ޑަސެލްޑޯފް، ޖަރުމަނު (ޖޫން 18) - ޔޫރޯ ފުޓްބޯޅަ މުބާރާތުގެ އެއް ފޭވަރިޓް ކަމަށްވާ ފްރާންސުން މި ފަހަރުގެ މުބާރާތުގައި ކުޅުނު ފުރަތަމަ މެޗު، އުނދަގޫކޮށް ދިޔަ ނަމަވެސް އޮސްޓްރިއާ 1-0 އިން ބަލިކޮށް، މޮޅަކުން ފަށައިފި އެވެ.
އޮސްޓްރިއާ އިން މެޗު ފަށައިގެން ރަނގަޅަށް ކުޅުނު ނަމަވެސް، މެޗު ކުރިއަށްދިޔަ ވަރަަކަށް ފްރާންސްގެ ކޮލިޓީ ފެނުނީ މާ ވަރުގަދަކޮށެވެ.
ޑަސެލްޑޯފް އެރީނާގައި ކުޅުނު މެޗުގައި، ފްރާންސް އިން ފުރަތަމަ އެޓޭކް ކުރީ އެ ޓީމުގެ ކެޕްޓަން، ކީލިއަން އެމްބާޕޭ އެވެ. ބޮޑު މުބާރާތެއްގައި ފްރާންސްގެ ކެޕްޓަންކަން ފުރަތަމަ ފަހަރަށް ކުރި އެމްބާޕޭ އަށް އޮސްޓްރިއާ ޑިފެންސް ފަހަތުން ލިބުނު ބޯޅަ ހިފައިގެން އައިސް ފޮނުވާލި ހަމަލާ، އޮސްޓްރިއާގެ ކީޕަރު، ޕެޓްރިކް ޕެންޓްޒް ވަނީ މަތަކޮށްފަ އެވެ.
އޮސްޓްރިއާ އިން ވަނީ މެޗުގެ 36 ވަނަ މިނިޓްގައި ލަނޑު ޖަހާނެ ރަނުގެ ފުރުސަތެއް ހޯދައިފަ އެވެ. އޭރިއާތެރެއިން އޮސްޓްރިއާގެ ކެޕްޓަން، މާސެލް ސަބީޓްޒާ ޖައްސާލި ބޯޅަ ހޯދައި، އެ ޓީމުގެ ކްރިސްޓޮފް ބޯމްގާޓްނާ ޖެހި ޝޮޓް ބޭރުވީ ފްރާންސް ކީޕަރު މައިކް މައިންގްނޯން ފައިގައި ޖެހިފަ އެވެ.
އޮސްޓްރިއާގެ ގްރިލިޓްޗް ކައިރިން ފްރާންސްގެ ކާންޓޭ ބޯޅަ ހިފައިގެންދަނީ.
ބޮޑު ފުރުސަތު އޮސްޓްރިއާ އިން ނަގާލިތާ ދެ މިނިޓް ފަހުން ފްރާންސް އިން ލީޑުނެގި އެވެ. މި ލަނޑަކީ، އެމްބާޕޭ ނެގި ހުރަހެއް ދިފާއުކުރަން އަރައި، އޮސްޓްރިއާގެ ޑިފެންޑަރު، މެކްސްމިލިއަން ވޮބާ ބޮލުން ޖައްސާލި ބޯޅައަކުން ބައިކޮޅަށް ވަން ގޯލެކެވެ.
ދެ ވަނަ ހާފް ފަށައިގެން މާގިނައިރެއްނުވެ، ލީޑުފުޅާކުރަން ފްރާންސަށް ރަނުގެ ފުރުސަތެއް ލިިބިގެންދިޔަ އެވެ. އޮސްޓްރިއާގެ ދެ ޑިފެންޑަރުން ކައިރިން ދެމިގަތުމަށް ފަހު މުޅިން ހުސްކޮށް އޭރިއާތެރެއަށް ބޯޅަ ހިފައިގެން ވަދެ، އެމްބާޕޭ ޖެހި ޝޮޓް ދިޔައީ ގޯލާ ސީދާނުވެ އެވެ.
އޮސްޓްރިއާ އިން މެދުތެރޭގައި ބޯޅަ ހިފަހައްޓައިފައި ކުރިއަށް އަވަހަށް ކުޅެ އެޓޭކެއް ކުރެވޭތޯ ގިނަ މަސައްކަތް ކުރިއިރު، ކޮންމެ ބޯޅައެއްގައިވެސް ފްރާންސްގެ ޑިފެންސިވް މިޑްފީލްޑަރު، އެންގޯލޯ ކާންޓޭ ހުރީ ވަރަށް ސަމާލުވެ އެވެ.
އަނިޔާގެ ސަބަބުން ގަތަރު ވޯލްޑް ކަޕްގައި މީގެ ދެ އަހަރު ކުރިން ނުކުޅެވުނު ކާންޓޭ މިރޭ ބޮޑު މުބާރާތަކަށް އެނބުރި އައިސް ތަފާތު ދައްކައިފަ އެވެ. ސައުދީ ޕްރޯ ލީގުގައި ކުޅެމުން އަންނަ ކާންޓޭ މިރޭގެ މެޗުގައި ވަނީ އޮސްޓްރިއާގެ ގިނަ އެޓޭކެއް ހުއްޓުުވުމުގައި ތަޖުރިބާގެ ބޭނުން ރަނގަޅަށް ހިފައިފަ އެވެ.
ފްރާންސް އިން ދެ ވަނަ ލަނޑެއް ޖަހަން ކުރި މަސައްކަތުގައި އޮސްމާން ޑެމްބެލޭ އާއި މާކަސް ތުރާމް ޖެހި ބޯޅަތައް ދިޔައީ ގޯލާ މާ ދުރުންނެވެ. ބަދަަލަކަށް ކުޅެން އެރި ފްރާންސްގެ އޮލިވިއޭ ޖިރޫ އަށް އޭރިއާތެރެއިން ހުސްކޮށް ލިބުނު ފުރުސަތުގައި ފޮނުވާލަން އުޅުނު ބޯޅަ ރަނގަޅަށް ފައިގައި ލައްވާލާ ގޮތެއްނުވި އެވެ.
މިއީ އޮސްޓްރިއާއާ ދެކޮޅަށް ކުޅުނު 26 މެޗުގެ ތެރެއިން ފްރާންސް މޮޅުވި 14 ވަނަ މެޗެވެ.
މި ގްރޫޕްގެ ފުރަތަމަ މެޗުން ރޭ ނެދަލެންޑްސް ވަނީ ފަހަތުން އަރައި 2-1 އިން ޕޮލެންޑް ބަލިކޮށްފަ އެވެ. ފްރާންސަށް ދެން އޮތީ ނެދަލެންޑްސް މެޗެވެ.
