ވަރެން ޒައިރް-އެމެރީ
18 އަހަރު
މިޑްފީލްޑަރު
ފްރާންސް/ ޕީއެސްޖީ
މި ފަހަރުގެ ޔޫރޯ ފުޓްބޯޅަ މުބާރާތަށް ފްރާންސްގެ ކޯޗު ޑިޑިއޭ ޑެޝޯމްޕްސް ނެގި ސްކޮޑަށް ބަލާއިރު، ފުރުސަތު ދިން ޒުވާން ކުޅުންތެރިންގެ ތެރެއިން އެންމެ ހަނގު އުމުރުގެ ކުޅުންތެރިއަކީ، ވަރެން ޒައިރް-އެމެރީ އެވެ. އުމުރުން އެންމެ 18 އަހަރުގެ ޒައިރް-އެމެރީ އަށް ފުރުސަތު ދިނުމުގައި، ޑެޝޯމްޕްސްގެ ވިސްނުން އެންމެ ބޮޑަށް ބައްޓަން ކުރީ، މުސްތަގުބަލުގައި ވިދާލާނެ ކުޅުންތެރިއަކު ޓީމުގައި ހިމެނުމަށެވެ.
ޕީއެސްޖީގެ ކޯޗުކަމާ ލުއިސް އެންރީކޭ ހަވާލުވުމަށް ފަހު، ޒައިރް-އެމެރީ އަށް ފުރުސަތު ދޭ ނިސްބަތް ފެނުނީ އިތުރުކޮށެވެ. ސީޒަނު ތެރޭގައި އެކި ފަހަރު މަތިން އެންރީކޭ ވަނީ ޒައިރް-އެމެރީ އަށް ތައުރީފުކޮށް ވާހަކަ ދައްކައިފަ އެވެ.
ޒައިރް-އެމެރީ އަށް ފްރާންސް ސީނިއާ ޓީމުން ފުރަތަމަ ފަަހަރަށް ފުރުސަތު ދިނީ، މިދިޔަ އަހަރު ނޮވެމްބަރު މަހު، ޔޫރޯ ކޮލިފައިން މެޗެއްގަ އެވެ. އެއާ އެކު، ޒައިރް-އެމެރީ ވެފައިވަނީ، 1914 ވަނަ އަހަރަށް ފަހު، ފްރާންސް ގައުމީ ޓީމަށް ކުޅޭ އެންމެ ހަގު ކުޅުންތެރިޔާ އަށެވެ. ފުރަތަމަ ފަހަރަށް ފްރާންސަށް ކުޅެދިން މެޗުގައި، ޒައިރް-އެމެރީ ވަނީ ގިބްރޯލްޓާ ކޮޅަށް ގޯލު ޖަހައިފަ އެވެ. މިއާ އެކު، ޒައިރް-އެމެރީ ވެފައިވަނީ، ފްރާންސް ގައުމީ ޓީމަށް ގޯލެއް ޖަހައިދިން، ދެ ވަނަ އަށް އެންމެ ހަގު ކުޅުންތެރިޔާ އަށެވެ.
ތިރީސް އަހަރު ތެރޭ، ފްރާންސްގެ 21 އަހަރުން ދަށުގެ ޓީމެއްގެ ކެޕްޓަންކަން ކުރި އެންމެ ޒުވާން ކުޅުންތެރިޔާ، ޒައިރް-އެމެރީ އަކީ، މި ފަހަރުގެ ޔޫރޯގައި ފްރާންސްގެ ކޯޗު ޑެޝޯމްްޕްސްގެ ޕްލޭނުގެ ތެެރެއިން ޖާގަ ހޯދާނެ ކުޅުންތެރިއެކެވެ.
