ހުޅުމާލޭގައި ހިންގި މާރާމާރީއެއް ހުއްޓުވަން ދިޔަ ފުލުހެއްގެ ގައިގައި ކާރުން ޖެއްސުމަށް ފަހު ފިލި ކުރީގެ ޑެޕިއުޓީ ކޮމިޝަނަ އޮފް ޕޮލިސް، އަލީ ރަޝީދުގެ ފިރިހެން ދަރިފުޅުގެ ބަންދަށް 10 ދުވަސް ޖަހައިފި އެވެ.
ފުލުހުން ބުނީ މައްސަލައާ ގުޅިގެން އިއްޔެ ހައްޔަރުކުރި 22 އަހަރުގެ މީހާގެ ބަންދާ މެދު ގޮތެއް ނިންމުމަށް ހުޅުމާލެ ކޯޓަށް ހާޒިރު ކުރުމުން 10 ދުވަހަށް ބަންދު ކުރުމަށް ވަނީ އަމުރުކޮށްފައި ކަމަށެވެ.
މި ނޫހަށް އެނގިފައިވާ ގޮތުގައި ފުލުސް މީހާ ގައިގައި ޖެއްސި ކާރު ރަޖިސްޓަކޮށްފައި ވަނީ އަލީ ރަޝީދުގެ ނަމުގަ އެވެ.
ފުލުސް މީހާގެ ގައިގައި ކާރުން ޖެއްސީ ޖޫން 15 ވަނަ ދުވަހު ފަތިހު ހުޅުމާލެ 10 ނަންބަރު ފްލެޓު ކައިރިންނެވެ. އެ ސަރަހައްދަށް ފުލުހުން ސައިކަލެއްގައި ދިޔައީ މާރާމާރީއެއް ހިންގާކަމުގެ ރިޕޯޓު ލިބިގެންނެވެ
.އަދަދު ނޫހަށް ލިބިފައިވާ ވީޑިއޯއިން ފެންނަ ގޮތުގައި، ތުހުމަތުވާ ދެ މީހުން ކާރުގައި ދާން އުޅުމުން، އެ މީހުން ހުއްޓަން އެ ސަރަހައްދަށް ދިޔަ ފުލުސް މީހާ މަސައްކަތް ކުރުމުން، ކާރުން ޖައްސައި ވައްޓައިލުމަށް ފަހު ދިޔަ އެވެ.
އެ ފުލުސް މީހާ އަށް ހޮސްޕިޓަލުން ފަރުވާ ދިނުމަށް ފަހު ދޫކޮށްލާފައިވާ ކަމަށް ފުލުހުން ބުނެ އެވެ.
މި މައްސަލައިގައި ކުރިން ހައްޔަރު ކުރި މީހާގެ ތަހުގީގު ކުރިއަށް ގެންދިޔުމަށް ކޯޓުން ވަނީ އޭނާގެ ބަންދަށް 15 ދުވަސް ޖަހައިދީފަ އެވެ.
