މާލޭގެ ޗާންދަނީ މަގުގައި ހުންނަ ލިޓަސް ޝޯ ރޫމް ކައިރީ މަގުމަތީގައި ވަޅިއެއް ހިފައިގެން މަގުމަތިން ދިޔަ މީހުންނަށް ބިރު ދައްކައި އިންޒާރު ދެމުން ދިޔަ މީހަކު ހައްޔަރުކޮށްފި އެވެ.
މި މައްސަލާގައި ހައްޔަރުކުރީ 41 އަހަރުގެ ދިވެހި ފިރިހެނެކެވެ. އޭނާގެ ބަންދަށް އިއްޔެ ކްރިމިނަލް ކޯޓުން 10 ދުވަހުގެ މުއްދަތެއް ވަނީ ޖަހައިފި އެވެ.
ކޯޓު އަމުރުން އެނގުނު ގޮތުގައި އެއީ ހައްޔަރާއި ބަންދު ލޮގް އޮތް މީހެކެވެ.
"މި ހާދިސާ ހިނގި ސަރަހައްދުގައި އުޅޭ މީހުންނަށް ވަޅިން ބިރު ދައްކައި އިންޒާރު ދޭ ކަމަށާއި މީނާ ފުލުހުންގެ ބެލުމުގެ ދަށަށް ގެނައި ވަގުތު މީނާގެ އަތުން ވަޅިއެއް ފެނިފައިވާ ކަމަށް ހާދިސާ ރިޕޯޓުގައި ފާހަގަކޮށްފައިވޭ،" ކްރިމިނަލް ކޯޓުގެ އަމުރުގައިވެ އެވެ.
ފުލުހުން މައުލޫމާތު ދިން ގޮތުގައި އޭނާ ވަޅިއެއް ހިފައިގެން އުޅުނު ސަރަހައްދަކީ ލިޓަސް ޝޯ ރޫމް ކައިރި އެވެ. އަދި އެއީ އެ ސަރަހައްދުން ދާ އާންމުންނަށް ވަޅި ދައްކައިގެން ބިރު ދައްކައި އިންޒާރު ދިން ކަމަށް ތުހުމަތު ކުރެވޭ މައްސަލައެއް ކަމަށް ވެސް ފުލުހުން ބުންޏެވެ.
