ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މެއި މަހުގެ ދެވަނަ ދުވަހާ ހަމައަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއަށް 40 ސިޔާސީ މުވައްޒަފުން އައްޔަނު ކުރައްވާފައިވާ ކަމަށް އެ މިނިސްޓްރީން މައުލޫމާތު ދީފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން ވަނީ ނޮވެމްބަރު 17, 2023 އިން މެއި 1, 2024 އާ ހަމައަށް އެ މިނިސްޓްރީގައި ތިބި ސިޔާސީ މުވައްޒަފުންގެ މައުލޫމާތު ހޯދުމަށް އެދިފަ އެވެ.
ކޮންސްޓްރަކްޝަން މިނިސްޓްރީން ވަނީ އެ މުއްދަތުގައި އައްޔަންކޮށްފައިވާ ސިޔާސީ މުވައްޒަފުންގެ ތަފުސީލު ދީފަ އެވެ.
ކޮންސްޓްރަކްޝަން މިނިސްޓްރީގެ ސިޔާސީ މަގާމުތަކުގެ އަދަދާއި ލިބޭ މުސާރަ:
- އެއް މިނިސްޓަރު - 58,500ރ.
- ހަތަރު ސްޓޭޓް މިނިސްޓަރުން - މީހަކަށް 43,500ރ
- އަށް ޑެޕިއުޓީ މިނިސްޓަރުން - މީހަކަށް 31,500ރ.
- 16 ސީނިއާ ޕޮލިޓިކަލް ޑިރެކްޓަރުން - މީހަކަށް 25,500ރ.
- 11 ޕޮލިޓިކަލް ޑިރެކްޓަރުން - 20،500ރ.
މި މައުލޫމާތަށް ބަލާއިރު އެ މިނިސްޓްރީގެ ސިޔާސީ މުވައްޒަފުންގެ މުސާރަ ދިނުމަށް މަހެއްގެ މައްޗަށް 1،118،000ރ. (އެއް މިލިއަން އެއްލައްކަ އަށާރަ ހާސް ރުފިޔާ) ހޭދަވެ އެވެ. އެއީ، އަހަރެއްގެ މައްޗަށް 13،416،000ރ. (ތޭރަ މިލިއަން ހަތަރުލައްކަ ސޯޅާ ހާސް ރުފިޔާ) އެވެ.
އެހެންކަމުން ކޮންސްޓްރަކްޝަން މިނިސްޓަރީގެ ސިޔާސީ މުވައްޒަފުންނަށް މަހެއްގެ މައްޗަށް ހަރަދު ކުރާ ފައިސާއިން 139 ސިވިލް ސާވަންޓުންނަށް މުސާރަ ދެވޭނެ އެވެ. ސިވިލް ސާވަންޓެއްގެ އެވަރެޖު މުސާރައަކީ މަހަކު 8000ރ. އެވެ.
ރައީސް މުއިއްޒުގެ ފަސް އަހަރުގެ ދައުރުގެ ތެރޭގައި އެ އަދަދު 160 މިލިއަން ރުފިޔާ ފަހަނައަޅައި ދާނެ އެވެ.
މިދިޔަ ސަރުކާރުގެ ފުރަތަމަ ދެ އަހަރު ދުވަހު ވެސް ސިޔާސީ މުވައްޒަފުންގެ އަދަދު 40 އާ ގާތްކޮށްފައެއް ނުވެ އެވެ. މިދިޔަ ސަރުކާރުގެ ދުވަސްވަރު ހައުސިން މިނިސްޓަރީ އެންޑް އިންފްރާސްޓްރަކްޗާއިން އާންމު ކޮށްފައިވާ މައުލޫމާތަށް ބަލާއިރު 2020 ގެ ނިޔަލަށް އެ މިނިސްޓަރީގައި ތިބީ 25 ސިޔާސީ މުވައްޒަފުންނެވެ.
މި ސަރުކާރު ވެރިކަމަށް އައީ ސިޔާސި މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ވައުދުވަމުންނެވެ. އެކި މަސްދަރުތަކުން ހޯދި މައުލޫމާތުތަކުން އެނގޭ ގޮތުގައި މި އަަދަދު މިހާރު 2,000 އާ ގާތްކުރާނެ އެވެ.
ވަކިވަކި މިނިސްޓްރީތަކުން އާރުޓީއައިއަށް ޖަވާބު ދެމުން ސިޔާސީ މަގާމުތަކުގެ އަދަދު ހާމަކުރި ނަމަވެސް ހުރިހާ މިނިސްޓްރީތަކުން އެ މައުލޫމާތު ނުލިބޭތީ އެ އަދަދު ކަށަވަރު ކުރެވިފައި ނުވެ އެވެ.
