އިންޑިއާއިން ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު މަދުވެފައިވާތީ އާއި ހީނަރުވެފައިވާ ދެ ގައުމުގެ ގުޅުން އިތުރަށް ވަރުގަދަ ކުރުމަށް އެމްއެމްޕީއާރުސީ އާއި މަންތާ އެއާ ގުޅިގެން އިންޑިއާގެ ބެންގަލޫރުގައި ރޯޑްޝޯއެއް ބާއްވަން ނިންމައިފި އެވެ.
"އެކްސްޕްލޯ މޯލްޑިވްސް ރޯޑްޝޯ" ގެ ނަމުގައި ބާއްވާ އެ ހަރަކާތާ ގުޅޭގޮތުން އެމްއެމްޕީއާރުސީގެ މީޑިއާ ޓީމަށް ދިން އިންޓަވިއުއެއްގައި އެ ކޯޕަރޭޝަނުގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ އިންޑިއާ މާކެޓަކީ މިވަގުތު އެންމެ ހަލުވިމިނުގައި ކުރިއަރަމުން އަންނަ ފަތުރުވެރިކަމުގެ އެއް މާކެޓު ކަމަށާއި އިންޑިއާ މާކެޓަކީ ދިވެހި ފަތުރުވެރިކަމަށް އެންމެ މުހިންމު އެއް މާކެޓު ކަމަށެވެ.
"އިންޑިއާ އަކީ މިއަދު އެންމެ ކުރިއަރަމުން އަންނަ އައުޓްބައުންޑް ޓްރެވެލް މާކެޓުގެ ގޮތުގައި ފާހަގަ ކުރެވޭއިރު، އެއީ ރާއްޖޭގެ ފަތުރުވެރިކަމަށް މުހިންމު މާކެޓެއް، ޝައްކެއްވެސް ނެތް ގޮތުގައި، ރާއްޖޭގެ ފަތުރުވެރިކަމު ދައިރާގެ އިސް ފަރާތްތަކަށް މި ރޯޑްޝޯގެ ތެރެއިން ރާއްޖެ އިޝްތިހާރުކުރުމުގެ ފުރުސަތު ލިބި، ރާއްޖެއަށް ލިބިފައިވާ ލާސާނީ ސިފަތައް އިތުރަށް ޕްރޮމޯޓުކޮށް ރާއްޖެއަކީ ފުރިހަމަ މަންޒިލެއްކަން ދައްކައިލުމުގެ ފުރުސަތު ފަހިވެގެންދާނެ،" ޝިއުރީ ވިދާޅުވި އެވެ.
ބެންގަލޫރުގެ ޝަންގްރިއްލާ ހޮޓެލުގައި މި ފެށޭ ހަފުތާގެ ބުދަ ދުވަހު ބާއްވާ ރޯޑްޝޯގެ ބޭނުމަކީ ރާއްޖެއަށް ޒިޔާރަތް ކުރާ އިންޑިއާ ފަތުރުވެރިންގެ އަދަދު އިތުރު ކުރުމަށާއި އިންޑިއާގެ ޓްރެވެލް އިންޑަސްޓްރީގައި އިސްކޮށް ހަރަކާތްތެރިވާ ފަރާތްތަކާ ރާއްޖޭގެ ފަތުރުވެރިކަމުގެ ސިނާއަތުގެ ފުންނާބު އުސް ފަރާތްތަކާ ބައްދަލުވެ ގުޅުން ބަދަހި ކުރުން ކަމަށް އެމްއެމްޕީއާރުސީން ބުނެ އެވެ.
އެ ރޯޑްޝޯގައި އިންޑިއާގައި އެންމެ ފުޅާކޮށް އޮޕަރޭޓު ކުރާ ޓްރެވެލް އޭޖެންޓުންނާއި ޓުއާ އޮޕަރޭޓަރުންގެ އިތުރުން އިންޑިއާގެ މެއިންސްޓްރީމް މީޑިއާތައް ހިމެނޭހެން 150 އަށް ވުރެ ގިނަ ފަރާތްތައް ބައިވެރިވާނެ ކަމަށް ވެސް އެމްއެމްޕީއާރުސީން ބުނެ އެވެ.
ރާއްޖޭގެ ފަރާތުން އެ ރޯޑްޝޯގައި ބައިވެރިވަނީ ޔުނިވާސަލް ރިސޯޓްސް އާއި މައިނާ ހޮޓެލްސް އާއި އެންއެޗް ކަލެކްޝަން އާއި ސަން ސިޔާމް ރިސޯޓްސްގެ އިތުރުން ވިލާ ހޮޓްލްސް އެންޑް ރިސޯޓްސް ފަދަ ބޮޑެތި ކުންފުނިތަކުންނެވެ. އެ ކުންފުނިތަކުގެ އިތުރުން ރާއްޖޭގައި ގެސްޓުހައުސް ވިޔަފާރި ހިންގާ އެކި ފަރާތްތަކުން ވެސް އެ ރޯޑްޝޯގައި ބައިވެރިވާން ނިންމާފައިވާ ކަމަށް އެމްއެމްޕީއާރުސީން ބުނެ އެވެ.
"ރާއްޖޭގެ ފަތުރުވެރިކަމުގެ ސިނާއަތް އިތުރަށް ކުރިއަރުވައި، އިންޑިއާގެ ޓްރެވަލް މާކެޓާ އެކު އޮންނަ ގުޅުން ބަދަހިކުރުމަށް މި ހަރަކާތަކީ ވަރަށް މުހިންމު ދައުރެއް އަދާކުރާނެ ހަރަކާތެއް، މި ރޯޑްޝޯގެ މަގުސަދަކީ އިންޑިއާ މާކެޓުގެ އެންމެ ކުރީގައި އޮންނަ މަންޒިލެއްގެ ގޮތުގައި ރާއްޖެ ހެދުމަށްޓަކައި އިޝްތިހާރުކޮށް، ރިސޯޓްތަކާއި ގެސްޓްހައުސްތަކަށް އިންޑިއާގެ އިންޑަސްޓްރީގެ އިސްފަރާތްތަކާއި ބައްދަލުކޮށް ގުޅުންބަދަހި ކުރުމުގެ އުފާވެރި ފުރުސަތެއް ފަހިކޮށްދިނުން،" ޝިއުރީ ވިދާޅުވި އެވެ.
އިންޑިއާ މާކެޓަކީ މިދިޔަ އަހަރު ފަސް އަހަރު ދުވަހުގެ ތެރޭގައި އެންމެ ފުޅާވި އެއް މާކެޓެވެ. އެހެން ނަމަވެސް މި ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު، ނަރެންދުރަ މޯދީއަށް ކުޑައިމީސްކޮށް ފުރައްސާރަ ކުރި މައްސަލައިގައި ދެ ގައުމުގެ ގުޅުމަށް ބުރޫ އަރައި އިންޑިއާގެ ބައެއް ޓްރެވެލް އޭޖެންސީތަކުން ވަނީ ރާއްޖެ ބްލެކްލިސްޓު ވެސް ކޮށްފަ އެވެ.
އެއަށްފަހު ރާއްޖެއަށް ޒިޔާރަތް ކުރާ އިންޑިއާ ފަތުރުވެރިންގެ އަދަދު ވަނީ ވަރަށް ބޮޑަށް ދަށަށް ގޮސްފަ އެވެ. މިދިޔަ އަހަރުގެ ޖެނުއަރީ މަހުން ފެށިގެން އޭޕްރިލް މަހާ ހަމައަށް ބަލާއިރު، އިންޑިއާއިން އެކަނި ވެސް ރާއްޖެއަށް 73,785 ކޮށްފައިވެ އެވެ. ނަމަވެސް މިއަހަރުގެ އެ މުއްދަތުގައި އިންޑިއާއިން ރާއްޖެއަށް ޒަޔާރަތް ކުރީ އެންމެ 42،627 މީހުންނެވެ.
