ޒަގްރެބް، ކްރޮއޭޝިއާ (އޮގަސްޓް 21) - ކްރޮއޭޝިއާގެ ތަޖުރިބާކާރު މިޑްފީލްޑަރު، ލޫކަ މޮޑްރިޗަށް އަންނަ މަހު ކުޅޭ ނޭޝަންސް ލީގުގެ މެޗުތަކުގެ ކްރޮއޭޝިއާ ސްކޮޑުން ފުރުސަތު ދީފި އެވެ.
މި އަހަރުގެ ޔޫރޯ ފުޓްބޯޅަ މުބާރާތަށް ފަހު ކްރޮއޭޝިއާ ޓީމުން، ޑޮމަގޯއި ވީޑާ އާއި މާސެލޯ ބްރޮޒޯވިޗް ރިޓަޔާކުރި އެވެ. އެކަމަކު، އަންނަ މަހު 39 އަހަރު ފުރޭ މޮޑްރިޗް ވަނީ ގައުމީ ޓީމަށް ކުޅުން ހުއްޓާލަން އަދި ނިންމާފައިނުވާ ކަމަށް ބުނެފަ އެވެ.
"އަހަރެން ވަރަށް އުފަލުން މި ހުރީ އަހަރެމެންގެ ކެޕްޓަން އަދިވެސް ޓީމުގައި ހުރީމަ،" މޮޑްރިޗް ސްކޮޑަށް ނެގުމަށް ފަހު، ކްރޮއޭޝިއާގެ ކޯޗު ޒްލަޓްކޯ ޑާލިޗް ބުންޏެވެ.
"ދަނޑުމަތީގައި ވެސް ދަނޑުން ބޭރުގައި ވެސް އަހަރެމެންގެ ހިތްވަރަކީ އޭނަ (މޮޑްރިޗް)"
ރެއާލް މެޑްރިޑަށް ކުޅެމުން އަންނަ މޮޑްރިޗް ވަނީ އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގައި، ކްރޮއޭޝިއާ އިން ކުޅުނު ތިން މެޗުގައި ވެސް ފުރަތަމަ އެގާރައިގައި ކުޅެފަ އެވެ.
ފްރާންސް ފުޓްބޯލް އިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް، 2018 ވަނަ އަހަރު ހޯދީ މޮޑްރިޗް އެވެ. މޮޑްރިޗްގެ އެންމެ ބޮޑު އުންމީދަކީ ކްރޮއޭޝިއާއާ އެކު ކާމިޔާބެއް ހޯދުމެވެ. އެ ގޮތުން، މޮޑްރިޗް ވަނީ ކްރޮއޭޝިއާއާ އެކު، 2018 ވަަނަ އަހަރުގެ ފީފާ ވޯލްޑް ކަޕް ފައިނަލާއި 2023 ވަނަ އަހަރުގެ ޔުއެފާ ނޭޝަންސް ލީގުގެ ފައިނަލުގައި ވެސް ކުޅެފަ އެވެ.
މޮޑްރިޗް ވަނީ ކްރޮއޭޝިއާ ގައުމީ ޓީމަށް ކުޅުނު 178 މެޗުން 26 ލަނޑު ޖަހައިދީފަ އެވެ.
ނޭޝަންސް ލީގުގައި އަންނަ މަހު ކްރޮއޭޝިއާ ކުޅޭނީ ޕޯޗުގަލް އާއި ޕޮލެންޑާ އެވެ.
