މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ މުވައްޒަފަކު ހިންގި ޖިންސީ ފުރައްސާރައިގެ މައްސަލާގައި ފުރިހަމަ ތަހުގީގެއް ހިންގާފައި ނުވާތީ އެ ކުންފުނީގެ މުވައްޒަފުންގެ މަސައްކަތު މާހައުލުގެ ރައްކާތެރިކަމަށް އަސަރުކޮށްފައިވާ ކަމަށް އެ ކުންފުނީގެ ޗެއާޕާސަންގެ މަގާމުން އިސްތިއުފާދެއްވި އައިޝާ ނޫރައިން ޖަނާހު ވިދާޅުވެއްޖެ އެވެ.
އިސްތިއުފާގެ ސިޓީއާއެކު ނޫރައިން ވަނީ ޗެއާޕާސަންގެ ދައުރުގައި ފާހަގަކުރެވުނު ކޯޕަރޭޓް ގަވަނެންސާ ހިލާފު ކަންކަމާއި ގުޅޭ ރިޕޯޓެއް އިނގިރޭސި ބަހުން ހުށަހަޅާފަ އެވެ. އެ ސިޓީގައި އެޕްރީލް އެކެއްގައި އެ ކުންފުނިން ބަލަން ފެށި ޖިންސީ ފުރައްސާރައިގެ ތަހުގީގު ކުރިއަށްދިޔަ ގޮތުގެ ވާހަކަތައް ހިމަނާފައިވެ އެވެ.
އެގޮތުން، ޖިންސީ ފުރައްސާރައިގެ ތަހުގީގުތައް ހިންގުމުގައި އަމަލުކުރަން އޮންނަ ޕްރޮފެޝަނަލް މިންގަނޑުތަކަށް އެމްއެމްޕީއާރުސީގެ މެނޭޖްމަންޓުން ބޯނުލަނބާ ކަމަށާއި އެ ތަހުގީގު ހިންގާފައިވަނީ ގޯސްކޮށް ކަމަށް އޭނާ ވިދާޅުވެފައިވެ އެވެ.
"ޑިރެކްޓަރުންގެ ބޯޑުގެ ލަފަޔާއި ގާނޫނީ ލަފާ ވެސް މެނޭޖުމަންޓުން ބަލައިގަނެފައި ނުވޭ. މިއަދާ ހަމައަށް ވެސް ޖިންސީ ފުރައްސާރައިގެ ތަހުގީގުގެ މަރުހަލާތަކާއި ތަހުގީގު ރިޕޯޓު ބޯޑް އޮފް ޑިރެކްޓަރުންނާ ހިއްސާކުރަން މެނޭޖުމަންޓުން ވަނީ ދެކޮޅު ހަދާފައި. މިކަމުގެ ސަބަބުން ސްޓާފުންގެ ރައްކާތެރިކަމާއި ސްޓާފުންގެ މެދުގައި އޮތް ރޫހަށް ވަނީ އަސަރުކޮށްފައި," ނޫރައިންގެ ސިޓީގައި ވިދާޅުވެފައިވެ އެވެ.
މި މައްސަލާގެ އިތުރުންވެސް އެމްއެމްޕީއާރުސީ ހިންގުމުގައި ހުރި ގިނަ ގޯސްތަކެއް ނޫރައިން ފާހަގަކުރެއްވިއިރު، އެ ކުންފުނީގެ މެނޭޖިން ޑިރެކްޓަރުގެ މަގާމުގައި ހުންނެވި ފާތިމަތު ތައުފީގުވެސް މިއަދު ވަނީ އެ މަގާމުން ވަކިކޮށްފަ އެވެ.
ޖިންސީ ފުރައްސާރައިގެ އަމަލުތަކަކީ އެމްއެމްޕީއާރްސީގެ މެނޭޖްމަންޓުން އެއްވެސް ހާލެއްގައި ބަލައިގަންނާނެ އަމަލުތަކެއް ނޫންކަން ފާހަގަކޮށް އެ ކުންފުނިން ބުނީ އެފަދަ އަމަލެއް ކޮށްފި ކޮންމެ މުވައްޒަފަކާމެދު ކުންފުނިން އެޅެންހުރި އެންމެ ހަރުކަށި ފިޔަވަޅު އަޅާނެ ކަމަށް ބުނި ނަމަވެސް އެކަމުގައި އެޅި ފިޔަވަޅެއް މިހާތަނަށް ހާމަކޮށްފައި ނުވެ އެވެ.
ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު މުހައްމަދު އަލީ ޖަނާހުގެ ދަރިކަނބަލުން، ނޫރައިން އެމްއެމްޕީއާރުސީގެ ޗެއާޕާސަންގެ މަގާމަށް އައްޔަން ކުރީ ޑިސެމްބަރު 27، 2023 ގަ އެވެ.
