ކުލި ކޮންޓްރޯލް ކުރުމަކީ ދިވެހިރާއްޖޭގައި ކުރަން ކަމުދާ ކަމެއް ނޫން ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ވީޓީވީގެ ޕްރޮގްރާމެއްގައި ބުރާސްފަތި ދުވަހު ވާހަކަ ދައްކަވަމުން ހައިދަރު ވިދާޅުވީ ކުލި ކޮންޓްރޯލްކޮށްފި ނަމަ އިމާރާތުގެ ވެރި ފަރާތަށް ގެއްލުންތަކެއްވާނެ ކަމަށެވެ.
"އަޅުގަނޑު ގަބޫލު ކުރާ ގޮތުގައި ކުލި އޮންނަން ޖެހޭނީ މާކެޓަށް ދޫކޮށްލާފަ. އެހެން ނޫނީވިއްޔާ ވާ ގޮތަކީ ކުލި ކޮންޓްރޯލް ކުރަން ފަށައިފިއްޔާ ބޮޑެތި ލޯނުތަކާ އެއްޗެހި ނަގައިގެން އިމާރާތްކޮށްފައި ހުންނަ ބަޔަކަށް ލިބޭ ގެއްލުންތަކެއް ވެސް އުޅޭނެ،" މިނިސްޓަރު ވިދާޅުވި އެވެ.
ހައިދަރު ވިދާޅުވީ ހުޅުވާލެވިފައި އޮންނަ މާކެޓެއް އޮންނަ ގައުމެއްގައި ކުލި ކޮންޓްރޯލް ކުރުމަކީ ރަނގަޅު ގޮތެއް ނޫން ކަމަށް އިގްތިސާދީ މާހިރުން ވެސް ގަބޫލު ކުރާ ކަމަށެވެ.
"އެހެންވީމަ އެއީކީއެއް ހުޅުވާލެވިފައި އޮންނަ މާކެޓެއް އޮންނަ ގައުމެއްގައި ކުރަން ކަމުދާ ކަމެއް ކަމަކަށް އިކޮނޮމިސްޓުން ވެސް ގަބޫލެއް ނުކުރޭ އިނގޭތޯ. އެހެންވީމާ އަޅުގަނޑަކަށް ހިއެއް ނުވޭ އެއީ ކުލި ކޮންޓްރޯލް ކުރުމަކީ އެއީ އަޅުގަނޑުމެން ކުރަން ކަމުދާ ކަމެއް ކަމަކަށް،" އޭނާ ވިދާޅުވި އެވެ.
ކުލި ކޮންޓްރޯލް ނުކުރެވޭނެ ކަމަށް ކުރީ ސަރުކާރުގެ ފައިނޭންސް މިނިސްޓަރު އިބްރާހިމް އަމީރު ވެސް ވަނީ މީގެ ކުރިން ވިދާޅުވެފަ އެވެ.
"ޕްރައިވެޓް ސެކްޓާގައި ޕްރައިވެޓް ޕާޓީސްތައް އަމިއްލައަށް ލޯނު ނަގައިގެން ހަދާ ގެތަކުން ރެންޓް ކޮންޓްރޯލްކުރުމަކީ އެއީ މާކެޓް މެކޭނިޒަމްއާ ވަރަށް ހިލާފުކަމެއް ކަމުގައި އަޅުގަނޑު ދެކެނީ،" މީގެ ކުރިން 2022 ވަނަ އަހަރު މީޑިއާއަކަށް ދެއްވި އިންޓަވިއުއެއްގައި އަމީރު ވިދާޅުވި އެވެ.
އެކަށީގެންނުވާ މިންވަރަކަށް މާލޭގެ ކުލި ބޮޑުވުމުގެ މައްސަލައިގައި މީގެ ކުރިން 2019 ވަނަ އަހަރު ރައްޔިތުންގެ މަޖިލީހަށް ޕެޓިޝަނެއް ވެސް ހުށަހެޅި އެވެ. މާލޭ ޓެނަންޓްސް ޔޫނިއަނުން ހުށަހެޅި އެ ޕެޓިޝަނުގައި ގޮވާލާފައި ވަނީ ކުލި ކޮންޓްރޯލް ކުރުމަށެވެ.
ދިވެހިރާއްޖޭގެ އާބާދީގައި ބިދޭސީންނާއެކު 515،122 މީހުން ހިމެނޭއިރު އޭގެ ތެރެއިން 212،138 މީހުން ދިރިއުޅެނީ ވެރި ރަށް މާލޭގަ އެވެ. އެހެންކަމުން އާބާދީގެ 41 ޕަސެންޓު ދިރިއުޅެނީ މާލޭގަ އެވެ. ތަފާސްހިސާބުތަކުން ދައްކާ ގޮތުގައި މާލޭގެ 450 އަށް ވުރެ ގިނަ އެޕާޓްމަންޓު ހުންނަނީ ކުއްޔަށް ދޫކޮށްފަ އެވެ.
ހިސާބުތަކުން ދައްކާ ގޮތުގައި ކުލި އެންމެ ބޮޑުވެފައި ވަނީ 2009 ވަނަ އަހަރެވެ. އަދި ކުލި އެންމެ ކުޑަވީ ކޮރޯނާ ވައިރަސް ފެތުރުނުއިރު 2020 ވަނަ އަހަރު ކަމަށް ވެސް ހިސާބުތަކުން ދައްކަ އެވެ. ނަމަވެސް އޭގެ ފަހުން މަޑުމަޑުން ކުލި ބޮޑުވަމުން އަންނަ ކަމަށް ވެސް ހިސާބުތަކުން ފެނެ އެވެ.
