ލަންޑަން (މާޗް 26) - ބްރެޒިލް މެޗުގައި އަނިޔާވި އިނގިރޭސި ދެ ޑިފެންޑަރުން ކަމަށްވާ ކައިލް ވޯކާ އާއި ހެރީ މެގުއާ އަށް ބެލްޖިއަމް މެޗުގައި ނުކުޅެވޭނެ ކަމަށް އެ ޓީމުން ބުނެފި އެވެ.
މެންޗެސްޓާ ސިޓީގެ ވޯކާ އާއި މެންޗެސްޓާ ޔުނައިޓެޑްގެ މެގުއާ އަށް އަނިޔާވީ މިދިޔަ ހޮނިހިރު ދުވަހު 1-0 ގެ ނަތީޖާ އަކުން ބްރެޒިލް އަތުން އިންގްލެންޑް ބަލިވި މެޗުގަ އެވެ.
އިންގްލެންޑް ޓީމަށް އަނިޔާގެ ގިނަ މައްސަލަތަކެއް ވަނީ ކުރިމަތިވެފަ އެވެ. އެ ގޮތުން ކެޕްޓަން ހެރީ ކޭން އާއި ބުކާޔޯ ސަކާ ވަނީ އެކުވެރިކަމުގެ މެޗުތަކުގެ ކުރިން ސްކޮޑުން ބާކީ ކޮށްފަ އެވެ.
އިންގްލެންޑުން ބެލްޖިއަމާ ދެކޮޅަށް ކުޅޭ މެޗުގެ ކުރިން އެ ޓީމުގެ ކޯޗު ގަރެތު ސައުތުގޭޓް ބުނީ, ޓީމަށް އަނިޔާގެ ގިނަ މައްސަލަތަކެއް ކުރިމަތިވެފައިވީ ނަމަވެސް ދެން ކުޅެން އަރާ ކުޅުންތެރިންނާއި މެދު ވެސް އިތުބާރު ބޮޑު ކަމަށެވެ.
"ބްރެޒިލް މެޗުގައި ވަޓްކިންސް ފަރާތުން މޮޅު ކުޅުމެއް ފެނުން. ބެލްޖިއަމް މެޗުގައި ޓޯނީ ކުޅޭނެ ކަމަށް މި ބަލަނީ. މިއީ އެ ކުޅުންތެރިންނަށް އާ ތަޖުރިބާ އެއް، ލިބޭ ފުރުސަތުގެ ބޭނުން ހިފަން ކުޅުންތެރިން ތިބީ ތައްޔާރަށް" ސައުތުގޭޓް ބުންޏެވެ.
ސައުތުގޭޓް ބުނީ ޔޫރޯގެ ކުރިން އަދި ޓީމަށް ވަގުތު އެބައޮތް ކަމަށާއި, ޔޫރޯ އަށް ފަހު އޮންނަ އޮލިމްޕިކް ގޭމްސް އަށް 21 އަހަރުން ދަށުގެ ޓީމުގެ ކުޅުންތެރިންނަށް ސީނިއާ ޓީމުން ވެސް ފުރުސަތު ހޯދޭނެ ކަމަށެވެ. އަދި މިއީ ދެ މުބާރާތައް އެކުގައި ތައްޔާރުވާން ރަނގަޅު ފުރުސަތެއްގެ ގޮތުގައި ސައުތުގޭޓް ވަނީ ފާހަގަކޮށްފަ އެވެ.
