ބާލިން (ޖުލައި 6) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލްގައި މިރޭ ނެދަލޭންޑްސްއާ ދެކޮޅަށް ތުރުކީ ކުޅޭ މެޗުގައި ވެސް ތުރުކީގެ ސަޕޯޓަރުން އެހީތެރިކަން އެ ޓީމަށް ލިބޭނެކަމުގެ އުންމީދުކުރާ ކަމަށް އެ ޓީމުގެ ކޯޗު ވިންޗެންޒޯ މޮންޓެލާ ބުނެފި އެވެ.
މި އަހަރުގެ ޔޫރޯގައި ތުުރުކީ މިހާތަނަށް ކުޅުނު ހުރިހާ މެޗެއްގައި ވެސް ގިނަ އަދަދެއްގެ ސަޕޯޓަރުން ދަނޑަށް ވަނެވެ. ތުރުކީގެ ބޮޑު އާބާދީއެއް ޖަރުމަންގައި ދިރިއުޅޭއިރު، މިރޭގެ ބާލިންގައި ކުޅޭ ކުއާޓާ ފައިނަލަށް މެޗަށްވެސް ގިނަ އަދަދެއްގެ ސަޕޯޓަރުން ވަންނާނެ ކަމަށް ބެލެވެ އެވެ. އަދި ޖަރުމަނު މުބާރާތުން ކަޓާފައިވާއިރު، ދެން އެ ގައުމުގައި އާބާދީގެ ނިސްބަތުން އެންމެ ބޮޑު ސަޕޯޓެއް ލިބެން އޮތީ ތުރުކީ އަށެވެ.
"މިހާތަނަށް ކުުޅުނު މެޗުތަކުގައި ތުރުކީގެ ސަޕޯޓަރުން ތަފާތު ދެއްކި. ޓީމަށް އޮތް ލޯބި ސަޕޯޓަރުން ދެއްކި. އަހަރެން އުންމީދުކުރަނީ މާދަމާ (މިރޭ)ވެސް ތުރުކީގެ ސަޕޯޓަރުން ޓީމަށް ބޮޑު ތަރުހީބެއްދޭނެ ކަމަށް. އަދި ތުރުކީގެ ސަޕޯޓަރުން އަބަދުވެސް އަހުލާގު ރަނގަޅު. އަހަރެން އުންމީދު ކުރަނީ މާދަމާ (މިރޭ) ވެސް ސަޕޯޓަރުންގެ އަހްލާގުވެސް ރަނގަޅުވާނެ ކަމަށް،" މޮންޓެލާ ބުންޏެވެ.
ތުރުކީގެ ޑިފެންޑަރު މެރިހް ޑެމިރާލް އަށް މިރޭގެ މެޗުގައި ނުކުޅެވޭނެ އެވެ. ގަދަ 16 ޓީމުގެ ބުރުގައި އޮސްޓްރިއާ ކޮޅަށް ދެ ލަނޑު ޖެހި ޑެމިރާލް ވަނީ ދެ މެޗަށް ސަސްޕެންޑްކޮށްފަ އެވެ. ޑެމިރާލް ސަސްޕެންޑްކުރީ އޮސްޓްރިއާގެ މެޗުގައި ލަނޑު ޖެހުމަށް ފަހު ދެ އަތުން ސިޔާސީ ކަމަކަށް ހިތްވަރުލިބޭ ގޮތަށް އިޝާރާތްކޮށްފައިވާތީ އެވެ.
މޮންޓެލާ ބުނީ ޑެމިރާލްގެ ސަސްޕެންޝަނަކީ "އިންސާފުވެރި ނިންމުމެއް ނޫން" ކަމަށެވެ. އެކަމަކު، ޑެމިރާލްގެ ބަދަލުގައި މިރޭގެ މެޗަށް ނެރޭ ކުޅުންތެރިޔާ އެ މަގާމު ފޫބައްދާނެ ކަމުގެ އިތުބާރު މޮންޓެލާ އަށް އެބައޮތެވެ.
"ޑެމިރާލްއާއެކު ތިން ކުޅުންތެރިންނަށް މިރޭގެ މެޗުގައި (ސަސްޕެންޝަނާހެދި) ނުކުޅެވޭ. އެކަމަކު ދެން އަރަން ތިބި ކުޅުންތެރިންވެސް ރަނގަޅު ކުޅުމެއް މީގެ ކުރިންވެސް ވަނި ދައްކައިފަ. އެހެންވީމަ އަހަރެން އެހާ ފިކުރު ބޮޑެއް ނުވޭ،" މޮންޓެލާ ބުންޏެވެ.
މޮންޓެލާ އަށް ދެން އޮތް ހިތްހަމަޖެހުމަކީ، ސަސްޕެންޝަނަށް ފަހު، ޓީމުގެ ކެޕްޓަން، ހަކަން ޗަނޮނޯލޫ އަށް ކުޅެވުމެވެ.
ތުރުކީ އާއި ނެދަލެންޑްސް އެންމެ ފަހުން ބައްދަލުކޮށްފައިވަނީ، 2022 ވަނަ އަހަރުގެ ވޯލްޑް ކަޕް ކޮލިފައިންގަ އެވެ. އެ ގޮތުން، 2021 ވަނަ އަހަރު މާޗް މަހު ތުރުކީން 4-2 އިން މޮޅުވިއިރު، ސެޕްޓެމްބަރު މަހު، ނެދަލެންޑްސް މޮޅުވީ 6-1 އިންނެވެ. މި ދެ ޓީމު ކުޅޭ މެޗު ފަށާނީ މިރޭ 12 ޖަހާއިރު އެވެ.
