ލަންޑަން (12 މެއި) - އިނގިރޭސި ޕްރިމިއާ ލީގުގައި ރޭ ޓޮޓޭންހަމް ހޮޓްސްޕާ އަތުން 2-1 އިން ބަލިވެ، ބާންލީ ޕްރިމިއާ ލީގުން ރެލިގޭޓްވެއްޖެ އެވެ.
ލީގުގައި ބާކީ ޢެއް މެޗު އޮތްއިރު، ބާންލީ ތާވަލްގެ 19 ވަނައިގައި އޮތީ 24 ޕޮއިންޓާއެކު އެވެ. ބާންލީ އަށް ރެލިގޭޝަން ޒޯނުން ސަލާމަތްވާނެ ގޮތެއް މިހާރު ނެތެވެ. ރޭގެ މެޗުން މޮޅުވިނަމަ، ފަހު މެޗަށް ކުރިމަތިލާއިރު ވެސް ރެލިގޭޝަނުން ސަލާމަތްވުމުގެ ފުރުސަތެއް ބާންލީ އަށް އޮންނާނެ އެވެ.
މިއީ ތިން ސީޒަންގެ ތެރޭގައި ބާންލީ ރެލިގޭޓްވި ދެވަނަ ފަހަރެވެ. އިނގިރޭސި ލީގު ޗެމްޕިއަންޝިޕް ކާމިޔާބުކޮށް، މިިދިޔަ އަހަރު ބާންލީ އަތުން ޕްރިމިއާ ލީގަށް ޕްރޮމޯޓް ވިޔަސް، މި ސީޒަންގައި އެ ޓީމަށް ޕްރިމިއާ ލީގުގެ ޖާގައެއް ނުހިފެއްޓުނެވެ.
ޓޮޓެންހަމްގެ ދަނޑުގައި ރޭ ކުޅުނު މެޗުގައި ފުރަތަމަ ލަނޑު ޖަހައި ލީޑު ހޯދީ ބާންލީ އިންނެވެ. ބާންލީ އަށް ލީޑު ހޯދައިދިނީ ޖޭކަބް ބްރޫން ލާސަންއެވެ. އެކަމަކު ޕެޑްރޯ ޕޯރޯ އާއި މިކީ ވެން ޑަވެން ޖެހި ލަނޑުތަކާއެކު، ޓޮޓެންހަމް ވަނީ ކުރި ހޯދައިފައެވެ.
"މިއަދު ޕްރިމިއާ ލީގުން ބާންލީ މި ރެލިގޭޓްވީ. އެކަމަކު ޕްރިމިއާ ލީގަށް އެނބުރި އައުމުގެ މަސައްކަތް މާދަމާ (ހޯމަ ދުވަހު) އަހަރަމެން ފަށާނަން،" ބާންލީގެ ކޯޗު ވިންސެންޓް ކޮމްޕަނީ ބުންޏެވެ.
