މާލޭގައި ހުންނަ ކޭއެފްސީގެ ބިއްލޫރިގަނޑު ތަޅައިލި މައްސަލައިގައި ހައްޔަރުކުރި މީހާ އެއް މަސް ދުވަހަށް ބަންދުކޮށްފި އެވެ.
މިދިޔަ ހަފުތާގެ ހޯމަ ދުވަހުގެ ރޭ ހިންގި ކުށުގެ އެ އަމަލާ ގުޅިގެން ކޯޓު އަމުރެއްގެ ދަށުން އިއްޔެ ހައްޔަރުކުރީ 48 އަހަރުގެ ފިރިހެނެކެވެ. އޭނާ ބަންދާ މެދު ގޮތެއް ނިންމަން ހާޒިރުކުރުމުން ކޯޓުން ދިނީ 30 ދުވަހުގެ ބަންދު އަމުރެއް ކަމަށް ފުލުހުން މިއަދު ބުންޏެވެ.
ކޭއެފްސީގެ ބިއްލޫރިގަނޑު މީގެ ކުރިން ވެސް އެތައް ފަހަރެއްގެ މަތިން ވަނީ ތަޅައިލަފަ އެވެ. މީގެ ކުރިން އެތަނަށް ކަޅުތެޔޮ ވެސް ޖެހި އެވެ. މިދިޔަ ހުކުރު ދުވަހު ވެސް އެ ތަނުގެ ބިއްލޫރިގަނޑު ތަޅާލާފައިވެ އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ ގަތުލުއާންމާ ގުޅިގެން ކޭއެފްސީ ބޮއިކޮޓު ކުރުމަށް ގޮވާލައި އެތަނުގެ ބޭރުގައި، ލިޔުންތައް ހަރުކުރަމުން އަންނަތާ ދުވަސްކޮޅެއް ވެއްޖެ އެވެ. އިޒްރޭލަށް ވާގިވެރިވެ މާލީ އެހީދޭ ބްރޭންޑުތަކުގެ ތެރޭގައި ކޭއެފްސީ ހިމެނެ އެވެ.
ފަލަސްތީނުގެ ރައްޔިތުން އިސްވެ ހިންގާ ބޮއިކޮޓް، ޑައިވެސްޓްމަންޓް، ސެންްކްޝަންސް (ބީޑީއެސް) ހަރަކާތުން ބޮއިކޮޓް ކުރާ ލިސްޓުގައިވެސް ކޭއެފްސީ ހިމެނެ އެވެ.
ފްރެންޗަައިޒް އުސޫލުން ހިންގާ މި ރެސްޓޯރަންޓު ރާއްޖޭގައި ހިންގަނީ ގަމާ އައިލެންޑް ފުޑް ޕްރައިވެޓް ލިމިޓެޑް ކިޔާ ކުންފުންޏަކުންނެވެ. މި ކުންފުނީގެ ހިއްސާދާރުންނަކީ އައިލެންޑް ފުޑް ޕްރައިވެޓް ލިމިޓެޑް ކިޔާ ދިވެހި ކުންފުންޏަކާއި އިންޑިއާގެ ގަމާ ޕިއްޒާކްރާފްޓް އޯވާސީސް ލިމިޓެެޑެވެ.
