ސަރުކާރު ހިއްސާވާ ކުންފުނި (އެސްއޯއީ)ތަކަށް ބޭނުންވާ އެކައުންޓިން އަދި ފިނޭންސް ޑިރެކްޓަރުން އައްޔަން ކުރުމަށް ޑިރެކްޓަރުންގެ ޕޫލެއް އެކުލަވާލުމުގެ މަސައްކަތް ފަށާފައިވާ ކަމަށް ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން މިއަދު ހާމަކޮށްފި އެވެ.
ޕީސީބީން ނެރުނު ނޫސް ބަޔާނެއްގައި ބުނީ، މިއީ އެސްއޯއީތަކުގެ ހިންގުމާއި ކުންފުނިތަކުގެ ބޯޑުގެ އޮޑިޓު ކޮމިޓީތަކުގެ މަސައްކަތް ހަރުދަނާ ކުރުމަށް އެޅޭ ފިޔަވަޅެއް ކަމަށެވެ.
އެގޮތުން، ކުންފުނިތަކުގެ އެކައުންޓިން އަދި ފައިނޭންސް ޑިރެކްޓަރުންގެ މަގާމަށް އައްޔަންކުރާ ފަރާތްތަކަކީ މުޅި ކުންފުނީގެ އެތެރޭގެ ކޮންޓްރޯލުތައް ބަލަހައްޓާ، ރިސްކު މެނޭޖުމަންޓު ބެލެހެއްޓުމުގެ އިތުރުން މާލީގޮތުން ކުންފުނި ފުދުންތެރި ކުރުވުމަށް އިރުޝާދު ދެވޭ ފަދަ ފަންނީ ފަރާތްތަކަކަށް ވާންޖެހޭ ކަމަށް އެ އިއުލާނުގައި ފާހަގަ ކޮށްފައިވެ އެވެ.
އެސްއޯއީތަކުގެ ޑިރެކްޓަރުންގެ ޕޫލް އެކުލަވާލާ ނިމޭއިރު ހުރިހާ ކުންފުނިތަކެއްގެ ބޯޑުގައި އެކައުންޓިން އެންޑް ފިނޭންސް ދާއިރާގެ ތަޖުރިބާ ހުރި، އިންޓަނޭޝަނަލް ފެޑެރޭޝަން އޮފް އެކައުންޓެންޓްސް (އައިފެކް) އިން ގަބޫލުކުރާ ފެންވަރުގެ ފަންނީ ފަރާތެއް ހިމެނޭކަން ކަށަވަރުކުރެވިގެންދާނެ ކަމަށް ޕީސީބީން ބުންޏެވެ.
ޑިރެކްޓަރުންގެ ޕޫލަށް ނަން ހުށަހެޅުމުގެ ފުރުސަތު މިހާރު ހުޅުވާލެވިފައިވާއިރު، ޕީސީބީން ގެޒެޓުކޮށްފައިވާ އިއުލާނުގައިވާ ގޮތުން އެ ފުރުސަތު މި މަހުގެ ޖުލައި 15، ގެ މެންދުރު 1:00 އާ ހަމައަށް ލިބޭނެ އެވެ.
