ކްރޮއޭޝިއާ އަކީ މި ފަހަރުގެ ޔޫރޯ ފުޓްބޯޅަ މުބާރާތަށް އެންމެ ފަހުން ކޮލިފައިވި ހަތަރު ޓީމުގެ ތެރެއިން ޓީމެކެވެ. ކްރޮއޭޝިއާ އިން އަންނަނީ 2004 ވަަނަ އަހަރުން ފެށިގެން ގަވާއިދުން ޔޫރޯ ފުޓްބޯޅަ މުބާރާތުގައި ވާދަކުރަމުންނެވެ. މިއީ، ކްރޮއޭޝިއާ އިިން ޔޫރޯ ފުޓްބޯޅަ މުބާާރާތުގައި ވާދަކުރާނެ، ހަތް ވަނަ ފަހަރެެވެ.
ފީފާ ވޯލްޑް ކަޕްގެ ފައިނަލުގައި ވެސް ކުޅެފައިވާ ކްރޮއޭޝިއާ އަށް މިހާތަނަށް ޔޫރޯ ފުޓްބޯޅަ މުބާރާތުގައި އެންމެ ދުރަށް ވެސް ދެވިފައިވަނީ ކުއާޓާ ފައިނަލަށެވެ. އެ ޓީމުން ދެ ފަހަރެއްގެ މަތިން ކުއާޓާ ފައިނަލުގައި ކުޅެފައިވާއިރު، އެންމެ ފަހުން ދެ ފަހަރު، ކްރޮއޭޝިއާ ޔޫރޯ އިން ކެޓީ، ގަދަ 16 ބުރުންނެވެ.
އެންމެ ފަހުން ބޭއްވި ޔޫރޯގައި ގްރޫޕް ސްޓޭޖުގައި އެއް މެޗުން މޮޅުވެގެން، ދެ ވަނަ ޓީމުގެ ގޮތުގައި ގަދަ 16 ބުރަށް ދަތުރުކޮށް، އެ ބުރުގައި، ކްރޮއޭޝިއާ ބަލިވީ އިތުރު ވަގުތުގެ ދެ ހާފް ކުޅެގެން ސްޕެއިން އަތުން، 5-3 އިންނެވެ.
މި ފަހަރުގެ ޔޫރޯ ފުޓްބޯޅަ މުބާާރާތުގައި ކްރޮއޭޝިއާ ހިމެނިފައިވަނީ، މަރުގެ ގްރޫޕެއްގަ އެވެ. މި ގްރޫޕްގައި، ސްޕެއިނާއި އިޓަލީ ހިމެނޭއިރު، ދެން އޮތީ، އަލްބޭނިއާ އެވެ. ކްރޮއޭޝިއާ އިން ގްރޫޕް ފަހަނައަޅައި ދިއުމަށް މި ފަހަރުގެ މުބާރާތުގައި ގިނަ މަސައްކަތްތަކެއް ކުރަން ޖެހޭނެ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުން ފެންނާނެ ކޯޗުންގެ ތެރެއިން އެއް ޓީމަކުން އެންމެ ގިނަ އަހަރުތަކެއް ވަންދެން ފެންނާނެ އެއް ކޯޗަކީ، ކްރޮއޭޝިއާގެ ބެންޗުން އެ ޓީމަަށް އިރުޝާދުދިނުމުގައި ހުންނާނެ، ޒްލަޓްކޯ ޑާލިޗް އެވެ. ޑާލިޗަކީ މިހާރު ކްރޮއޭޝިއާގެ ފުޓްބޯޅައިގެ ހާލަތު ވަރަށް ރަނގަޅަށް އެނގޭނެ ކޯޗެކެވެ.
ކްރޮއޭޝިއާ ޓީމު މި ފަަހަރު ވެސް އެންމެ ބޮޑަށް ބަރޯސާވާނެ ކުޅުންތެރިއަކީ އެ ޓީމުގެ މިޑްފީލްޑަރު، ލޫކަ މޮޑްރިޗް އެވެ. މޮޑްރިޗް، 38، އަކީ ކްރޮއޭޝިއާ ޓީމުގެ ރޫހެވެ.
