ގާނޫނުގައިވާ ގޮތަށް އޮޑިޓު ރިޕޯޓު ހުށަހަޅާފައިނުވާ ތިން ސިޔާސީ ޕާޓީއެއް ޖޫރިމަނާކުރަން އިލެކްޝަންސް ކޮމިޝަން (އީސީ) އިން ނިންމި ކަމަށް އިއްޔެ ރިޕޯޓުކުރި އެވެ.
ޖޫރިމަނާ ކުރީ ދަ ޑިމޮކްރެޓްސް، މޯލްޑިވްސް ނޭޝަނަލް ޕާޓީ (އެމްއެންޕީ) އަދި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އެވެ. އެ ޕާޓީތައް 50،000ރ. އިން ޖޫރިމަނާކުރަން ނިންމީ ސިޔާސީ ޕާޓީގެ ގާނޫނުގެ 44 ވަނަ މާއްދާއަށް ރިއާޔަތްކޮށެވެ. މިކަމާ ގުޅޭގޮތުން އީސީން އިތުރު ތަފްސީލެއް ނުދެ އެވެ.
ސިޔާސީ ޕާޓީތަކުގެ ގާނޫނުގެ 44 ވަނަ މާއްދާ ބުނާ ގޮތުން ކޮންމެ މީލާދީ އަހަރެއް ނިމޭތާ ގިނަވެގެން 90 ދުވަހުގެ ތެރޭގައި، ކޮންމެ ސިޔާސީ ޕާޓީއަކުން ވެސް، ޕާޓީގެ އަހަރީ ހިސާބުތައް އޮޑިޓާ ޖެނެރަލް ގަބޫލުކުރާ އޮޑިޓަރަކު މެދުވެރިކޮށް އޮޑިޓްކުރުމަށްފަހު، އޮޑިޓް ރިޕޯޓު ކޮމިށަނަށާއި އޮޑިޓަ ޖެނެރަލަށް ހުށަހަޅަން ޖެހެ އެވެ.
ޖޫރިމަނާކުރި ޕާޓީތަކަށް ބަލާއިރު ޑިމޮކްރެޓްސްގެ ދަފުތަރުގައި މިވަގުތު ތިބީ 4364 މެންބަރުންނެވެ. އެމްއެންޕީގައި 7656 މެންބަރުން ތިބިއިރު އެމްޓީޑީގައި ތިބީ 2388 މެންބަރުންނެވެ. މީގެ ތެރެއިން ދަ ޑިމޮކްރެޓްސް އަދި އެމްއެންޕީ ވަނީ ވޭތުވެދިޔަ އަހަރުގެ ރިޔާސީ އިންތިހާބަށް ކެންޑިޑޭޓުން ނެރެ ފުރަތަމަ ބުރުގައި ވާދަކޮށްފަ އެވެ.
