ސިނަމާލެ ބްރިޖު ހައިވޭގައި ހެލްމެޓު ނާޅައި ސައިކަލުގައި ދިޔަ ދެ މީހަކު ފުލުހުން ޖޫރިމަނާ ކޮށްފި އެވެ.
ފުލުހުންގެ ތަރުޖަމާން އަހުމަދު ޝިފާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ހެލްމެޓު ނާޅައި ހައިވޭގައި ދުއްވި ދެ މީހުންނަށް ފިޔަވަޅު އަޅައި، ޖޫރިމަނާ ކޮށްފައިވާ ކަމަށެވެ.
މަގުމަތީގެ ރައްކާތެރިކަމަށް ކޮންމެ ފަރުދަކުވެސް އެއްބާރުލުން ދެއްވުމަކީ މަގުގެ އަމާންކަމަށް ކޮށްދެވޭ އަގުހުރި ޚިދުމަތަކަށްވާނެ ކަމަށް ޝިފާން ވިދާޅުވި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި ފިރިހެނަކާއި އަންހެނަކު ސައިކަލުގައި ހައިވޭއިން ދުއްވާފައި ދިޔައީ ހެލްމެޓެއް ނާޅަ އެވެ. މިކަމާ ގުޅިގެން ސޯޝަލް މީޑިއާގައި އެ ދެ މީހުންނަށް ބޮޑެތި ފާޑު ކިޔުންތައް އަންނަނީ އަމާޒުވަމުންނެވެ.
ސިނަމާލެ ބްރިޖު އަދި ހައިވޭގައި ހިނގާ އެކްސިޑެންޓުތައް އިތުރުވަމުން އަންނައިރު، ރައްކާތެރިކަމުގެ ފިޔަވަޅު ބައެއް ފަހަރު މީހުން ނާޅަ އެވެ. ބާރު ސްޕީޑުގައި ދުއްވުމުގެ ސަބަބުން އެހެން ވެހިކަލްތަކުގައި ޖެހި ބައެއް މީހުންގެ ފުރާނަ ވެސް ގެއްލިފައި އެބަ ހުއްޓެވެ.
ފުލުހުން އަންނަނީ މަގުމަތީގައި ހިނގާ އެކްސިޑެންޓުތައް މަދު ކުރުމަށް ޓްރެފިކް ފުލުހުން ނެރެ، ގިނަ ފިޔަވަޅުތައް އަޅަމުންނެވެ.
