ސްކޭމަކުން ފަސްލައްކަ ރުފިޔާ ފޭރިގަތް މީހަކު ފުލުހުން ހައްޔަރުކޮށްފި އެވެ.
މި މަހުގެ 13 ވަނަ ދުވަހު ފުލުހުންނަށް ހުށަހެޅި އެ މައްސަލާގައި، ހައްޔަރުކުރީ އުމުރުން 23 އަހަރުގެ ދިވެހި ފިރިހެނެއް ކަމަށް މިއަދު މީޑިއާތަކަށް ފޮނުވި މެސެޖެއްގައި ފުލުހުން ބުނެ އެވެ.
ފުލުހުން ބުނީ އޭނާގެ ބަންދާ މެދު ގޮތެއް ނިންމުމަށް މިދިޔަ ހޮނިހިރު ދުވަހު ކްރިމިނަލް ކޯޓަށް ހާޒިރުކުރުމުން، 15 ދުވަހުގެ މުއްދަތެއް ޖަހާފައިވާކަމަށެވެ.
މި މައްސަލަ ތަހުގީގުކުރަމުން އަންނަ ކަމަށް ވެސް ފުލުހުން ބުނެ އެވެ.
މި ފަހަކަށް އައިސް އޮޅުވާލައިގެން މީހުން އަތުން ފައިސާ ފޭރުމުގެ މައްސަލަތައް އަންނަނީ އިތުރުވަމުންނެވެ. އެގޮތުން އެކި ސަރުކާރުގެ އެކި މުއައްސަސާތަކުގެ ނަމުގައި، އާއި ބޭންކުތަކުގެ ނަމުގައި އަދި ވިޔަފާރިތަކުގެ ނަމުގައި މީހުންނަށް ގުޅައިގެންނާއި، އެކި ގޮތްގޮތަށް ފައިސާ ފޭރުމުގެ މައްސަލަތައް ގިނަ އެވެ.
މިއަދު ފުލުހުން ބޭއްވި ނޫސްވެރިންގެ ބައްދަލުވުމެއްގައި، އިސްލާމިކް ބޭންކު އެކައުންޓަކުން އޮޅުވާލައިގެން 1.8 މިލިއަން ރުފިޔާ ވަގަށް ނެގި މައްސަލައެއް ހުށަހަޅާފައިވާކަން ވެސް ހާމަކުރި އެވެ. ފުލުހުން ބުނީ އެ ފައިސާގެ ބޮޑު ބައެއް ހޯދިފައިވާކަމަށެވެ.
