުވާތަކެތި އަތުލައިގަނެ، ހިންގި ކޮންޓްރޯލް ޑެލިވަރީ އޮޕަރޭޝަންގައި މައްސަލައާ ގުޅުންހުރި އިތުރު ދެ ދިވެހިން ހައްޔަރުކޮށްފި އެވެ.
ކަސްޓަމްސްއިން ބުނީ އމަސްތުވާތަކެތި އެތެރެކުރަން މަސައްކަތްކުރީ އަބޫދާބީ މަގުން ރާއްޖެ އައިޕާކިސްތާނު މީހެއް ކަމަށާއި މައްސަލަ ތަހުގީގުކުރަން މަސްތުވާތަކެއްޗާއިއެކު އޭނާ ފުލުހުންނާ ހަވާލުކޮށްފައިވާ ކަމަށެވެ.
އެ މަސްތުވާތަކެތި ތަހުލީލުގެ ފުރަތަމަ މަރުހަލާގައި މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވްވެފައިވާ ކަމަށާއި އެތަކެތީގެ މަގުމަތީ އަގު 2،420،000ރ. އަރާ ކަމަށް ކަސްޓަމްސްއިން ބުނެ އެވެ.
ފުލުހުން ބުނީ މި މައްސަލައާ ގުޅިގެން ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަންގައި ހައްޔަރުކުރީ 25 އަހަރުގެ ދިވެހި ފިރިހެނަކާއި، 40 އަހަރުގެ ދިވެހި ފިރިހެނެއް ކަމަށެވެ.
މައްސަލައިގައި ހިމެނޭ ތިން މީހުން ކްރިމިނަލް ކޯޓަށް ހާޒިރު ކުރުމުން 15 ދުވަހުގެ މުއްދަތެއް ޖަހައިދީފައިވާ ކަމަށް ފުލުހުން ބުނެ އެވެ.
މައްސަލައާ ގުޅޭ އިތުރު މީހުން ތިބިކަމަށް ތަހުގީގަށް އެނގިފައިވާކަން ފާހަގަކޮށް ފުލުހުން ބުނީ އެމީހުން ދެނެގަތުމުގެ މަސައްކަތް ކުރަމުން އަންނަ ކަމަށާއި މައްސަލަ އިތުރަށް ތަހުގީގު ކުރަމުންދާ ކަމަށެވެ.
