ލައިޕްޒިގު (ޖޫން 28) - ޔޫރޯ ފުޓްބޯޅަ މުބާރާތުގައި ފަހު ވަގުތު އިޓަލީން ގޯލު ޖަހައި، ކްރޮއޭޝިއާއާ 1-1 އިން އެއްވަރުކުރިއިރު، ކޮރޮއޭޝިއާ މިހާރު ވަނީ މުބާރާތުން ކަޓައިފަ އެވެ.
އެ މެޗަށް ފަހު، އިޓަލީގެ ނޫސްވެރިއަކު ކްރޮއޭޝިއާގެ މޮޑްރިޗަށް ތައުރީފުކުރިއިރު، އޭނާ ވަނީ އެ ނޫސްވެރިޔާ އަށް ޝުކުރުއަދާކޮށްފަ އެވެ.
ނޫސްވެރިންގެ ބައްދަލުވުމުގެ ތެރެއިން، އިޓަލީގެ ނޫސްވެރިޔާ، ސުވާލެއް ކުރުމަށް އެދުމަށް ފަހު ބުނީ، އިޓަލީ މެޗުގައި މޮޑްރިޗް، 38، ގެ ފަރާތުން ފެނުނު ކުޅުމުގެ އިތުރުން، އޭނާގެ ކެރިއަރުގައި ފުޓްބޯޅަ އަށް ކޮށްދީފައިވާ ކަންތައްތަކަށް ޝުކުރު އަދާކުރާ ކަމަށެވެ. އަދި އެދެނީ މޮޑްރިޗް ފުޓްބޯޅަ ކުޅުން ހުއްޓާނުލަން ކަމަށް ވެސް ވަނީ ބުނެފަ އެވެ.
ޖަވާބުގައި، މޮޑްރިޗް ބުނީ، އޭނާއާ ބެހޭގޮތުން ދެއްކި ވާހަކަތަކަށް ޝުކުރު އަދާކުރާ ކަމަަށާއި އެކަމަކު، ކޮންމެ ވެސް ދުވަހަކުން ފުޓްބޯޅަ ކުޅުން ހުއްޓާލަން ޖެހޭނެކަން ގަބޫލުކުރާ ކަމަށެވެ.
"އަހަރެން ވެސް ކެރިއަރު ކުރިއަށް ގެންދަން ބޭނުން. އެކަމަކު އަންނާނެ ދުވަހެއް އަހަރެން ވެސް ކުުޅުން ހުއްޓާލަން ޖެހޭ. އަހަރެން ކުޅެވުނުހާ ދުވަހެއް ވަންދެން ކުޅެވޭތޯ ބަލާނަން. އަހަންނާ މެދު ތިޔަ ބަހައްޓާ ގާތްކަމަށް ޝުކުރު އަދާކުރަން، ތިޔަ ބުނި ރަނގަޅު ބަސްތަކަށް ވެސް ޝުކުރު އަދާކުރަން،" މޮޑްރިޗް ބުންޏެވެ.
މި ފަހަރުގެ ޔޫރޯ ފުޓްބޯޅަ މުބާރާތަކީ މޮޑްރިޗްގެ ފަސް ވަނަ ޔޫރޯ އެވެ. އޭނާ ވަނީ 2008، 2012، 2016 އަދި 2020 ވަނަ އަހަރުގެ ޔޫރޯގައި ވެސް ކުޅެފަ އެވެ.
އިޓަލީ މެޗުގައި، ކްރޮއޭޝިއާގެ ކެޕްޓަން، މޮޑްރިޗް ޖެހި ޕެނަލްޓީ އިޓަލީ ކީޕަރު ޑޮނަރުންމާ ވަނީ މަތަކޮށްފަ އެވެ. އެ ޕެނަލްޓީ މަތަކުރިތާ ކުޑައިރުކޮޅެއް ފަހުން، ކްރޮއޭޝިއާ އިން ކުރި އެޓޭކެއްގައި، އެ ޓީމުގެ އަންޓޭ ބުޑިމީރު ޖެހި ބޯޅައިން ކީޕަރު ޑޮނަރުންމާ އަތުގައި ޖެހިފައި އައި ރީބައުންސެއް ގޯލަށް ވައްދާލައި، މޮޑްރިޗް ވަނީ އެ ޓީމަށް ލީޑުނަގައިދީފަ އެވެ. އުމުރުން 38 އަހަރުގެ މޮޑްރިޗަކީ ޔޫރޯގައި ލަނޑު ޖެހި އެންމެ ދުވަސްވީ ކުޅުންތެރިޔާ އެވެ.
ފަހު ވަގުތު އިޓަލީން ކްރޮއޭޝިއާއާ އެއްވަރުކުރުމުން، އެ ޓީމު ދިޔައީ ގްރޫޕްގެ ތިން ވަނަ އެވެ. ކްރޮއޭޝިއާ ކެޓީ، އެންމެ ރަނގަޅު ނަތީޖާ ނެރޭ ތިން ވަނަ އަށް ދިޔަ ޓީމުތަކުގެ ގަދަ ހަތަރަކުން ވެސް ފުރުސަތު ނުލިބުމުންނެވެ. ހަ ގްރޫޕްގެ ތިން ވަނަ އަށް ދިޔަ ޓީމުތަކުގެ ރޭންކިން އަށް ބަލާއިރު، ކްރޮއޭޝިއާ ދިޔައީ އެންމެ ފުލަށެެވެ.
މި ފަހަރުގެ ޔޫރޯ އަކީ މޮޑްރިޗްގެ ކެރިއަރުގެ ފަހު ޔޫރޯ އެވެ. ފަހު މުބާރާތްތޯ އޭނާ އަދި ނުނިންމަ އެވެ.
މޮޑްރިޗްގެ ކެރިއަރު ފެށީ ކްރޮއޭޝިއާގެ ޑީނަމޯ ޒަގްރެބް އިންނެވެ. އެއަށް ފަހު، 2008 ވަނަ އަހަރު ޓޮޓެންހަމް ހޮޓްސްޕާސް އަށް ބަދަލުވެ، ޔޫރަޕްގެ ބޮޑެތި ކްލަބުތަކަށް މޮޑްރިޗް ފާހަގަވިއެވެ. ސްޕެއިންގެ ރެއާލް މެޑްރިޑަށް މޮޑްރިޗް ބަދަލުވީ 2012 ވަނަ އަހަރެވެ.
ރެއާލްގައި މޮޑްރިޗް ވަނީ ކާމިޔާބު އަހަަރުތަކެއް ހޭދަކޮށްފަ އެވެ. އެ ކްލަބާ އެކު ހަ ފަހަރު ޗެމްޕިއަންސް ލީގު ކާމިޔާބުކުރި އެވެ. އަދި ސްޕެނިޝް ލީގު ވެސް ހަތަރު ފަހަރު ކާމިޔާބުކޮށްފި އެވެ.
