ލަންޑަން (ޖޫން 6) - ލެސްޓާ ސިޓީ އަށް އަލުން، އިނގިރޭސި ޕްރިމިއާ ލީގުން ޖާގަ ހޯދައިދިން އިޓަލީގެ ކޯޗު އެންޒޯ މަރެސްކާ ޗެލްސީގެ ކޯޗުކަމާ ހަވާލުވެއްޖެ އެވެ.
ނިމިގެންދިޔަ އިނގިރޭސި ލީގު ޗެމްޕިއަންޝިޕްގެ ޗެމްޕިއަންކަން ހޯދައި، ލެސްޓާ ސިޓީ އަލުން ޕްރިމިއާ ލީގުން ޖާގަ ހޯދީ މަރެސްކާގެ އިރުޝާދުގެ ދަށުންނެވެ.
މަރެސްކާ ،44، ޗެލްސީގެ ކޯޗުކަމާ ހަވާލުވީ ފަސް އަހަރު ދުވަހުގެ އެއްބަސްވުމެއްގަ އެވެ. އަދި މި އެއްބަސްވުމުގައި ވާ ގޮތުން އިތުރު އެއް އަހަރަށް ކޮންޓުރެކްޓް އާކުރުމުގެ އިހްތިޔާރު ޗެލްސީ އަށް ލިބެ އެވެ.
މަރެސްކާ ވަނީ ކުރިން މެންޗެސްޓާ ސިޓީގެ ކޯޗު ޕެޕް ގާޑިއޯލާގެ އެހީތެރިއެއްގެ ގޮތުގައި އެ ކްލަބުގައި މަސައްކަތްކޮށްފައެވެ.
"ޗެލްސީ ކަހަލަ ބޮޑު ކްލަބަކާ ގުޅުމަކީ ކޮންމެ ކޯޗެއްވެސް ދެކެން ބޭނުންވާނެ ދުވަހެއް،" މަރެސްކާ ބުންޏެވެ. "ޗެލްސީގައި އޮތީ ވަރަށް ރަނގަޅު ސްކޮޑެއް. އެ ޓީމާއެކު މަސައްކަތް ފެށުމަށް އަހަރެން މިހުރީ ކެތްމަދުވެފައި."
ޗެލްސީގެ ކޯޗަކަށް މިދިޔަ ސީޒަންގައި ހުރި އާޖެންޓީނާގެ މައުރީސިއޯ ޕޮޗެޓީނޯ ވަނީ އެ މަގާމުން ވަކިވެފައެވެ. ޗެލްސީގައި އެންމެ ސީޒަނެއް ހޭދަކުރުމަށްފަހު ޕޮޗެޓީނޯ މަގާމުން ވަކިވީ އޭނާ އާއި ކްލަބުންވެސް އެކަމަށް އެއްބަސްވެގެންނެވެ.
