އެކްސްގައި އިސްލާމްދީނަށް ފުރައްސާރަކޮށް ޕޯޓްކުރި މައްސަލައެއް ބަލަމުން އަންނަކަމަށް ފުލުހުން ބުނެފި އެވެ.
ބައިނައްލަގުވާމީ ޔޯގާ ދުވަހާއި ގުޅިގެން "އައިޝަތް ނަޒްހާ" ނަމަކަށް ކިޔާ އެކްސް އެކައުންޓުން ކޮށްފައިވާ ޕޯސްޓެއްގައި ވަނީ ހައްޖު އަދި އުމްރާގެ އަޅުކަމަށް ފުރައްސާރަކޮށްފަ އެވެ.
އެގޮތުން "ހިލަގަނޑެއްގެ" ވަށައިގެން ބުރުޖަހައި އެޔަށް ބޮސްދިނުން ވަރިހަމަ ނަމަވެސް، ޔޯގާ ހަރާމްކަމަށް ބުނެ އެ ޕޯސްޓުގައި ވަނީ ގެފުޅަށް ފުރައްސާރަކޮށްފަ އެވެ.
ދީނަށް ފުރައްސާރަކޮށް ކުރި ޕޯސްޓް. މިހާރު އެކައުންޓް ވަނީ ޑީއެކްޓިވޭޓް ކޮށްފައި
މި މައްސަލައާއި ގުޅިގެން ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ އިސްލާމް ދީނަށް ފުރައްސާރަކޮށް އެކްސްގައި އާންމުކޮށްފައިވާ ޕޯސްޓް ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި އެ ޕޯސްޓާއި ގުޅިގެން ބަލަންޖެހޭ ކަންކަން ބަލަމުން އަންނަކަމަށް ފުލުހުން މައުލޫމާތުދެ އެވެ.
އެ އެކައުންޓް މިހާރު ފެންނަން ނެތް ކަމަށް އެކްސްގައި ދައްކަ އެވެ. ބެލެވޭ ގޮތުގައި އެއީ ގިނަ ބަޔަކު ރިޕޯޓު ކުރުމުގެ ސަބަބުންނެވެ. އެ ޓްވީޓަށް ގިނަ ބަޔަކު ރިޕްލައިކޮށް އެ މީހާއަށް ރައްދު ދިނެވެ.
ޔޯގާ ދުވަސް ފާހަގަކުރުމަށް 2021 ވަނަ އަހަރު ގަލޮޅު ދަނޑުގައި ބޭއްވި ހަރަކާތަށް އޭރު ބަޔަކު ހުރަސް އަޅައި ހުއްޓުވި އެވެ. އޭގެތެރޭގައި މިހާރުގެ ސަރުކާރުގެ އިސް ބައެއް މަގާމުތަކުގައި ތިއްބެވި ބޭފުޅުންނާއި ޕީއެންސީގެ މަޖިލިސް މެންބަރުން ވެސް ހިމެނިވަޑައިގެންނެވި އެވެ.
