މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެނޭޖިން ޑިރެކްޓަރުގެ ވެހިކަލް ވަގަށް ނެގި މައްސަލައާ ގުޅިގެން ކުރާ ތަހުގީގުގައި ޓްރާންސްޕޯޓް މިނިސްޓްރީގެ ބޮޑެތި އޮޅުވައިލުންތަކެއް ފެންމަތިވެއްޖެ އެވެ.
ފުލުހުން އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިޓެންޑެންޓް އޮފް ޕޮލިސް މުހައްމަދު ދާވޫދު ވިދާޅުވީ އެ މައްސަލައާ ގުޅިގެން ކުރާ ތަހުގީގުގައި ވެހިކަލްތަކެއްގެ ރަޖިސްޓްރީ ޓްރާންސްޕޯޓު މެދުވެރިކޮށް، އަދި ނުވެސް އަންނަ އަހަރު އަހަރުތަކުގެ ތާރީހުތައް ޖަހައިގެން ރަޖިސްޓްރީކޮށްފައިވާކަން ހޯދިފައިވާ ކަމަށެވެ.
އެ މައްސަލަ ވަރަށް ސީރިއަސްކޮށް ތަހުގީގު ކުރަމުންދާ ކަމަށާއި ޓްރާންސްޕޯޓު މިނިސްޓްރީން އެކަމަށް ބޭނުންވާ ހުރިހާ އެއްބާރުލުމެއް ލިބެމުން އަންނަ ކަމަށް ވެސް އޭނާ ވިދާޅުވި އެެވެ.
"ވެހިކަލްތަކުގެ ރެޖިސްޓްރީ ޓްރާންސްޕޯޓު މެދުވެރިކޮށް 2023 ގެ ކުރީގައި, 2025, 2026, 2027, ބައްދަލުނުކުރާ އަހަރުތަކުގެ ނަމުގައި ވެހިކަލް ރެޖިސްޓްރީކޮށް ރެޖިސްޓްރީ އިޝޫކޮށްފައިވާ ކަމަށް ފާހަގަކުރެވިފައިވޭ," ދާވޫދު ވިދާޅުވި އެވެ.
ވެހިކަލް ވަގަށް ނެގި މައްސަލައާ ގުޅިގެން ހައްޔަރުކުރީ އަހްމަދު ނިޒާމް, 43, މ. މޮޑަން ކޮމެޓް އަދި އެމްއޭސީއެލްގެ ސްޓާފެއް ކަމަށްވާ މުހައްމަދު ހައިޝަމް, 42, މ. ސީނިއަސުރުމާގެ އެވެ.
އޭގެ ތެރެއިން ނާޒިމްގެ ގަރާޖުގައި 100 ވެހިކަލް ވަނީ ރަޖިސްޓްރީކޮށްފަ އެވެ. އޭގެ ތެރެއިން ހަތަރު ފުރޮޅުލީ 86 ވެހިކަލުގެ ތެރެއިން 42 ވެހިކަލެއް ނިޒާމުގެ އަންހެނުންގެ ނަމުގައި ރަޖިސްޓްރީކޮށްފައިވާއިރު، ބާކީ ވެހިކަލްތައް ހުރީ އޭނާގެ ނަމުގަ އެވެ.
ނިޒާމްގެ މައްސަލަ ޕީޖީއަށް ފޮނުވި ނަމަވެސް މި މައްސަލައިގެ "ބޮޑުކަމާއި, ފުންކަމާއި, އިންތައް ނޭނގޭތީ" ޓްރާންސްޕޯޓު ތެރެއިން ޖަރީމާ ހިންގުމުގައި ތިބި މީހުން ހޯދައި ފިޔަވަޅު އަޅަން ތަހުގީގު ކުރިއަށްދާ ކަމަށް ވެސް ފުލުހުން ބުނެފައިވެ އެވެ..
"ގެންދާ ބޮޑެތި ވެހިކަލްތައް, އޭގެ އަސްލު އޮޅުވާލުމަށް މަސައްކަތް ކޮށް އޭގެ އިންޖީނު ނަންބަރާއި ޗޭސިސް ނަންބަރު ކަހާލުމަށް ފަހު ފުޅާ ދާއިރާއެއްގައި މި ވިޔަފާރި ދިޔައީ ކުރަމުން." ފުލުހުން ބުނި އެވެ
މާލޭގައި ދުވާލަކަށް ރަޖިސްޓްރީކުރާ ވެހިކަލުގެ އަދަދު 200 އިން 20 އަށް ދަށްކޮށްފައިވާ ކަމަށް ޓްރާންސްޕޯޓް މިނިސްޓްރީން ވަނީ މީގެ ކުރިން ބުނެފަ އެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގައި އޭރުގެ އެންވަޔަރަމެންޓު މިނިސްޓަރު އައިޝަތު ޝައުނާ ވިދާޅުވެފައިވާ ގޮތުގައި މާލޭގެ ކޮންމެ އަކަ ކިލޯމީޓަރަކަށް 10،000 އުޅަނދު އެބަހުއްޓެވެ. މިދިޔަ ސަރުކާރުގައި ވެސް ވެހިކަލް އެތެރެކުރުން ކޮންޓްރޯލްކުރުމަށް މަސައްކަތްތަކެއް ކުރި އެވެ.
