ކަޅު ބާޒާރުގައި އެމެރިކާ ޑޮލަރެއްގެ އަގު އަނެއްކާ ވެސް 18ރ. އަށް އުފުލިއްޖެ އެވެ.
ޑޮލަރުގެ ވިޔަފާރި ކުރާ ފަރާތްތަކުން ބުނީ ޑޮލަރުގެ އަގު މިއަދު ހުރީ 18ރ. އާއި 17.80ރ. އާ ދެމެދުގައި ކަމަށެވެ.
ޑޮލަރުގެ އަގު އުފުލިފައި މިވަނީ ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވިދާޅުވިތާ ދެ މަސް ދުވަސް ވެސް ނުވަނީހެވެ.
މިއަހަރު ފެށުނުއިރު، ވެސް ޑޮލަރެއްގެ އަގު ކަޅު ބާޒާރުގައި ހުރީ 18ރ. އަށެވެ. އެހެންނަމަވެސް ފަތުރުވެރިކަމުގެ ސީޒަން ތެރޭގައި އާދައިގެ މަތިން މި އަހަރު ވެސް ޑޮލަރުގެ އަގު ދަށަށް ދިޔަ އެވެ. ޑޮލަރުގެ އަގު އެންމެ ދަށަށް ދިޔައީ މިދިޔަ މަޖިލިސް އިންތިހާބުގެ ކެމްޕެއިނު ދުވަސްވަރެވެ. އޭރު ޑޮލަރެއްގެ އަގު 17.20ރ. އަށް ވެސް ހުއްޓެވެ.
ނަމަވެސް ސީޒަން ނިމި، ފަތުރުވެރިން ރާއްޖެއަށް ޒިޔާރަތް ކުރާ މިންވަރު މަދުވާން ފެށުމާއެކު އަނެއްކާ ވެސް ޑޮލަރުގެ އަގު އުފުލެން ފެށީ އެވެ.
މާލޭގައި ޑޮލަރުގެ ވިޔަފާރި ކުރާ މީހަކު މި ނޫހާ ވާހަކަ ދައްކަމުން ބުނީ ޑޮލަރުގެ އަގު ބޮޑުވެފައި މިވަނީ ހައްޖު މޫސުމަށްވެފައި އީދު ޗުއްޓީ ވެސް ގާތްވެފައި އޮތުމުން ކަމަށެވެ. އޭގެ އިތުރުން ޑޮލަރު ލިބުމުގައި ވެސް ދަތިތަކެއް އެބަހުރި ކަމަށް އޭނާ ބުންޏެވެ.
"ވަރަށް ދަތި ޑޮލަރު ހޯދަން ވެސް މިހާރު. އަނެއްކޮޅުން ހައްޖަށް ދާ މީހުންނާއި ޗުއްޓީއަށް ދާ މީހުން ވެސް ޑޮލަރު ގަންނާނެތާ. އެހެންވެ އަގު ބޮޑުވެގެން މިއުޅެނީ،" އެ މީހާ ބުންޏެވެ.
މަނީ އެކްސްޗޭންޖު ފިހާރައެއްގައި މަސައްކަތް ކުރާ މީހަކު ބުނީ 18ރ. އަށް ވިއްކި ޑޮލަރު ވެސް މިހާރު ހުސްވެފައިވާ ކަމަށާއި ދެން ޑޮލަރު ލިބޭނީ މާދަމާ ކަމަށެވެ. ޑޮލަރުގެ އަގު ބޮޑުވީ ލިބުން ދަތިވީމަ ކަމަށް ވެސް އޭނާ ބުންޏެވެ.
ނިމިދިޔަ މަޖިލިސް ކެމްޕޭނު ތެރެއިން ފުވައްމުލަކުގައި އޮތް ޖަލްސާއެއްގައި ވާހަަކަ ދައްކަވަމުން ރައީސް މުއިއްޒު ވިދާޅުވީ ރާއްޖޭގެ އިގުތިސާދު ދަނީ ރަނގަޅުވަމުން ކަމަށާއި ސަބަބަކީ އިގުތިސާދީ މިނިވަންކަން ހޯދައިދިނުމަށް މި ސަރުކާރުން ކުރަމުން ގެންދާ މަސައްކަތް ކަމަށެވެ.
އަދި ޑޮލަރުގެ އަގު އެއްވަރެއްގައި ހިފެހެއްޓިފައި ހުންނާނެ ކަމަށް ވިދާޅުވެ އެމަނިކުފާނު ވަނީ އެކަމުގެ ސަބަބަކީ ވެސް މި ސަރުކާރުން އަޅަމުން ގެންދާ އިގުތިސާދީ ރަނގަޅު ފިޔަވަޅުތައް ކަމަށް ވިދާޅުވެފަ އެވެ.
"ޑޮލަރުގެ އަގު އިންތިހާއަށް ނާރާނެ މައްޗަކަށް، ހިފެހެއްޓިފައި ހުންނާނީ، ކުރިއަށްވުރެ ދަށަށް ދާނީ، ފައިސާގެ އަގުދަނީ މައްޗަށް، އަޅުގަނޑުމެންގެ އިގުތިސާދުގައި އެދަނީ ބޭރުގެ އިންވެސްޓަރުންގެ އިތުބާރު އަންނަމުން، ރާއްޖެއަށް ލިބޭ އާމްދަނީ އެދަނީ އެތައް ގުނައަކުން އިތުރުވަމުން،" ރައީސް އެ ރޭ ވިދާޅުވިއެވެ.
ރައީސް އެހެން ވިދާޅުވި ނަމަވެސް މިމަހުގެ އެއްވަނަ ދުވަހު އޮތް ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި ވާހަކަ ދައްކަވަމުން އެ ބޭންކުގެ ސީއީއޯ ކާލް ސްޓުމްކަ ވިދާޅުވީ ކަސްޓަމަރުންނާއި މަރުކަޒީ ބޭންކް، އެމްއެމްއޭ އިން ބީއެމްއެލްއަށް ގަންނަން ލިބުނު ޑޮލަރުގެ އަދަދަށްވުރެ އިތުރަށް 333 މިލިއަން ޑޮލަރު އެ ބޭންކުން ވިއްކާފައިވާ ކަމަށާއި އެއީ ދެމެހެއްޓޭނެ ކަމެއް ނޫން ކަމަށެވެ.
ބޭންކަށް ގަންނަން ލިބެންނެތް އެއްޗެއް ވިއްކަމުން ދިޔުމަކީ ދެމެހެއްޓެނެވި ކަމަކަށް ނުވާ ހިނދު، އެ މަގު ފަހިވަންދެން ބޭންކުގެ މާލީ ހާލަތާއި ރިސްކްތަކަށް ހުށަހެޅޭ މިންވަރު ކުޑަކުރުމަށްޓަކައި އުދަނގޫ ނިންމުންތަކެއް ނިންމަން އެ ބޭންކަށް މަޖުބޫރުވާކަމަށް ބީއެމްއެލްގެ އަހަރީ ރިޕޯޓިގައިވެސް ވަނީ ފާހަގަކޮށްފަ އެވެ.
