މިމަހުގެ 12 ވަނަ ދުވަހު ތ. ވޭމަންޑޫގައި ލައިސެންސް ނެތި ސައިކަލު ދުއްވި މީހަކު ހުއްޓުވައި ޖޫރިމަނާ ކުރުމަށްފަހު އޭނާ ދުއްވި ސައިކަލު ޓޯކުރިއިރު، ފުލުހުން މުއާމަލާތު ކުރި ގޮތް ބަލައި ރަނގަޅު ކުރަންޖެހޭ ކަންކަން ރަނގަޅު ކުރާނެ ކަމަށް ފުލުހުން ބުނެފި އެވެ.
މީޑީއާތަކަށް ފުލުހުން މިރޭ ފޮނުވި މެސެޖެއްގައި ބުނީ އެ މީހާ ހުއްޓުވާފައި ވަނީ ފުލުހުން ބަންދުކޮށްފައިވާ ސަރަހައްދަކަށް ސައިކަލުގައި ވަނުމަށްފަހު ނުކުމެގެން ދަނިކޮށް ކަމަށެވެ. އެ މީހާ ހުއްޓުވައި ބެލިބެލުމުން އޭނާ އަތުގައި ސައިކަލު ދުއްވުމުގެ ލައިސެންސް ނެތްކަން އެނގުނު ކަމަށް ފުލުހުން ބުންޏެވެ.
ލައިސެންސް ނެތި ސައިކަލު ދުއްވުމުގެ ކުށުގައި ސައިކަލު ދުއްވި މީހާ ޖޫރިމަނާކުރުމަށްފަހު ސައިކަލު ޓޯކުރީ 15 ދުވަހުގެ މުއްދަތަކަށް ކަމަށް ފުލުހުންގެ މެސެޖުގައި ބުނެފައިވެ އެވެ.
އެމީހާ ހުއްޓުވައި ޖޫރިމަނާ ކުރިއިރު، ފުލުހުންގެ ފަރާތުން މުއާމަލާތު ކޮށްފައި ވާގޮތާމެދު އެ މީހާގެ އާއިލާގެ ކަންބޮޑުވުންތަކެއް ހުރިކަން ފުލުހުންގެ ސަމާލު ކަމަށް އައިސްފައިވާ ކަމަށް ވެސް ފުލުހުންގެ މެސެޖުގައި ބުނެފައިވެ އެވެ.
މިފަދަ މައްސަލައެއް ފެންމަތިވެފައިވާއިރު، މީގެ ކުރިން ވެސް ބައެއް މައްސަލަތަކުގައި ފުލުހުންގެ ފަރާތުން އަމަލު ކުރާގޮތާމެދު އާންމުން ކަންބޮޑުވުން ފާޅުކޮށްފައިވެ އެވެ. އެގޮތުން ބައެއްފަހަރު ފުލުހުން ހަޑިހުތުރު ބަހުން މުއާމަލާތު ކުރަ ވީޑިއޯ ވެސް ސޯޝަލްމީޑިއާގައި އާންމުވެފައިވެ އެވެ. އެފަދަ މައްސަލައެއް ފެންމަތިވާ ކޮންމެ ފަހަރަކު ވެސް ފުލުހުން އެ މައްސަލަ ބަލަ އެވެ. އަދި އެކަންކަން ރަނގަޅު ކުރާނެ ކަމުގެ ޔަގީންކަން ވެސް ފުލުހުން ދެ އެވެ.
