އިޒްރޭލު ޕާސްޕޯޓްގައި ރާއްޖެއަށް މީހުން ދަތުރުކުރުން މަނާކުރަން ރައްޔިތުންގެ މަޖިލީހަށް ހުށަހަޅުއްވާފައިވާ ބިލާ މެދު ގޮތެއް ނިންމާއިރު ގިނަ ކަންތައްތަކަށް ބަލަން ޖެހޭ ކަމަށް ދިއްގަރު ދާއިރާގެ މެންބަރު އަދި މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
ފަލަސްތީނުމީހުންނާ ދެކޮޅަށް އިޒްރޭލުން ހިންގާ ނަސްލުހޭދު [ޖެނޮސައިޑް] އާ ދެކޮޅު ހެދުމުގެ ގޮތުން އިޒްރޭލު ޕާސްޕޯޓް ރާއްޖޭގައި މަނާކުރުމަށް އިމިގްރޭޝަން ގާނޫނަށް ބަދަލުގެންނަން މަޖިލީހަށް ބިލެއް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ. ވިހިވަނަ ރައްޔިތުންގެ މަޖިލީހަށް ހުށަހެޅި ފުރަތަމަ ބިލުގެ ގޮތުގައި އޮތް އެ ބިލުގެ ބަހުސް ފެށީ މިއަދުގެ ޖަލްސާގަ އެވެ.
އެ ބަހުސްގައި ނާޒިމް ވިދާޅުވީ ބިލަށް ތާއީދުކުރައްވާ ކަމަށާ ކޮމިޓީން ބިލު ދިރާސާކުރާ އިރު ބަލަން ޖެހޭ ބައެއް ކަންތައްތއް އެބަހުރި ކަމަށެވެ.
އެގޮތުން ބަލަން ޖެހޭ އެއް ކަމަކީ އޭނާ ވިދާޅުވި ގޮތުގައި އިގުތިސާދީ ގޮތުން ރާއްޖެއަށް ވެދާނެ ގެއްލުމެކެވެ. ބިލުގެ ކަންތައްތައް ނިންމަން ޖެހޭނީ އިގުތިސާދީ ގޮތުން ގެއްލުން ނުވާނެ ގޮތަކަށް ކަމަށް އޭނާ ވިދާޅުވި އެވެ.
"އެހެންވީމާ މިމައްސަލަ ކޮމިޓީއަށް ގޮސް، ކޮމިޓީގައި ބަހުސްކުރެވޭ އިރު މިކަމުގެ އެންމެ އަޑިއަށް ވާސިލުވެ، މިކަމުން އަންނާނެ އިމްޕެކްޓްގެ ރަަނގަޅު އެސެސްމެންޓެއް ހެދުމަކީ ވަރަށް މުހިންމު ކަމެއް،" ނާޒިމް ވިދާޅުވި އެވެ.
އިގުތިސާދީ ގޮތުން ބަލަން ޖެހޭ ކަންތައްތައް ތަފްސީލުކުރައްވަމުން އޭނާ ވިދާޅުވީ ރާއްޖެއަށް އަންނަން ރިޒަވޭޝަންތަކެއް ހަދާފައި ތިބި މީހުންތަކެއް މިހާރު ވެސް ތިބޭނެ ކަމަށެވެ. އެ ރިޒަވޭޝަންތަކާ މެދު ކަންތައްތައް ނިމޭ ގޮތް ބިނާވާނީ މި ބިލުގެ މައްޗަށް ކަމަށް ވެސް ވިދާޅުވި އެވެ.
"އެމީހުން ދައްކާފައި ހުރި ފައިސާއާ އެމީހުންގެ ބުކިންތަކާ އެއްޗިހި ކެންސަލްކުރުމާ ދޭތެރޭ ވެސް ރިސޯޓްތަކުން ވެސް ހަމަ ކަންބޮޑުވުން އޮންނާނެ، އަދި ކެންސަލްކުރާ ނަމަ، އެމީހުންނަށް ނާދެވޭ ނަމަ އެފައިސާ އަނބުރާ ދައްކަން ވެސް ޖެހޭނެ،" ނާޒިމް ވިދާޅުވި އެވެ.
އޭނާ ވިދާޅުވީ ކޮމިޓީން ބިލު ދިރާސާކުރާ އިރު ސަލާމަތާއި ރައްކާތެރިކަމުގެ ގޮތުން ވެސް ބަލަން ޖެހޭ ކަަމަށެވެ.
"އެހެންވީމާ އަޅުގަނޑުމެން ގަބޫލުކުރާ ގޮތުގައި މިކަމުގައި ކޮމިޓީގެ މަރުހަލާގައި ބައްލަވަން ޖެހޭ ހުރިހާ ނަޒަރިއްޔާތަކުން ބައްލަވައި، އެެއީ އިގުތިސާދީ ގޮތުން ވިޔަސް، ސަލާމަތީ ގޮތުން ވިޔަސް އަދި ރައްކާތެރިކަމުގެ ގޮތުން ވިޔަސް ބައްލަވަން ޖެހޭ ހުރިހާ ބެއްލެވުމެއް ބައްލަވާފައި، ކޮމިޓީން މިމައްސަލަ ނިންމައި ތަޅުމަށް ގެނެސްދެއްވުމަކީ އަޅުގަނޑުގެ ވަރަށް ބޮޑު އެދުމެއް،" އޭނާ ވިދާޅުވި އެވެ.
އެކަމުގައި ސަރުކާރަށް އަންނަ ބައެެއް ފާޑުކިޔުންތަކަށް ވެސް އޭނާ ރައްދުދެއްވި އެވެ.
އިޒްރޭލު މީހުން ރާއްޖެއަށް އެތެރެވުން ހުއްޓުވުމަށް ޓަކައި މީކާއީލް ހުށަހެޅުއްވި ބިލުގައި އޮތީ އިމިގްރޭޝަން ގާނޫނަށް އަކުރެއް އިތުރުކޮށް، އިޒްރޭލުގެ ޕާސްޕޯޓް އޮންނަ މީހުންނާއި އިޒްރޭލު ޕާސްޕޯޓާއި އެކު އެހެން ގައުމެއްގެ ޕާސްޕޯޓް އޮންނަ މީހުންނަށް ވެސް ރާއްޖެއަށް އެތެރެނުވެވޭ ގޮތަށް އެ ގާނޫނު ބަދަލުކުރުމަށެވެ.
އިބްތިދާއީ ބަހުސް ނިމުމުން ބިލު ބަލައިގަތުމާ މެދު ގޮތެއް ނިންމާނެ އެވެ. އެ ވޯޓުން ތަޅުމަށް ބިލު ބަލައިގަންނަން ފާސްވެއްޖެ ނަމަ ބިލު ދިރާސާ ކުރުމަށް ކަމާބެހޭ ކޮމެޓީއަށް ފޮނުވާނެ އެވެ.
އެ ބިލު މަޖިލީހުގެ 241 ކޮމިޓީއަށް ފޮނުވުމަށް ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ ހުށަހަޅާފަ އެވެ. ބިލު ފާސްކޮށް ގާނޫނަށް އިސްލާހު ގެނައުމަށް ވޯޓަށް އަހާނީ ކޮމެޓީ މަރުހަލާ ނިމުމުންނެވެ.
އިޒްރޭލު ޕާސްޕޯޓު މަނާކުރަން ރާއްޖެއިން ނިންމުމުން ދުނިޔޭގެ އެކި ކަންކޮޅުގައި ދިރިއުޅޭ އެކި ގައުމުތަކުގެ އާންމުން ވަނީ ރާއްޖެއަށް ތައުރީފުކޮށްފަ އެވެ. ނަމަވެސް އެކަމާ ގުޅިގެން ބައެއް ފަރާތްތަކުގެ ނުރުހުން ވެސް ރާއްޖެއަށް އަމާޒުވެފައިވެ އެވެ.
