ސައްހަ ލިޔެކިއުންތައް ނެތް ބިދޭސީން ގާނޫނީ އިމުގެ ތެރެއަށް ގެންނަން މި ސަރުކާރުން ފެށި ރެގިއުލަރައިޒް ކުރުމުގެ މަސައްކަތް ކުރިއަށް އެ ގެންދަނީ އެމްޑީޕީގެ ވެރިކަމުގައި ވެސް އެކަން ކުރިއަށް ގެންދިޔަ ގޮތަށް ކަމަށް ވިދާޅުވެ، ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއީލް ހޯމް މިނިސްޓަރަށް ޝުކުރު އަދާކުރައްވައިފި އެވެ.
ހޯމް މިނިސްޓަރު އަލީ އިހުސާން ރޭ ވިދާޅުވީ ބިދޭސީން ރެގިއުލަރަައިޒްކުރުމުގެ ބޮޑު މަސައްކަތެއް އަންނަ ބުރާސްފަތި ދުވަހު ފަށްޓަވާނެ ކަމަށެވެ. އެ މަސައްކަތުގެ ފުރަތަމަ ފިޔަވަހީގައި ކުރާނެ ކަމަކީ އޭނާ ވިދާޅުވި ގޮތުގައި ގަވާއިދާ ހިލާފަށް އުޅޭ ބިދޭސީން ދެނެގަތުމެވެ. އެއަށް ފަހު ގާނޫނީ އިމުގެ ތެރެއަށް އަންނަން އެމީހުންނަށް ފުރުސަތު ދޭނެ ކަމަށް ވެސް މިނިސްޓަރު ވިދާޅުވި އެވެ.
ފައްޔާޒު "އަދަދު" އަށް މިއަދު ވިދާޅުވީ މިހާރުގެ ސަރުކާރުން އެ މަސައްކަތް ކުރިއަށް އެ ގެންދަނީ އެމްޑީޕީގެ ވެރިކަމުގައި ވެސް ކުރިއަށް ގެންދިޔަ ގޮތަށް ކަމަށާ އެ މަަސައްކަތް ކުރިއަށް ގެންދާތީ ޝުކުރު އަދާކުރައްވާ ކަމަށެވެ.
"ހަމަ އަަޅުގަނޑުމެން ވެސް ކުރިއަށް ގެންދިޔަ ގޮތަށް އެ ގެންދަނީ. ދިހަ އިނގިލީގެ ފިންގަޕްރިންޓް ނެގުން ވެސް އެއީ މީހުން ދެނެގަންނަން އަޅުގަނޑުމެން ފެށި ކަމެއް،" ފައްޔާޒް ވިދާޅުވި އެވެ.
އެހެން ނަމަވެސް ގިނަ އަދެއްގެ ބިދޭސީންގެ މައުލޫމާތު ނެތް ކަމަށް ހޯމް މިނިސްޓަރު ވިދާޅުވާ ވާހަކަ އޭނާ ދޮގުކުރެއްވި އެވެ.
