މާލޭގައި ވަގުންގެ ބޮޑު ނެޓްވޯކެއް އޮތް ކަމަށް "އަދަދު"ން ރިޕޯޓްކުރުމުން، އެއީ "މީގެ 10 މަސް ދުވަސް ކުރިން ގިނަ އަދަދެއްގެ ކުށްވެރިން ދޫކޮށްލުމުން" ވީ ގޮތެއް ކަމަށް ވިދާޅުވެ، ފުލުހުންގެ ތަރުޖަމާނު އަހުމަދު ޝިފާން ދެއްކެވީ މަގާމާ ނުބައްދަލު ވާހަކައެއް ކަމަށް ކުރީގެ ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެ އެވެ.
ހަމީދު ވިދާޅުވި ގޮތުގައި މިފަދަ ޒިންމާދާރުކަން ކުޑަ ވާހަކައެއް ދެއްކުމަކީ ފުލުހުންގެ މުއައްސަސާ ތަމްސީލުކުރައްވާ ތަރުޖަމާނަކު ދައްކަވަންވާ ވާހަކައެއް ނޫނެވެ. އަދި މިއީ މިހާރު ވެސް ހީނަރުވެފައިވާ އެ މުއައްސަސާގެ އަދުލުވެރިކަމާއި ޕްރޮފެޝަނަލިޒަމަށް ރައްޔިތުންގެ އިތުބާރާއި ޔަގީންކަން ގެއްލިގެންދާ ކަމެއްގެ ގޮތުގައި އޭނާ ފާހަގަކުރެއްވި އެވެ.
އޭގެ އިތުރުން ހަމީދު ވިދާޅުވީ, ބޮޑެތި ކުށްތަކުގައި ދައުވާ ލިބޭ އަދި ތަކުރާރުކޮށް ކުށްކުރާ މީހުން ޝަރުއީ ބަންދުން ދޫކޮށްލުމުގައި ނުވަތަ ޕެރޯލާއި މައާފު ދިނުމުގައި ސަރުކާރުތަކުން ނުފޫޒު ފޯރުވުމަކީ މައްސަލައެއް ކަމަށެވެ. އަދި ކޮންމެ ސިޔާސީ ޕާޓީއެއް ވެރިކަމުގައި އޮތަސް ރާއްޖޭގައި މިކަން އާދައަކަށް ވެފައިވާ ކަމަށް ވެސް އޭނާ ވިދާޅުވި އެވެ.
"ކުށްކުރާ މީހުން އަބަދުވެސް ތިބެންޖެހޭނީ ޖަލުގައި ކަމަށް ގަބޫލު ކުރުމަކީ ފުށުއަރާ ވިސްނުމެއް. ޕެރޯލާއި މައާފް ދިނުމަކީ ގާނޫނީ މަރުހަލާގެ ތެރޭގައި ހިމެނޭ, އެކަމަކު ޒިންމާދާރުކަމާ އެކީގައި ތަންފީޒު ކުރަން ޖެހޭ ކަމެއް," ހަމީދު ވިދާޅުވި އެވެ.
ގާނޫނު ތަންފީޒު ކުރުމަކީ ގޮންޖެހުންބޮޑު މަސައްކަތެއްކަން ފާހަގަކުރައްވާ ހަމީދު ވިދާޅުވީ އަމާޒު ހިފަންވީ އެހެން މީހުންނަށް އިނގިލި ދިއްކުރުމުގެ ބަދަލުގައި ހުރަސްތަކާއެކު ވެސް އަމިއްލަ ނަފްސު ޖަވާބުދާރީ ކުރުވައި, އެ ހުރަސްތަކުން އަރައިގަނެވޭނެ ގޮތްތައް ހޯދަން ކަމަށެވެ.
އޭނާ ވިދާޅުވި ގޮތުގައި ވަކިވަކި އިސް އޮފިސަރުން ނުވަތަ މުއައްސަސާ ތަމްސީލުކުރައްވާ ބޭފުޅުން ނުހައްގުން އަމަލު ކުރުމަކީ މާޔޫސްވާ ކަމެކެވެ. އެއީ ނުރައްކާތެރި އަދި ރައްޔިތުންގެ ހިމާޔަތުގައި އޮތް މުއައްސަސާއަކަށް އިތުރު ގެއްލުމެއް ލިބުމުގެ މަގު ފަހިކޮށްދޭ ކަމެއް ކަމުގައި ވެސް ހަމީދު ވިދާޅުވި އެވެ.
"ހިތާމައަކީ، ސަރުކާރުގެ އިސް މަގާމުތަކުގައި ތިއްބެވި ބޭފުޅުންވެސް މިފަދަ [ނުހައްގު] އަމަލުތައް ކުރައްވަމުން ގެންދަވާތަން ފެންނާތީ. އެންމެ ބޮޑު ކަންބޮޑުވުމަކީ، ރައްޔިތުންނަށް ހިދުމަތްދޭ މުއައްސަސާތަކުގެ ތެރޭގައި، އަދި އެންމެ މަތީ ފަންތީގައިވެސް، މިދެންނެވި ފަދަ ފަރާތްތައް ޖަވާބުދާރީ ކުރުވުމުގެ އިހްލާސްތެރިކަން ނެތުން," ހަމީދު ވިދާޅުވި އެވެ.
"މާލޭގައި ވަގުންގެ ބޮޑު ނެޓްވޯކެއް، ހުއްޓުވޭނެ ގޮތެއް ނެތް!" މި ސުރުހީގެ ދަށުން "އަދަދު" ގައިި ޖެހި ރިޕޯޓް ސޯޝަލް މީޑިއާ އެކްސްގައި ހިއްސާކުރައްވަމުން ޝިފާން ވިދާޅުވީ އެއީ "ހިތި ހަގީގަތް" ކަމަށް ފުލުހުން ގަބޫލު ކުރާ ކަމަށެވެ.
އެހެން މެދުވެރިވި ސަބަބެއްގެ ގޮތުގައި ޝިފާން ވިދާޅުވީ މީގެ 10 މަސް ކުރިން ޖަލުން ދޫކޮށްލި 454 އެއްހާ މީހުން މުޖުތަމައަށް ދޫވެފައި ތިބުމެވެ.
"434 މީހުންގެ ބޮޑު [ކުށްވެރިންގެ] އާބާދީއެއް، މީގެ 10 މަސް ދުވަހުގެ ކުރިން އެމްސީއެސް އިން ދޫކޮށްލުމާއި، ޒަމާނާ އެކީގައި އުމްރާނީ ތަރައްގީގެ ބިނާތަކެއް ނުލިބުމުގެ ސަބަބުން، އަޅުގަނޑުމެން މިތިބީ ވަރަށް ބޮޑު [ކުށުގެ] ކާރިސާއެއްގައި،" ޝިފާން ލިޔުއްވާފައިވެ އެވެ.
ޝިފާންގެ އެ ޕޯސްޓަށް އެކްސްގައި ޖަވާބުދިން ބައެއް މީހުން ބުނީ އެއީ "މާނައެއް ނެތް ބަހަނާއެއް" ކަމަށެެވެ. އަދި ބަހަނާއެއްގެ ގޮތުގައި "ކުރީ ސަރުކާރު" ދެއްކުމުން ގިނަ ބައެއްގެ ފާޑުކިއުން އަމާޒުވި އެވެ.
