ވޯކް ވިސާ ޖެހުމަށްފަހު, ގިނަ ވަގުތު ކިއުގައި މަޑުކުރަން ނުޖެހި, ފަސޭހައިން ޕާސްޕޯޓާ ހަވާލުވެވޭ ގޮތް ހަދައިފި އެވެ.
މީގެ ކުރިން އޮންނަނީ ވޯކް ވިސާ ޖެހުމަށްފަހު ޕާސްޕޯޓާއި ހަވާލުވާން ދާ މީހުން, ވަކި ގަޑިއަކަށް އިމިގްރޭޝަނަށް ހާޒިރުވެ، ނަންބަރު ޖެހެންދެން އެތަނުގައި މަޑުކުރަން ޖެހޭ ގޮތަށެވެ. އެކަމަށް ލުއި ފަސޭހަކޮށްދިނުމުގެ ގޮތުން އިމިގްރޭޝަނުން މިއަދު ވަނީ ގިނަ ވަގުތު ކިއުގައި ތިބެން ނުޖެހޭނެހެން އިންތިޒާމުތައް ހަމަޖައްސާފަ އެވެ.
މިއަދުން ފެށިގެން ވޯކް ވިސާ ޖެހުމަށްފަހު ޕާސްޕޯޓާއި ހަވާލުވާން އޮންލައިންކޮށް "އޭންޓް ކިޔޫ" އެޕްލިކޭޝަން މެދުވެރިކޮށް ނަންބަރު ދޫކުރުމަށް ނިންމާފައިވާ ކަމަށް އިމިގްރޭޝަނުން ނެރުނު ނޫސްބަޔާނެއްގައި ބުންޏެވެ.
އެ އިދާރާއިން ބުނީ މި ބަދަލު ގެނައީ ހިދުމަތް ހޯދާ ފަރާތްތަކުގެ ޝަކުވާ ލިބެމުންދާތީ, އެކަމަށް ހައްލެއް ހޯދުމަށްޓަކައި ކަމަށެވެ.
އެގޮތުން ޒަމާނާއި އެއްގޮތަށް އޮންލައިންކޮށް، ކަނޑައެޅިފައިވާ ގަޑީގައި "އޭންޓް ކިޔޫ" މެދުވެރިކޮށް ކޮންމެ ތަނެއްގައި ހުރެވެސް އޮންލައިންކޮށް ނަންބަރު ނަގާލެވޭނެ އެވެ. އަދި ކިއުގެ ހިދުމަތް ދެމުންދާ ތަރުތީބު ވަގުތުން ބަލާލެވޭނެ އެވެ.
"އޭންޓް ކިޔޫ" އެޕްލިކޭޝަން މެދުވެރިކޮށް ނަންބަރު ނަގަންވީ ގޮތް:
- ފަހަކަށްވުރެމަދު ޕާސްޕޯޓާއި ހަވާލުވާން ނަންބަރު ނަގަން ޖެހެނީ ހެނދުނު 9:00 އިން 10:30 އާއި ދެމެދު; ހިދުމަތް ދޭނީ ހެނދުނު 10:00 އިން މެންދުރުފަހު 3:00 އަށް.
- ހައަކަށްވުރެ ގިނަ ޕާސްޕޯޓާއި ހަވާލުވާ ނަންބަރު ނަގަން ޖެހެނީ މެންދުރު 11:30 އިން 12:30 އާއި ދެމެދު; ހިދުމަތް ދޭނީ މެންދުރު 1:15 އިން 03:00 އަށް.
ނަންބަރު ނެގުމަށްޓަކައި ސަބްމިޝަން ރިސިޓްގައި ހިމެނޭ ޕީޕީއެޗް އަދި ބޮކްސް ނަންބަރު ނުވަތަ ނަންބަރުތައް ޖެހުމަށްފަހު، ސަބްމިޝަން ރިސިޓް އަޕްލޯޑު ކޮށްލުމުން ނަންބަރު ނެގޭނެ ކަމަށް އިމިގްރޭޝަނުން ބުނެ އެވެ.
އިންތިޒާމުތައް މިހެން ހަމަޖެއްސުމުން, ހިދުމަތް ހޯދާ މީހުންގެ ވަގުތު ސަލާމަތްވެ، ހިދުމަތް ހޯދުމުގައި އިތުރު ލުއިފަސޭހަކަމެއް ލިބިގެންދާނެ ކަމެއްގެ ގޮތުގައި އިމިގްރޭޝަނުން ފާހަގަ ކުރެ އެވެ.
