ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަތަކާއި އިމިގްރެޝަނާ ގުޅުން ހުރި އެހެނިހެން މައްސަލަތައް އޮންލައިންކޮށް ރިޕޯޓު ކުރެވޭ ހާއްސަ ޕްލެޓްފޯމެއް ތައާރަފުކޮށްފި އެވެ.
"އިމިގްރޭޝަން ވޮޗް" ގެ ނަމުގައި އެ ޕްލެޓްފޯމު ތައާރަފު ކޮށްދެއްވީ މިއަދު ބޭއްވި ނޫސްވެރިންގެ ބައްދަލުވުމުގައި އިމިގްރޭޝަންގެ ކޮންޓްރޯލާ ޖެނެރަލް، މުހައްމަދު ޝައްމާން ވަހީދެވެ.
އެ ޕްލެޓްފޯމު މެދުވެރިކޮށް މައްސަލަ ހުށަހެޅުމަށް އިމިގްރޭޝަންގެ ވެބްސައިޓަށް ވަނުމަށްފަހު "އިމިގްރޭޝަން ވޮޗް" ހިޔާރު ކުރުމަށްފަހު ރިޕޯޓު ކުރަން ބޭނުންވާ މައްސަލައިގެ ތަފުސީލާއެކު ފޮޓޯ ވެސް ހުށަހެޅޭނެ އެވެ.
އިމިގްރޭޝަން ވޮޗް ޕްލެޓްފޯމާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ޝައްމާން ވިދާޅުވީ ބިދޭސީން ހިންގާ ވިޔަފާރިތަކަށް ހާއްސަކޮށްގެން މިހާރު ކުރިއަށް ގެންދާ އޮޕަރޭޝަންތަކަށް އާންމުންގެ ފަރާތުން ބޮޑު ތަރުހީބެއް ލިބޭ ކަމަށެވެ. އަދި ގަވާއިދާ ހިލާފަށް އުޅޭ ބިދޭސީންގެ މައްސަލަތައް ސޯޝަލް މީޑިއާގައި ވެސް ހިއްސާ ކުރާ ކަމަށެވެ.
މިއަދު ތައާރަފު ކުރި "އިމިގްރޭޝަން ވޮޗް" ގެ ސަބަބުން ގަވާއިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓު ކުރުމަށް އާންމުންނަށް ފަސޭހަވެގެންދާނެ ކަމަށް ޝައްމާން ވިދާޅުވި އެވެ.
އިމިގްރޭޝަން ވޮޗް މެދުވެރިކޮށް ޝަކުވާ ހުށަހަޅާ ފަރާތާއި ރިޕޯޓު ކުރާ މައްސަލަ ވެސް ސިއްރު ވާނެ ކަމަށް އިމިގްރޭޝަނުން ބުންޏެވެ. އެ ޕްލެޓްފޯމު މެދުވެރިކޮށް 24 ގަޑިއިރު މައްސަލަތައް ރިޕޯޓު ކުރެވޭނެ އެވެ.
