ކެނާން ޔިލްޑިޒް
18 އަހަރު
ފޯވާޑް
ތުރުކީ/ ޔުވެންޓަސް
އިޓަލީގެ ޔުވެންޓަސް އަށް ކުޅެމުން އަންނަ ތުރުކީގެ ފޯވާޑް ކެނާން ޔިލްޑިޒް އަކީ މުސްތަގުބަލުގައި ވިދާލާނެ ކުޅުންތެރިއެއް ކަމަށް، އިޓަލީގެ ފުޓްބޯޅަ ތަޖުރިބާކާރުން އަންނަނީ ބުނަމުންނެވެ. ޔިލްޑިޒް، 2022 ވަނަ އަހަރު ބޭއްވި، 17 އަހަރުން ދަށުގެ ޔޫރޯ ފުޓްބޯޅަ މުބާރާތުގައި އަނިޔާގެ ސަބަބުން ނުކުޅެ އެވެ. އެކަމަކު، އޭގެ މާޔޫސްކަމުން އަރައިގަނެ، އޭނާ މިހާރު ތައްޔާރުވަމުން އަންނަނީ މި ފަހަރުގެ ޔޫރޯ ފުޓްބޯޅަ މުބާރާތަށެެވެ.
ޖަރުމަނުގެ ބަޔާން މިއުނިކްގެ އެކެޑަމީ ދޫކޮށް، ޔުވެންޓަސް އަށް ބަދަލުވުމަށް ފަހު، އެ ކްލަބްގެ ޔޫތުން ސީނިއާ ޓީމަށް ޕްރޮމޯޓްވެ، ޔިލްޑިޒް އަންނަނީ ލިބޭ ފުރުސަތުތަކުގައި ރަނގަޅަށް ބޭނުން ހިފަމުންނެވެ. އިޓާލިއަން ލީގުގައި މި ސީޒަނުގައި، އެންމެ ބޮޑު ކުރިއެރުމެއް ހޯދި ޒުވާން ކުޅުންތެރިންގެ ތެރޭގައި ޔިލްޑިޒް ހިމެނެ އެވެ.
އިންޓަނޭޝަނަލް ލެވަލްގައި، ޖަރުމަނު ތަމްސީލްކުރުމުގެ ފުރުސަތު އޮތް، ޔިލްޑިޒް ނިންމީ، އޭނާގެ އާއިލާ ނިސްބަތްވާ ތުުރުކީ އަށް ކުޅުމަށެވެ. ޔިލްޑިޒް، ތުުރުކީ ގައުމީ ޓީމަށް ޖަހައިދިން ފުރަަތަމަ ގޯލު ކާމިޔާބުކުރީ، މިދިޔަ ނޮވެމްބަރު މަހު، ޖަރުމަނު އަތުން ތުރުކީ، 3-2 އިން މޮޅުވި މެޗުގަ އެވެ.
ޖަރުމަނަށް އުފަންވި ނަމަވެސް، ތުރުކީ އަށް ކުޅެން ނިންމުމަކީ، އެންމެ ރަނގަޅު ގޮތްކަމަށް ޔިލްޑިޒް ވެސް ވަނީ ބުނެފަ އެެވެ. އަދި ތުރުކީން މި ފަހަރު ޔޫރޯގައި ވާދަކުރާ ސްކޮޑުގައި ހިމެނި، ސީނިއާ ޓީމާ އެކު ކުޅެލަން ލިބޭ ފުރަތަމަ މުބާރާތުގައި ފެންވަރު ސާބިތުކޮށްދޭން، ޔިލްޑިޒް ބޭނުންވެ އެވެ. އޭނާ ވަނީ ތުރުކީ އަށް ފަސް މެޗު ކުޅެދީފަ އެވެ.
