ރައްޔިތުންގެ މަޖިލީހުގެ މާލިއްޔަތު ކޮމިޓީ އާއި އެމެރިކާގެ ޓްރެޝަރީ ޑިޕާޓްމަންޓުގެ ބޭފުޅުންނާ ދެމެދު މިއަދު ތާވަލުކުރި ބައްދަލުވުން އެމެރިކާއިން އެދިގެން ސިއްރުކޮށްފި އެވެ.
މިއަދު 11:30 އަށް ތާވަލުކުރި ކޮމިޓީ ފައްޓަވަމުން މުގައްރިރު ގާސިމް އިބްރާހިމް ވިދާޅުވީ ފޮރިން މިނިސްޓްރީން އެދިފައި ވަނީ އޭނާ އާއި ކޮމިޓީގެ ނައިބު މުގައްރިރު އޭދަފުށީ ދާއިރާގެ މެންބަރު އަހްމަދު ސަލީމްއާ ދެ ބޭފުޅުންނާ އެކު ހަމައެކަނި ބައްދަލުކުރުމަށް ކަމަށެވެ.
ނަމަވެސް, މުޅި ކޮމިޓީއާއެކު ބައްދަލުވުން ކުރިއަށްގެންދިޔުމަށް އެދިވަޑައިގެންނެވި ކަމަށާއި އެގޮތަށް ކަންކަން ހަމަޖެއްސެވި ކަމަށް އޭނާ ވިދާޅުވި އެވެ.
މި ކޮމިޓީ ބައްދަލުވުން ފެށުމަށް ފަހު، ކޮމިޓީ ސިއްރުކުރަން އެމެރިކާގެ ޓްރެޝަރީ ޑިޕާޓްމަންޓުން އެދުނުކަން ގާސިމަށް އެންގީ އިދާރީ މޭޒުންނެވެ. އެއަށްފަހު އެކަމަށް ކޮމިޓީގައި ވޯޓު ނެގި އެވެ.
އެ ކަމާ ގުޅިގެން ނެގި ވޯޓުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުން ފާސްކުރީ ކޮމިޓީ ސިއްރު ކުރުމަށެވެ. މިއަދުގެ ކޮމިޓީގެ ބައްދަލުވުމަށް 11 މެންބަރުން ހާޒިރުވި އެވެ.
