ޓެކުހާއި ޓެކްސް ނޫން އާމްދަނީ އިތުރުވެ، މިދިޔަ މަހުގެ ނިޔަލަށް ދައުލަތަށް އާމްދަނީގެ ގޮތުގައި 11 ބިލިއަން ރުފިޔާ ބަލައިގެންފައިވާ ކަމަށް ޓެކްސް އިދާރާ، މީރާގެ ތަފާސްހިސާބުތަކުން ދައްކައިފި އެވެ.
މީރާއިން އެންމެ ފަހުން އާންމުކޮށްފައިވާ އޭޕްރީލް މަހުގެ މަންތުލީ ރެވެނިޔު ކަލެކްޝަން ރިޕޯޓު ގައިވާ ގޮތުގައި، މިދިޔަ މަހުގެ ތެރޭގައި ދައުލަތަށް އާމްދަނީގެ ގޮތުގައި 2.1 ބިލިއަން ރުފިޔާ ބަލައިގެންފައިވެ އެވެ.
މިއީ މިދިޔަ އަހަރުގެ އޭޕްރީލްއަށް ވުރެ 13.6 ޕަސެންޓު އިތުރު، އަދި ބަޖެޓުގައި ލަފާކުރި ވަރަށް ވުރެ 4.8 ޕަސެންޓު އިތުރު އަދަދެކެވެ.
މިދިޔަ މަހު އާމްދަނީ އިތުރުވީ ސަބަބުތަކުގެ ގޮތުގައި މީރާއިން ފާހަގަކުރީ، އަންދާޒާ ކުރި ވަރަށް ވުރެ މާޗު މަހު ރާއްޖެ އައި ޓޫރިސްޓުންގެ އަދަދު އިތުރުވުމާ ގުޅިގެން ޓޫރިސްޓު ނަމްބަރުތަކާ ސީދާ ގުޅުން ހުރި ޓެކްސްތައް ކަމުގައިވާ، ޖީއެސްޓީ އާއި އެއާޕޯޓު ޓެކުހާއި ފީތަކާއި ގްރީން ޓެކްސްއިން ލިބުނު އާމްދަނީ އިތުރުވުމެވެ.
ޓޫރިޒަމް މިނިސްޓްރީގެ ރެކޯޑުތަކުން ދައްކާ ގޮތުގައި މި އަހަރުގެ މާޗު މަހު 194،227 ޓޫރިސްޓުން ރާއްޖެއަށް ޒިޔާރަތްކުރި އެވެ. މިއީ އަންދާޒާ ކުރި ވަރަށް ވުރެ 4.8 ޕަސެންޓު އިތުރު އަދަދެކެވެ.
މިދިޔަ މަހުގެ ނިޔަލަށް ދައުލަތަށް ލިބުނު އާމްދަނީ
- ޖުމްލަ އާމްދަނީ - 11 ބިލިއަން ރުފިޔާ
- ޓެކްސް އާމްދަނީ - 9.5 ބިލިއަން ރުފިޔާ
- ޓެކްސް ނޫން އާމްދަނީ - 1.4 ބިލިއަން ރުފިޔާ
މިދިޔަ މަހުގެ އާމްދަނީއަށް ލިބުނު ކުރިއެރުމާ އެކީ، މި އަހަރުގެ މިހާތަނަށް ލިބުނު އާމްދަނީ ވަނީ 11 ބިލިއަން ރުފިޔާއަށް އިތުރުވެފަ އެވެ. މިއީ މިދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 1.9 ބިލިއަން ރުފިޔާ އިތުރު އަދަދެކެވެ.
އަހަރުގެ މިހާތަނަށް ލިބުނު އާމްދަނީގެ ބޮޑު އިންސައްތައެއް ހިއްސާކުރަނީ ޖީއެސްޓީ އެވެ. ޖީއެސްޓީގެ ގޮތުގައި މިދިޔަ މަހުގެ ނިޔަލަށް ހަ ބިލިއަނަށް ވުރެ ގިނަ ރުފިޔާ ލިބިފައިވާއިރު، މިއީ ލިބުނު ޖުމްލަ އާމްދަނީގެ ދެ ބައި ކުޅަ އެއް ބަޔަށް ވުރެ ބޮޑު އަދަދެކެވެ.
ޖީއެސްޓީ ނަގާފައި ދެން އެންމެ ބޮޑު އާމްދަނީއެއް ލިބުނީ އިންކަމް ޓެކްސް އާއި ރިސޯޓުތަކުގެ ބިމު ކުލިންނާއި ރާއްޖެއިން ފުރާ ފަސިންޖަރުންގެ އަތުން ނަގާ ޑިޕާޗާ ޓެކުހާއި އެއާޕޯޓު ޑިވެލޮޕްމަންޓް ފީ އިންނެވެ. އަދި ކޯޓާ ފީ އާއި ވޯކް ޕާމިޓް ފީ އިން ވެސް 100 މިލިއަން ރުފިޔާއަށް ވުރެ ބޮޑު އާމްދަނީއެއް ލިބިފައިވެ އެވެ.
